ສປປ.ລາວ-ຣາຊະອານາຈັກໄທ ແລກປ່ຽນຂໍ້ມູນຂ່າວສານ ການບໍລິຫານ ແລະ ສົ່ງເສີມກໍາລັງແຮງງານ

     ສະພາການຄ້າ ແລະ ອຸດສາຫະກໍາ ແຫ່ງ ສປປ.ລາວ ແລະ ກົມພັດທະນາສີມືແຮງງານແຫ່ງຣາຊະອານາຈັກໄທ ຮ່ວມພົບ ປະຫາລືໃນກອງປະຊຸມແລກປ່ຽນຂໍ້ມູນຂ່າວສານດ້ານການບໍລິຫານ ແລະ ການສົ່ງເສີມກໍາລັງແຮງງານ ພາຍໃຕ້ການຮ່ວມ ມືດ້ານເສດຖະກິດຂອງບັນດາປະເທດລຸ່ມແມ່ນໍ້າຂອງ ເຊິ່ງໄດ້ຈັດຂຶ້ນໃນຕອນເຊົ້າວັນທີ 22 ກັນຍາ 2015 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ໂດຍການເປັນປະທານຮ່ວມຂອງທ່ານນາງ ແສງດາວອນ ບັງອອນແສງເດດ ເລຂາທິການ ສະພາການຄ້າ ແລະ ອຸດສາຫະກໍາແຫ່ງຊາດລາວ ທ່ານ ສະຖຽນ ພົນສິຣິ ຫົວໜ້າກົມພັດທະນາສີມືແຮງງານແຫ່ງຣາຊະ ອານາຈັກໄທມີບັນດາພະນັກງານວິຊາການມາຈາກບັນດາສະມາຄົມ ກຸ່ມບໍລິສັດ ຫົວໜ່ວຍທຸລະກິດຂອງລາວ ແລະ ຝ່າຍໄທ ປະກອບມີສະຖາບັນພັດທະນາສີມືແຮງງານນາໆຊາດຊຽງແສນ ສູນພັດທະນາສີມືແຮງງານ ແຂວງໜອງຄາຍ ຊຽງຣາຍ ແລະ ພະເຍົາ ເຂົ້າຮ່ວມຫຼາຍກວ່າ 30 ທ່ານ.

     ຈຸດປະສົງຂອງການຈັດກອງປະຊຸມໃນຄັ້ງນີ້ ແມ່ນເພື່ອເປັນການພົບປະແລກປ່ຽນຂໍ້ມູນຂ່າວສານ ແລະ ປຶກສາຫາລື ທາງດ້ານແຮງງານເປັນຕົ້ນ ການບໍລິຫານ ແລະ ການສົ່ງເສີມກໍາລັງແຮງງານ ເຊິ່ງໃນກອງປະຊຸມແມ່ນໄດ້ມີການສົນທະ ນາລົງເລິກໃນຫົວຂໍ້ຕ່າງໆເຊັ່ນ ການພັດທະນາກໍາລັງແຮງງານ ການບໍລິຫານຈັດການ ມາດຕະຖານສີມືແຮງງານອາຊຽນ ການທ່ອງທ່ຽວ ການຂົນສົ່ງລະຫວ່າງລາວ-ໄທ ເພື່ອເປັນຂໍ້ມູນພື້ນຖານໃຫ້ແກ່ສອງປະເທດໃນການກະກຽມຄວາມພ້ອມ ເຊື່ອມໂຍງປະຊາຄົມເສດຖະກິດອາຊຽນໃນທ້າຍປີ 2015.

 

ບົດຄວາມໃຫມ່ໆ