ສປປ ລາວສົ່ງອອກສິນຄ້າໄປຈີນບັນລຸ 1 ຕື້ກວ່າໂດລາໃນປີ 2016

ຂປລ. ກະຊວງອຸດສາຫະກໍາ ແລະ ການຄ້າລາວເປີດເຜີຍວ່າການຮ່ວມມືໃນຂະແໜງການຄ້າ ແລະ ການລົງທຶນລະຫວ່າງ ສປປ ລາວ-ສປ ຈີນ ຍັງສືບຕໍ່ຮັກສາການຂະຫຍາຍຕົວຢ່າງຕໍ່ເນື່ອງໂດຍຢັ້ງຢືນຈາການຈັດອັນດັບຂອງຜູ້ລົງທຶນຕ່າງປະເທດໃນ ສປປ ລາວ ພົບວ່າ ສປ ຈີນເປັນອັນດັບທີ 1 ຂະນະທີ່ ການຄ້າສອງຝ່າຍລາວ-ຈີນໃນປີ 2016 ບັນລຸ 2,34 ຕື້ໂດລາສະຫະລັດ ໃນນັ້ນມູນຄ່າສິນຄ້າລາວສົ່ງອອກໄປຈີນ 1,35 ຕື້ໂດລາສະຫະລັດ. 
ຍ້ອນຜົນການຮ່ວມມືສອງຝ່າຍນັ້ນ, ຄະນະກໍາມາທິການຮ່ວມມືລາວ-ຈີນໄດ້ຈັດກອງປະຊຸມສະຫລຸບຕີລາຄາການຈັດຕັ້ງປະຕິບັດວຽກງານການຮ່ວມດ້ານເສດຖະກິດ-ເຕັກນິກໃນວັນທີ 6 ກໍລະກົດ 2017 ຢູ່ນະຄອນຫລວງວຽງຈັນເພື່ອປຶກສາຫາລື ແລະ ສະເໜີທິດທາງແຜນການໃນຕໍ່ໜ້າ ໂດຍການເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານຄະນະກໍາມາທິການຮ່ວມມືລາວ-ຈີນ ມີພາກສ່ວນກ່ຽວຂ້ອງຕ່າງໆທັງສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ໄດ້ກ່າວວ່າ: ການຈັດກອງປະຊຸມໃນຄັ້ງນີ້ ບັນດາຜູ້ເຂົ້າຮ່ວມຈະໄດ້ປະກອບຄໍາຄິດຄໍາເຫັນຫລາຍບັນຫາເຂົ້າໃນການຄຸ້ມຄອງໂຄງການຊ່ວຍເຫລືອ, ໂຄງການລົງທຶນ-ການຄ້າ ພ້ອມທັງຮັບຟັງການສະເໜີບັນດາໂຄງການຍຸດທະສາດຮ່ວມມືລາວ-ຈີນແຕ່ນີ້ຮອດ 2020 ພ້ອມກັນນັ້ນຍັງໄດ້ຮັບຮູ້, ເຂົ້າໃຈຕໍ່ກັບພາລະບົດບາດຂອງຄະນະກໍາມາທິການຮ່ວມມືລາວ-ຈີນ ໃຫ້ເລິກເຊິ່ງກ່ວາເກົ່າ ທັງກໍາໄດ້ລັກສະນະຈຸດພິເສດ, ຂັ້ນຕອນ, ໂຄງການຊ່ວຍເຫລືອຈາກ ສປ ຈີນ ໃຫ້ດີຂຶ້ນກວ່າເກົ່າເພື່ອແນໃສ່ປະກອບສ່ວນເສີມຂະຫຍາຍການຮ່ວມມືພົວພັນດ້ານເສດຖະກິດ-ການຄ້າ ແລະ ເຕັກນິກຂອງລາວ-ຈີນ ໃຫ້ເຕີບໃຫຍ່ຂະຫຍາຍຕົວ ແລະ ມີປະສິດທິຜົນນັບມື້ນັບສູງຂຶ້ນ. 
ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ຍັງກ່າວຕື່ມອີກວ່າ: ຕະຫລອດໄລຍະໜຶ່ງປິຜ່ານມາໂດຍພາຍໃຕ້ການນໍາພາຂອງພັກ ແລະ ລັດຖະບານໂດຍມີການຮ່ວມມືຈາກຫລາຍພາກສ່ວນທັງສູນກາງ ແລະ ທ້ອງຖິ່ນ ໄດ້ມີການປະສານງານຢ່າງສະໜິດແໜ້ນກັບຝ່າຍຈີນ, ຄະນະກໍາມາທິການຮ່ວມມືລາວ-ຈີນ ໄດ້ເຄື່ອນໄຫວຈັດຕັ້ງການຮ່ວມມືຮອບດ້ານ ລະຫວ່າງລາວ-ຈີນ ໂດຍສະເພາະການຮ່ວມມືດ້ານເສດຖະກິດ-ເຕັກນິກໄດ້ສືບຕໍ່ຂະຫຍາຍຕົວ ແລະ ມີໝາກຜົນຫລາຍຂຶ້ນ, ສອດຄ່ອງກັບທິດນໍາ-ການນໍາຂັ້ນສູງຂອງສອງປະເທດໄດ້ເອກະພາບກັນ ນໍາເອົາຜົນປະໂຫຍດຕົວຈິງມາສູ່ປະຊາຊົນເຮົາຢ່າງຫລວງຫລາຍເປັນເຊັ່ນ: ວຽກງານການລົງທຶນ ສປ ຈີນ ຍັງສືບຕໍ່ຮັກສາການຂະຫຍາຍຕົວຢ່າງຕໍ່ເນື່ອງ, ມາຮອດທ້າຍປີ 2016 ມີໂຄງການລົງທຶນໃນກິດຈະການຕ່າງໆຢູ່ ສປປ ລາວ ຈໍານວນ 765 ໂຄງການ, ມີມູນຄ່າການລົງທຶນທັງໝົດປະມານ 7 ຕື້ກວ່າໂດລາສະຫະລັດ, ເຂົ້າໃນ 14 ຂະແໜງການຫລັກເປັນຕົ້ນແມ່ນຂະແໜງບໍ່ແຮ່, ຂະແໜງພະລັງງານໄຟຟ້າ, ຂະແໜງກະສິກໍາ, ບໍລິການ ແລະ ຂະແໜງການອື່ນໆ ໃນນີ້ ບໍລວມໂຄງການທາງລົດໄຟລາວ-ຈີນ ເຊິ່ງໄດ້ເຮັດໃຫ້ ສປ ຈີນ ເປັນຜູ້ລົງທຶນຕ່າງປະເທດອັນດັບໜື່ງຂອງ ສປປ ລາວ ໃນປີ 2016 ການຄ້າສອງຝ່າຍລາວ-ຈີນບັນລຸ 2,34 ຕື້ໂດລາສະຫະລັດ, ມູນຄ່າສິນຄ້າລາວສົ່ງອອກໄປຈີນ 1,35 ຕື້ໂດລາສະຫະລັດ, ສິນຄ້າຈີນເຂົ້າມາລາວ 990 ລ້ານໂດລາສະຫະລັດ, ອັດຕາເພີ່ມຂຶ້ນການສົ່ງອອກ-ນໍາເຂົ້າຜະລິດຕະພັນດ້ານກະສິກໍາເພີ່ມຂຶ້ນ 40%ໃນນັ້ນ ການສົ່ງອອກເຂົ້າສານໄປຈີນເພີ່ມຂຶ້ນ 19,4%, ເຊິ່ງເຮັດໃຫ້ ສປ ຈີນຍັງຄົງເປັນຄູ່ຮ່ວມການຄ້າໃຫຍ່ອັນດັບ 2 ຂອງ ສປປ ລາວ./

ຂໍ້ມູນຈາກ: ປະເທດລາວ Pathedlao