ສປປ ລາວ ໄດ້ຈັດງານແລ່ນສົ່ງຕໍ່ໄມ້ເພື່ອສະໜັບສະໜູນງານມະຫະກຳຊີເກມ ຄັ້ງທີ 29 ທີ່ປະເທດມາເລເຊຍ

ສປປ ລາວສະໜັບສະໜູນງານຊີເກມ ຄັ້ງທີ 29 ທີ່ມາເລເຊຍ
ວັນທີ 18 ມີນາ 2017 ທີ່ເດີ່ນພະທາດຫລວງ ໄດ້ຈັດງານແລ່ນສົ່ງຕໍ່ໄມ້ (Baton Run) ເພື່ອສະໜັບສະໜູນງານມະຫະກຳຊີເກມ ຄັ້ງທີ 29 ທີ່ຈະຈັດຂຶ້ນຢູ່ນະຄອນກົວລາລຳເປີ ປະເທດມາເລເຊຍ ໃນລະຫວ່າງວັນທີ 19-31 ສິງຫາ 2017 ນີ້ ໂດຍເຂົ້າຮ່ວມຂອງ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ດາຕຸກ ສາຣະວະນັນ ຮອງລັດຖະມົນຕີກະຊວງຊ່າວໜຸ່ມ ແລະ ກິລາ ແຫ່ງປະເທດມາເລເຊຍ ພ້ອມດ້ວຍນັກກິລາ ແລະ ພາກສ່ວນກ່ຽວຂ້ອງເຂົ້າຮ່ວມ. 
ທ່ານ ນາງ ແສງເດືອນ ຫລ້າຈັນທະບູນ ໄດ້ໃຫ້ຮູ້ວ່າ: ການແລ່ນສົ່ງຕໍ່ໄມ້ໃນຄັ້ງນີ້ ແມ່ນຈັດຂຶ້ນເພື່ອເປັນການແລ່ນແທນໃນການແລ່ນທວນໄຟມະຫະກຳກິລາຊີເກມ ແລະ ເປັນການສະໜັບສະໜູນງານມະຫະກຳກິລາຊີເກມ ຄັ້ງທີ 29 ພ້ອມທັງໄດ້ໂຄສະນາເຜີຍແຜ່ໃຫ້ປະຊາຊົນ, ມວນຊົນໄດ້ຮັບຮູ້ເຖິງງານຊີເກມທີ່ຈະຈັດຂຶ້ນໃນໄວໆນີ້ ແລະ ເປັນກິດຈະກຳກິລາເພື່ອຜູກແໜ້ນຄວາມສາມັກຄີ ຂອງປະຊາຊົນບັນດາປະເທດອາຊຽນ ໃຫ້ມີຄວາມເຂົ້າໃຈ ເຊິ່ງກັນ ແລະ ກັນ, ເປັນການຮ່ວມມື ແລະ ການພົວພັນທີ່ດີຂອງຊາດ ສະມາຊິກອາຊຽນດ້ວຍກັນ, ພ້ອມທັງເປັນການກະຕຸ້ນໃຫ້ນັກກິລາ ແລະ ການນຳກິລາຂອງແຕ່ລະປະເທດໄດ້ມີການກະກຽມການເຂົ້າຮ່ວມຊີເກມ ຄັ້ງທີ 29 ນີ້ ໃຫ້ໄດ້ຮັບໝາກຜົນທີ່ດີ. 
ຂະບວນການແລ່ນສົ່ງຕໍ່ໄມ້ ແມ່ນເລີ່ມຈາກເດີ່ນພະທາດຫລວງ ສົ່ງຕໍ່ໄມ້ໃຫ້ ຂະບວນຢູ່ປະຕູໄຊ, ຫລັງຈາກນັ້ນຂະບວນຢູ່ປະຕູໄຊ ສົ່ງຕໍ່ໄມ້ໃຫ້ ຂະບວນຢູ່ຫໍວັດທະນະທຳແຫ່ງຊາດ ຈົນຮອດສວນກິລາເຈົ້າອານຸວົງ, ຫລັງຈາກນັ້ນ ທ່ານລັດຖະມົນຕີກະຊວງສຶກສາທິການ ແລະ ກິລາ ຂອງລາວ ສົ່ງຕໍ່ໄມ້ ໃຫ້ກັບ ທ່ານ ຮອງລັດຖະມົນຕີກະຊວງຊ່າວໜຸ່ມ ແລະ ກິລາ ແຫ່ງປະເທດມາເລເຊຍ.

ທີ່ມາ: ສຳນັກຂ່າວປະເທດລາວ