ສປປ.ລາວ ຈັດການສະເຫຼີມສະຫຼອງວັນຜູ້ບໍລິຈາກເລືອດໂລກ 14 ມິຖຸນາ ຄົບຮອບ 11 ປີ

ພັກ-ລັດຖະບານ ກໍຄື ອົງການກາແດງລາວ ແລະ ສູນເລືອດແຫ່ງຊາດ ຮ່ວມກັບ ພະນັກງານ ທະຫານ ຕຳຫຼວດ ນັກຮຽນ
ນັກສຶກສາ ອົງການຈັດຕັ້ງທາງສັງຄົມທຸກພາກສ່ວນ ໄດ້ຮ່ວມສະແດງພະລັງບໍລິຈາກເລືອດຊ່ອຍເຫຼືອສັງຄົມ ໂດຍບໍ່ຮຽກຮ້ອງສິ່ງຕອບແທນ ເພື່ອສະເຫຼີມສະຫຼອງວັນຜູ້ບໍລິຈາກເລືອດໂລກ 14 ມິຖຸນາ ປະຈຳປີ 2015 ຄົບຮອບ 11 ປີ ພາຍໃຕ້ຄຳຂວັນຂອບໃຈທ່ານຜູ້ບໍລິຈາກເລືອດທີ່ຊ່ອຍຊີວິດຂ້ອຍ ຂຶ້ນໃນຕອນເຊົ້າວັນທີ 12 ມິຖຸນາ 2015 ທີ່ສູນການຄ້າລາວ-ໄອເຕັກນະຄອນຫຼວງວຽງຈັນ.

ໃຫ້ກຽດເຂົ້າຮ່ວມເປັນປະທານໂດຍທ່ານ ອາຊາງ ລາວລີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ທ່ານ ດຣ. ບຸນກອງ ສີຫາວົງ ລັດຖະມົນຕີຊ່ອຍວ່າການກະຊວງສາທາລະນະສຸກ ທ່ານ ເລົາລີ ໄຟເພັງຢົວ ປະທານອົງການກາແດງລາວ ທ່ານ ດຣ.ນາງ ຈູລຽດ ໄພຣສ ຜູ້ຕາງໜ້າອົງການອະນາໄມໂລກ ປະຈຳ ສປປ.ລາວ ມີລັດຖະມົນຕີວ່າການ-ຊ່ອຍວ່າການກະຊວງອ້ອມຂ້າງ ທູຕານຸທູດ ອົງການຈັດຕັ້ງສາກົນ ແລະ ບັນດາພະນັກງານ ວິຊາການ ຕະຫຼອດຮອດມວນຊົນຊາວນະຄອນຫຼວງວຽງຈັນ ເຂົ້າຮ່ວມເປັນຈຳນວນຫຼວງຫຼາຍ.

ທ່ານຮອງນາຍົກລັດຖະມົນຕີ ອາຊາງ ລາວລີ ກ່າວວ່າ ວັນທີ 14 ມິຖຸນາ ເປັນວັນມີຄວາມໝາຍສຳຄັນທີ່ສຸດຕໍ່ບັນດາຜູ້ມີໃຈກຸສົນທັງຫຼາຍໃນທົ່ວໂລກ ກໍຄືຜູ້ມີໃຈກຸສົນຢູ່ ສປປ.ລາວ ເນື່ອງຈາກວ່າເຂົາເຈົ້າ ໄດ້ເສຍສະຫຼະເລືອດຂອງຕົນເພື່ອຄົນອື່ນ ໂດຍທີ່ເຂົາເຈົ້າບໍ່ເຄີຍຮູ້ຈັກກັນມາກ່ອນ ແລະ ບໍ່ຮຽກຮ້ອງສິ່ງຕອບແທນໃດໆ ທັງນີ້ ວັນຜູ້ບໍລິຈາກເລືອດໂລກ ໄດ້ຖືກສະຖາປະນາຂຶ້ນໃນປີ 2004 ໂດຍການເຫັນດີເຫັນພ້ອມຂອງ 4 ອົງການຈັດຕັ້ງລະດັບສາກົນທີ່ກ່ຽວຂ້ອງປະກອບມີ ອົງການອະນາໄມໂລກ ສະຫະພັນກາແດງ ແລະ ຊີກວົງເດືອນແດງສາກົນ ສະຫະພັນຜູ້ບໍລິຈາກເລືອດສາກົນ ແລະ ສະມາຄົມສາກົນເພື່ອການສົ່ງເລືອດ ໄດ້ເລືອກເອົາວັນທີ 14 ມິຖຸນາຂອງທຸກປີເປັນວັນຜູ້ບໍລິຈາກເລືອດໂລກ ເພື່ອລະນຶກເຖິງວັນຄ້າຍວັນເກີດຂອງທ່ານ ຄານ ແລນສະໄຕເນີ ເຊິ່ງເປັນນັກວິທະຍາສາດຊາວໂອຕຣິດ ເປັນຜູ້ຄົ້ນພົບໝວດເລືອດລະບົບ ABO ຂອງຄົນ ຈິ່ງສາມາດສົ່ງເລືອດໃຫ້ແກ່ຄົນນັບແຕ່ເວລານັ້ນເປັນຕົ້ນມາ ແລະ ໄດ້ມີກິດຈະກຳສະເຫຼີມສະຫຼອງ ວັນຜູ້ບໍລິຈາກເລືອດໂລກຈັດຂຶ້ນເປັນຄັ້ງທໍາອິດໃນວັນທີ 14 ມິຖຸນາ 2004 ມີສະມາຊິກ 192 ປະເທດເຂົ້າຮ່ວມ ແລະ ຖືກສ້າງຕັ້ງຂຶ້ນຢ່າງເປັນທາງການນັບແຕ່ປີ 2005 ເປັນຕົ້ນມາ.

ຕະຫຼອດໄລຍະ 20 ປີ ຜ່ານມາ ພັກ-ລັດຖະບານ ແຫ່ງ ສປປ.ລາວ ໄດ້ຊີ້ນຳ ແລະ ມອບໝາຍໃຫ້ອົງການ
ກາແດງລາວ ຈັດຕັ້ງປະຕິບັດວຽກງານກ່ຽວກັບຂະບວນບໍລິຈາກເລືອດ ຮ່ວມກັບການຈັດຕັ້ງຂັ້ນຕ່າງໆຢ່າງມີປະສິດທິຜົນ
ຈຳນວນໂຕເລກຜູ້ສະໝັກໃຈບໍລິຈາກເລືອດໄດ້ເພີ່ມຂຶ້ນໃນແຕ່ລະປີ ສະເພາະ 2014 ທີ່ຜ່ານມາ ທົ່ວປະເທດມີຜູ້ບໍລິຈາກເລືອດໄດ້ທັງໝົດ 35.047 ເທື່ອຄົນ ຖ້າທຽບໃສ່ເມື່ອກ່ອນ 20 ປີຜ່ານມາ ເຫັນວ່າ ປະເທດຂອງພວກເຮົາ ໄດ້ມີຄວາມຄືບໜ້າກ່ຽວກັບວຽກງານນີ້ສູງສົມຄວນ ເຮັດໃຫ້ຄົນເຈັບປ່ວຍທີ່ຕ້ອງການເລືອດ ເພື່ອການປິ່ນປົວຢູ່ຕາມໂຮງໝໍແຫ່ງຕ່າງໆໃນຂອບເຂດທົ່ວປະເທດໄດ້ຮັບການກອບກູ້ເອົາຊີວິດເປັນຈຳນວນຫຼວງຫຼາຍ ສິ່ງເຫຼົ່ານີ້ຊີ້ໃຫ້ເຫັນເຖິງຈິດໃຈອັນດີງາມຂອງພໍ່ແມ່ປະຊາຊົນລາວບັນດາເຜົ່າໃນການຊ່ວຍເຫຼືອເຊິ່ງກັນແລະກັນ ຜູ້ບໍລິຈາກເລືອດ ການຈັດຕັ້ງ ແລະ ຜູ້ເຮັດວຽກງານປຸກລະດົມຂົນຂວາຍການບໍລິຈາກເລືອດ ໄດ້ຮັບການປະຕິບັດນະໂຍບາຍຍ້ອງຍໍຊົມເຊີຍຈາກລັດຖະບານຕາມຄວາມເໝາະສົມຕະຫຼອດມາ ປະຊາຊົນບັນດາເຜົ່າໃນຂອບເຂດທົ່ວປະເທດ ສາມາດເຂົ້າເຖິງການບໍລິຈາກເລືອດໄດ້ຫຼາຍຂຶ້ນ.

ຮອງນາຍົກລັດຖະມົນຕີ ຍັງໄດ້ເນັ້ນໃຫ້ທຸກພາກສ່ວນໃນສັງຄົມ ຕ້ອງໄດ້ເອົາໃຈໃສ່ໃນຫຼາຍບັນຫາສຳຄັນ
ເປັນຕົ້ນໃຫ້ທຸກໆການຈັດຕັ້ງ ມວນຊົນທຸກລະດັບ ແລະ ທຸກຊັ້ນຄົນ ແຕ່ສູນກາງຮອດທ້ອງຖິ່ນ ພ້ອມກັນເຂົ້າໃຈ ແລະ ເຫັນ
ຄວາມຈຳເປັນຂອງການບໍລິຈາກເລືອດ ໂດຍບໍ່ຮຽກຮ້ອງສິ່ງຕອບແທນໃດໆ ແລະ ເພື່ອບຸນກຸສົນ ລະດົມຊັກຊວນໃຫ້ຫຼາຍໆຄົນຜູ້ທີ່ມີສຸຂະພາບແຂງແຮງ ບໍ່ມີຄວາມສ່ຽງຕໍ່ການຕິດເຊື້ອພະຍາດນຳສົ່ງທາງເລືອດ ໂດຍສະເພາະແມ່ນຜູ້ທີ່ບໍ່ເຄີຍບໍລິຈາກເລືອດມາກ່ອນໄດ້ມາປະກອບສ່ວນບໍລິຈາກເລືອດໃຫ້ຫຼາຍຂຶ້ນກວ່າເກົ່າ ແລະ ຮຽກຮ້ອງມາຍັງຜູ້ທີ່ເຄີຍບໍລິຈາກເລືອດມາແລ້ວຈົ່ງມີບົດບາດໃນການສົ່ງເສີມການບໍລິຈາກເລືອດແບບປອດໄພ ເປັນແບບຢ່າງທີ່ດີໃນການສືບຕໍ່ບໍລິຈາກເລືອດຢ່າງຕໍ່ເນື່ອງທັງເປັນຜູ້ປຸກລະດົມຂົນຂວາຍຄົນອື່ນໃຫ້ມາເຂົ້າຮ່ວມບໍລິຈາກ ໝາຍວ່າເປັນນັກການທູດທີ່ດີໃຫ້ແກ່ການບໍລິຈາກເລືອດທີ່ປອດໄພໃນສັງຄົມ ພ້ອມກັນນີ້ ກໍໃຫ້ວິຊາການທີ່ກ່ຽວຂ້ອງທີ່ເຮັດວຽກງານການບໍລິຈາກເລືອດໃນທົ່ວປະເທດ ຈົ່ງເອົາໃຈໃສ່ເຖິງການສ້າງຄວາມເພີງພໍໃຈ ຄວາມປະທັບໃຈໃຫ້ແກ່ຜູ້ບໍລິຈາກເລືອດ ດ້ວຍຄວາມເປັນມິດ ຄວາມເປັນກັນເອງໃນການເຮັດວຽກຂອງຕົນ ບໍ່ເຮັດໃຫ້ມີບັນຫາໃນເວລາບໍລິຈາກເລືອດ ຄັດເລືອກຜູ້ບໍລິຈາກເລືອດດ້ວຍຄວາມລະມັດລະວັງ ປະຕິບັດຕາມທຸກຂັ້ນຕອນ ໂດຍອີງໃສ່ມາດຕະຖານເງື່ອນໄຂການຄັດເລືອກຜູ້ບໍລິຈາກເລືອດທີ່ກຳນົດໄວ້ຢ່າງເຂັ້ມງວດ ໃຫ້ພະນັກງານແພດໝໍ ຜູ້ນຳໃຊ້ເລືອດ ຈົ່ງໄດ້ເຂົ້າໃຈເຖິງຄວາມໝາຍທີ່ວ່າ ເລືອດທີ່ປອດໄພ ແລະ ພຽງພໍ ໂດຍນຳໃຊ້ເລືອດຢ່າງສົມເຫດສົມຜົນ ບໍ່ຟູມເຟືອຍ ພ້ອມດຽວກັນນີ້ ກໍໃຫ້ປະກອບສ່ວນເປັນເຈົ້າການໃນການປຸກລະດົມຂົນຂວາຍການບໍລິຈາກເລືອດຮ່ວມກັບໜ່ວຍງານເລືອດຢູ່ຕາມສະຖານທີ່ຕ່າງໆ ພ້ອມທັງລະດົມໃຫ້ບັນດາແພດໝໍ ປະກອບສ່ວນບໍລິຈາກເລືອດນຳອີກ.

ຂ່າວ/ພາບ:ເທບພະວົງ

----------------------------------------------------------------------------

ທີ່ມາ Vientiane Today