ສປປ.ລາວ ຈະເປັນເຈົ້າພາບຈັດແຂ່ງຂັນບານເຕະ ໃນລາຍການ AFF U19 CHAMPIONSHIP 2015

ຢືນຢັນຢ່າງເປັນທາງການແລ້ວ ໂດຍສະຫະພັນບານເຕະແຫ່ງຊາດລາວວ່າ ການແຂ່ງຂັນກີລາບານເຕະຮຸ່ນອາຍຸບໍ່ເກີນ 19 ປີ ໃນລາຍການຊີງແຊັມອາຊຽນ 2015 ຫຼື AFF U19 CHAMPIONSHIP 2015 ເຊິ່ງ ສປປ.ລາວ ໄດ້ຮັບກຽດເປັນເຈົ້າພາບ ຈະຈັດຂຶ້ນໃນວັນທີ 22 ສິງຫາ-04 ກັນຍາ 2015 ນີ້ ທີ່ສະໜາມກີລາແຫ່ງຊາດ (ຫຼັກ 16 ເມືອງໄຊທານີ ນະຄອນຫຼວງວຽງຈັນ) ຈິ່ງຂໍເຊີນມວນຊົນເຂົ້າຮ່ວມຊົມ ຮ່ວມເຊຍນັກກີລາບານເຕະທີມຊາດລາວ ທີ່ຈະລົງສູ້ເສິກທໍາອິດ ພົບທີມຊາດ ກໍາປູເຈຍ ໃນວັນທີ 22 ສິງຫາ 2015ເລີ່ມແຕ່ເວລາ 19:00 ໂມງເປັນຕົ້ນໄປ.

ພິທີຖະແຫຼງຂ່າວການຈັດການແຂ່ງຂັນຊີງແຊັມອາຊຽນ ກີລາບານເຕະ ຮຸ່ນອາຍຸບໍ່ເກີນ 19 ປີ ໄດ້ຈັດຂຶ້ນໃນຕອນບ່າຍວັນທີ 14 ສິງຫາ 2015 ຜ່ານມາ ທີ່ ສະຫະພັນບານເຕະແຫ່ງຊາດລາວ ບ້ານຫວ້ຍຫົງ ເມືອງຈັນທະບູລີ ນະຄອນຫຼວງວຽງຈັນ ໂດຍການຖະແຫຼງຕໍ່ສື່ມວນຊົນຂອງທ່ານ ຄໍາໄພ ປະເສີດ ຮອງປະທານສະຫະພັນບານເຕະແຫ່ງຊາດລາວ ທ່ານນາງ ກັນຍາ ແກ້ວມະນີ ຄະນະ ປະທານຈັດການແຂ່ງຂັນ AFF U19 CHAMPIONSHIP 2015 ໂດຍມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານຮອງປະທານສະຫະພັນບານເຕະແຫ່ງຊາດລາວ ໄດ້ຖະແຫຼງວ່າ ການແຂ່ງຂັນກີລາບານເຕະຊີງແຊັມອາຊຽນ ຮຸ່ນອາຍຸບໍ່ເກີນ 19 ປີ ມີທັງໝົດ 10 ປະເທດເຂົ້າຮ່ວມ ເຊິ່ງແບ່ງອອກເປັນ 2 ກຸ່ມຄື ກຸ່ມ A ປະກອບມີ ທີມຊາດໄທ, ກໍາປູເຈຍ, ບຣູໄນ, ຟີລິບປິນ ແລະ ທີມຊາດລາວ (ເຈົ້າພາບ) ກຸ່ມ B ປະກອບມີ ທີມຊາດ ສສ.ຫວຽດນາມ ມຽນມາ, ສິງກະໂປ, ຕີມໍເເລສເຕ ແລະ ມາເລເຊຍ.
ສໍາລັບຕາຕະລາງການແຂ່ງຂັນມີຄື:

  • ໃນວັນທີ 22 ສິງຫາ 2015 ຄູ່ທີມຊາດບຣູໄນ ພົບກັບ ທີມຊາດຟີລິປິນ ເວລາ 16:00 ໂມງ. ຄູ່ທີ 2ທີມຊາດລາວ ພົບກັບ ທີມຊາດກໍາປູເຈຍ ເວລາ 19:00 ໂມງ.
  • ວັນທີ 23 ສິງຫາ 2015 ຄູ່ທີ 1 ທີມຊາດສິງກະໂປ ພົບກັບ ທີມຊາດມຽນມາ ເລວາ 16:00 ໂມງ. ຄູ່ທີ 2 ທີມຊາດມາເລເຊຍ ພົບກັບ ທີມຊາດຕີມໍເເລສເຕ ເວລາ 19:00 ໂມງ.
  • ວັນທີ 24 ສິງຫາ 2015ຄູ່ທີ 1 ທີມຊາດກໍາປູເຈຍ ພົບກັບ ທີມຊາດບຣູໄນ ເວລາ 16:00 ໂມງ. ຄູ່ທີ 2 ທີມຊາດລາວ ພົບກັບ ທີມຊາດໄທ ເວລາ 19:00 ໂມງ.
  • ວັນທີ 25 ສິງຫາ 2015 ຄູ່ທີ 1 ທີມຊາດຕີມໍເເລສເຕ ພົບກັບ ທີມຊາດຫວຽດນາມ ເວລາ 16:00 ໂມງ. ຄູ່ທີ 2 ທີມຊາດມາເລເຊຍພົບກັບ ທີມຊາດສິງກະໂປ ເວລາ 19:00 ໂມງ.
  • ວັນທີ 26 ສິງຫາ 2015 ຄູ່ທີ 1 ທີມຊາດລາວ ພົບກັບ ທີມຊາດບຣູໄນ ເວລາ 16:00 ໂມງ. ຄູ່ທີ 2 ທີມຊາດໄທ ພົບກັບ ທີມຊາດຟີລິບປິນ ເວລາ 19:00 ໂມງ.
  • ວັນທີ 27 ສິງຫາ 2015 ຄູ່ທີ 1 ທີມຊາດຫວຽດນາມ ພົບກັບທີມຊາດມາເລເຊຍ ເວລາ 16:00 ໂມງ. ຄູ່ທີ 2 ທີມຊາດມຽນມາ ພົບກັບ ທີມຊາດຕີມໍເເລສເຕ ເວລາ 19:00 ໂມງ.
  • ວັນທີ 28 ສິງຫາ 2015ຄູ່ທີ 1 ທີມຊາດຟີລິບປິນ ພົບກັບ ທີມຊາດກໍາປູເຈຍ ເວລາ 16:00 ໂມງ. ຄູ່ທີ 2 ທີມຊາດບຣູໄນ ພົບກັບ ທີມຊາດໄທ ເວລາ 19:00 ໂມງ.
  • ວັນທີ 29 ສິງຫາ 2015 ຄູ່ທີ 1 ທີມຊາດມາເລເຊຍ ພົບກັບ ທີມຊາດມຽນມາ ເວລາ 16:00 ໂມງ. ຄູ່ທີ 2 ທີມຊາດສິງກະໂປ ພົບກັບທີມຊາດຫວຽດນາມ ເວລາ 19:00 ໂມງ.
  • ວັນທີ 30 ສິງຫາ 2015 ຄູ່ທີ 1 ທີມຊາດໄທ ພົບກັບ ທີມຊາດກໍາປູເຈຍ ເວລາ 16:00 ໂມງ. ຄູ່ທີ 2 ທີມຊາດລາວ ພົບກັບ ທີມຊາດຟີລິບປິນ ເວລາ 19:00 ໂມງ.
  • ວັນທີ 31 ສິງຫາ 2015 ຄູ່ທີ 1 ທີມຊາດຕີມໍເລສເຕ ພົບກັບທີມຊາດກໍາປູເຈຍ ເວລາ 16:00 ໂມງ. ຄູ່ທີ 2 ທີມຊາດ ມຽນມາ ພົບກັບ ທີມຊາດຫວຽດນາມ ເວລາ 19:00 ໂມງ ວັນທີ 2 ກັນຍາ 2015 ເປັນຮອບ 4 ທີມສຸດທ້າຍ ແລະ ຮອບຊີງຊະນະເລີດ ແມ່ນຈະໄດ້ຈັດຂຶ້ນໃນວັນທີ 04 ກັນຍາ 2015.

ສ່ວນມວນຊົນທີ່ຈະເຂົ້າຮ່ວມຊົມ ຮ່ວມເຊຍ ການແຂ່ງຂັນກີລາບານເຕະຊິງແຊັມອາຊຽນ ຮຸ່ນອາຍຸບໍ່ເກີນ 19 ປີ ໃນຄັ້ງນີ້ແມ່ນສາມາດຊື້ປີ້ຜ່ານປະຕູໃນລາຄາ 10.000 ກີບຕໍ່ນຶ່ງບ່ອນນັ່ງ ທີ່ສະໜາມກີລາແຫ່ງຊາດ ຫຼັກ 16 ເລີ່ມແຕ່ເວລານີ້ເປັນຕົ້ນໄປ.

.............................................................................................................................................................................................................................................