ສວຍດ້ວຍມີດ ຄິດດີຫຼືຍັງ?

 

 

ວຽກງານດ້ານການແພດທີ່ກ່ຽວຂ້ອງກັບເລື່ອງຄວາມສວຍຄວາມງາມ ນັບມື້ນັບພັດທະນາຢ່າງບໍ່ຢຸດຢັ້ງ, ສາມາດປັບປຸງແກ້ໄຂຮູບຮ່າງສະລິລະໜ້າຕາຂອງຄົນເຮົາ ໃຫ້ສວຍງາມຕາມທີ່ຕ້ອງການ  ຫຼືເອີ້ນງ່າຍໆວ່າການໄສຍະກຳ ເຊິ່ງປັດຈຸບັນນີ້ຖືວ່າເປັນເລື່ອງໃກ້ຕົວຂອງຄົນເຮົາ ໂດຍສະເພາະສາວໆສະໄໝໃໝ່ດັ່ງໄທເຮົາເຈົ້າຂ້ອຍ ພຽງແຕ່ມີເງື່ອນໄຂດ້ານການເງິນບໍ່ພໍເທົ່າໃດກໍສາມາດເສກຄວາມງາມໄດ້ຕາມປາຖະໜາ. ແຕ່ຢຸດກ່ອນ! ບໍ່ມີສິ່ງໃດໃນໂລກນີ້ທີ່ຝືນທຳມະຊາດ ແລະເປັນດັ່ງໃຈໄດ້ຢ່າງສະບາຍຫາຍຫ່ວງ ເຊັ່ນດຽວກັບການໄສຍະກຳ. ສິ່ງທີ່ຈະນຳສະເໜີແກ່ຜູ້ອ່ານຕໍ່ໄປນີ້ຜູ້ຂຽນບໍ່ໄດ້ໂລເລ ແຕ່ເກີດຈາກປະສົບການທີ່ຜ່ານຂຽງ ເອິ່ຍ! ຜ່ານຕຽງການຜ່າຕັດໄສຍະກຳຕົວຈິງ ແລະຄົ້ນຄວ້າຂໍ້ມູນທັງຜົນດີ-ຜົນເສຍ ທັງໄລຍະສັ້ນໄລຍະຍາວ ເລີຍຢາກແຊຄວາມຮູ້ໃຫ້ກັບຜູ້ທີ່ກຳລັງຈະເຂົ້າມາສູ່ວົງການດັ່ງກ່າວ

  • ໄສຍະກຳດັງ: ຊິລິໂຄນບໍ່ມີມື້ໝົດອາຍຸ ຫຼືຍ່ອຍສະຫຼາຍເພາະມັນເປັນພາສຕິກ ແຕ່ບໍ່ມີໝໍທ່ານໃດກ້າກາລັງຕີວ່າມັນຈະສາມາດຢູ່ເທິງດັງຂອງທ່ານໄປຕະຫຼອດຊີວິດ ຈັກມື້ໜຶ່ງເນື້ອໜັງທີ່ຫຸ້ມຢູ່ກໍຈະບາງລົງ ໂດຍສະເພາະຜູ້ທີ່ເລີ່ມມີອາຍຸຫຼາຍຂຶ້ນການສ້າງຄໍລາເຈນ ອີລາສຕິນໃນຜິວກໍຈະໜ້ອຍລົງ ຈົນເຮັດໃຫ້ປາກົດເຫັນທ່ອນຊິລິໂຄນຢອງຢູ່ເທິງດັງຢ່າງແທ້ຈິງ ຮັບໄດ້ບໍ່? ເມື່ອຮັບບໍ່ໄດ້ກໍຈຳເປັນຕ້ອງປ່ຽນ ຫຼືເອົາອອກ.
  • ໜ້າພາສຕິກ ບາດເຈັບງ່າຍກວ່າເກົ່າ: ດັງ ຫຼືຄາງທີ່ມີຊິລິໂຄນເວລາຖືກກະທົບຈະເຈັບກວ່າ ແລະເກີນບາດເຈັບງ່າຍ ບວມຊ້ຳກ່ຳຂຽວກວ່າຄົນປົກກະຕິຫຼາຍເທົ່າ ດີບໍ່ຮູບຮ່າງອາດຜິດສ່ວນອອກໄປຈຳເປັນຕ້ອງໄດ້ໄປແກ້ໄຂ. ຜູ້ທີ່ໄສຍະກຳແລ້ວຕ້ອງລະມັດລະວັງເປັນພິເສດ ເຊັ່ນດຽວກັບຜູ້ຂຽນທີ່ຜ່າຕັດດັງ ບໍ່ວ່າຈະເກີດຫຍັງຂຶ້ນຢູ່ໃບໜ້າຕ້ອງຍົກມືມາກຸມດັງຢ່າງອັດຕະໂນມັດ ສະນັ້ນ, ຫາກໃຜບໍ່ໝັ້ນໃຈວ່າຈະດູແລໂຕເອງໄດ້ດີກໍຢ່າສ່ຽງເລີຍ.
  • ໄສຍະກຳຕ້ອງນວດ: ໂດຍສະເພາະຜູ້ທີ່ຜ່າຕັດເຕົ້ານົມເສີມຊິລິໂຄນເພີ່ມຂະໜາດ ຫຼັງຈາກບາດແຜຫາຍດີຕ້ອງນວດເຕົ້ານົມຢ່າງໜ້ອຍ 6ເດືອນ(ນວດທຸກມື້) ເພື່ອປ້ອງກັນພັງຜືດ ແລະຜິວໜັງເຊື່ອມຕິດກັບຊິລິໂຄນຢ່າງເປັນທຳມະຊາດ ບໍ່ດັ່ງນັ້ນຈະເຫັນເປັນກ້ອນຢ່າງຊັດເຈນຄືກັບມີຖ້ວຍແກງມາງວມໄວ້ ຄົງຈະບໍ່ສວຍງາມເທົ່າໃດ.
  • ນົມປອມຕອນເຖົ້າ: ຫຼາຍຄົນຄົງຈະບໍ່ຄ່ອຍຮູ້ຈັກວ່າສະພາບສາວທີ່ເສີມເຕົ້າຕອນເຖົ້າຈະເປັນແນວໃດ ເມື່ອຜິວໜັງບໍລິເວນໜ້າເອິກຫ່ຽວຍານລົງ ບໍ່ສາມາດປະຄັບປະຄອງຊິລິໂຄນກ້ອນໜັກໃຫ້ຕັ້ງຕຶ່ງສວຍງາມຄືເກົ່າ ມັນກໍບໍ່ຕ່າງຫຍັງກັບມີລູກເທນນິດຢູ່ໃນເຕົ້າທີ່ຢ່ອນຍານນັ້ນລະ (ພໍຈິນຕະນາການອອກບໍ່)
  • ທຸບໝົດໜ້າ ຖືກຕົບກໍບໍ່ຮູ້ສຶກ: ບັນດາສາວເກົາຫຼີທີ່ໄສຍະກຳຍົກໜ້າທັງເຫຼົາຄາງກະໄຕ, ທຸບໂໜກແກ້ມ, ແປງໜ້າຜາກ....ເສັ້ນປະສາດຮັບຄວາມຮູ້ສຶກສ່ວນໜຶ່ງຈະຖືກທຳລາຍຂະນະຜ່າຕັດເຮັດໃຫ້ບໍລິເວນໃບໜ້າຮັບສຳຜັດບໍ່ໄດ້ດີຄືແຕ່ເກົ່າ ປະມານວ່າຖືກຕົບເບົາໆລະດັບໜຶ່ງກໍບໍ່ຮູ້ສຶກເຈັບ.
  • ຜ່າຕັດປາກບາງ ທຸກບໍ່ໃຫ້ເວົ້າ: ເຈັບທີ່ສຸດ, ດູແລຢາກທີ່ສຸດ ເພາະປາກເປັນສ່ວນທີ່ລະອຽດອ່ອນ ແລະກໍຫຍາບໝໍຕ້ອງໃຊ້ມີດເລເຊີ້ ດັ່ງນັ້ນເຮົາຈະໄດ້ກິ່ນໄໝ້ໆເວລາຜ່າຕັດ ຫຼັງຈາກແຜຫາຍຕ້ອງໄດ້ນວດປ້ອງກັນການເປັນກະດັນ ແລະຮຽນຍິ້ມ, ຮຽນຫຸບສົບຫຸບປາກໃໝ່. ແຕ່ບັນຫາຈະເກີດຂຶ້ນໄດ້ຢູ່ບ່ອນວ່າເມື່ອແກ່ໂຕໄປປາກກໍຈະຍິ່ງບາງລົງເລື້ອຍໆຈົນຍິ້ມເຫັນເຫງືອກ ຕ້ອງເລືອກໝໍດີໆ ແລະຕັດແຕ່ງພໍປະມານ ຢ່າລືມກັນຜ່າຕັດປາກຄືການຜ່າອອກໄປ ຈະນຳເອົາມາຕໍ່ໃສ່ຄືນບໍ່ໄດ້.
  • ຜົນຂ້າງຄຽງຂອງໂບທັອກ: ໂບທັອກຄືໂຕຢາທີ່ກະຕຸ້ນໃຫ້ກ້າມເນື້ອຕາຍຫຼືຍຸບລົງຊົ່ວໄລຍະໜຶ່ງ ສາວໆມັກນິຍົມໄປສັກໂບທັອກເພາະຫຼຸດກາມ ຫຼືກ້າມເນື້ອສ່ວນຕ່າງໆ, ປີກດັງ ຫຼືໃຊ້ຈັດການບັງຫາຮອຍຫ່ຽວຍານ, ຕີນກາ, ຮິ້ວຮອຍກໍວ່າກັນໄປ. ໂບທັອກປະມານ 3-6ເດືອນແລ້ວແຕ່ບຸກຄົນ ໂບທັອກມັກເຮັດໃຫ້ຄົນເສບຕິດ ເນື່ອງຈາກເມື່ອໃບໜ້າກັບສູ່ສະພາບເດີມເຈົ້າຂອງຈະຮັບບໍ່ໄດ້ ຕ້ອງກັບມາສັກໃໝ່ ແຕ່ພໍສັກໄປເລື້ອຍໆ ໃບໜ້າຈະເລີ່ມປ່ຽນແປງ ເຊັ່ນ ຜິວຈະໃສຕຶງຄືທາໄຂ່ຂາວໄວ້ຕະຫຼອດເວລາ, ຜິວໄວຕໍ່ແດດ ແລະຄວາມຮ້ອນ, ສະແດງສີໜ້າໄດ້ບໍ່ເຕັມທີ່ ເຮັດໃຫ້ຮູ້ສຶກຄືແຂງໆ, ບາງຄົນຮູບຄິ້ວຈະປ່ຽນແປງຍົກສູງຂຶ້ນ, ຄົນທີ່ສັກໂບທັອກຫຼຸດກາມມັກຈະເມື່ອຍງ່າຍເວລາຫຍໍ້າອາຫານ,....
  • ຟິລເລີ້: ຟິລເລີຄວາມສານຕື່ມເຕັມ ຄ້າຍໆຄືຊິລິໂຄນແຫຼວທີ່ນຳມາສັກໃສ່ບໍລິເວນຕ້ອງການຕື່ມ ເຊັ່ນ: ປາຍຄາງ, ດັງ, ໜ້າຜາກ, ແກ້ມ, ຂະໝັບ.... ຟິລເລີຈະຄົງໂຕເປັນຮູບຊົງຕາມທີ່ໝໍເປັນຄົນປັ້ນໃຫ້ ແຕ່ຈະສະຫຼາຍໄປເອງຕາມທຳມະຊາດປະມານ 1ປີ ແຕ່ບັນຫາທີ່ພົບຄືຟິລເລີ້ບໍ່ຄົງຮູບຊົງ ແລ້ວໄຫຼຍ້ອນໄປກົດທັບເສັ້ນເລືອດໃຕ້ຜິວໜັງເຮັດໃຫ້ເສັ້ນເລືອດຝອຍຂະຫຍາຍຕົວເກີດເປັນຮອຍແດງ ຫຼືຮູບໜ້າຫຼຸບໂນນ ເຊິ່ງເປັນຜົນຂ້າງຄຽງໃນໄລຍະຍາວ. ທີ່ສຳຄັນຟິລເລີ້ບໍ່ໄດ້ສະຫຼາຍໄປ 100%ຕາມທີ່ໝໍບອກ ມັນຍັງເກາະແກະຢູ່ຕາມຫຼືບຜິວໜັງເຖິງໝໍຈະຂູດປານໃດກໍຕາມ. ສະນັ້ນ, ຄິດໃຫ້ດີກ່ອນຈະສັກສານລະລາຍດັ່ງກ່າວ. ເອີ້! ທີ່ສຳຄັນ ສາວໆທີ່ສັກຟິລເລີ້ ຫຼືໂບທັອກຕ້ອງຢູ່ໃນບ່ອນທີ່ມີອາກາດເຢັນເທົ່ານັ້ນຈະໄປນັ່ງປີ້ງຫູໝູ, ງົວປິ່ນບໍ່ໄດ້ເດັດຂາດ ຂໍເລົ່າ!

ນີ້ພຽງສ່ວນໜ້ອຍໆທີ່ນຳມາເລົ່າສູ່ຟັງ ການໄສຍະກຳເປັນເລື່ອງລະອຽດອ່ອນ ແລະສະຫຼັບສັບຊ້ອນຫຼາຍ ຜູ້ທີ່ຕ້ອງການງາມດ້ວຍມີດໝໍຕ້ອງສຶກສາຂໍ້ມູນໃຫ້ລະອຽດຖີ່ຖ້ວນ ຢ່າປ່ອຍໃຫ້ຄວາມຢາກງາມບັງຕາຈົນໜ້າມືດ ແລ້ວຕັດສິນໃຈໂດຍບໍ່ໄຕ່ຕອງ ເພາະທ່ານອາດຈະເສຍໃຈໄປຕະຫຼອດຊີວິດ. ແຕ່ຖ້າໃຜກຽມຄວາມພ້ອມທຸກຢ່າງຮຽບຮ້ອຍທັງເລື່ອງເງິນຄຳ, ເວລາໃນການດູແລຮັກສາໂຕ, ທີ່ສຳຄັນມີຜູ້ຊ່ຽວຊານສະເພາະດ້ານເປັນຜູ້ລົງມືໃຫ້ ກໍຈັດໄປໂລດ ເພາະຄວາມງາມບໍ່ລໍຖ້າໃຜເດີ.