ສປປ ລາວພົບຂຸມຊັບໃຫຍ່ທີ່ສຸດມູນຄ່າ 100 ຕື້ໂດລາຢູ່ພາກໃຕ້ລາວ

ສະຫາຍ ດຣ ນາມ ວິຍະເກດ ເຂລາພັກແຂວງ, ເຈົ້າແຂວງອັດຕະປືໄດ້ເປີດເຜີຍຕໍ່ສື່ມວນຊົນໃນວັນທີ 21 ມັງກອນ 2016 ທີ່ຫໍປະຊຸມແຫ່ງຊາດ ລະຫວ່າງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ປະຊາຊົນປະຕິວັດລາວວ່າ: ໃນຊຸມປີ 1990 ຫາ ປີ 2000 ປະຊາຊົນພາຍໃນແຂວງອັດຕະປື 90% ແມ່ນດໍາລົງຊີວິດຢູ່ເຂດຊົນນະບົດຫ່າງໄກສອກຫລີກ ແລະ ອັດຕາຄວາມທຸກຍາກຂອງປະຊາຊົນກວມເອົາ 10,68% ແຕ່ແຂວງດັ່ງກ່າວມີຄວາມບົ່ມຊ້ອນດ້ານຊັບພະຍາກອນທໍາມະຊາດທີ່ແສນອຸດົມສົມບູນຫລາຍທີ່ສຸດ ຈົນຖືກຂະໜານນາມວ່າ(ອັດຕະປືປຶ້ງຂາຍຄໍາແລກໄກ່).
ປັດຈຸບັນ ແຂວງອັດຕະປື ກຳລັງໄດ້ຮັບການພັດທະນາ ຕາມທິດຊີ້ນຳຂອງພັກ ແລະ ລັດຖະບານໂດຍສະເພາະພາຍໃຕ້ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ຂອງພັກ, ຄະນະພັກແຂວງອັດຕະປື ໄດ້ວາງໂຄງການຫັນປ່ຽນໃໝ່ຕາມທິດ ຖືເອົາການສົ່ງເສີມການປູກ-ການລ້ຽງ, ເອົາການຜະລິດຕິດພັນກັບຕະຫລາດແຕ່ຫົວທີ ແລະ ຖືເອົາການກະສິກຳ ເປັນແຜນບູລິມະສິດຂອງແຂວງ ໃນການພັດທະນາໄລຍະໃໝ່ໂດຍຄັດເລືອກເປົ້າໝາຍຕົວແບບເຂດທີ່ມີເງື່ອນໄຂພຽງພໍ, ເໝາະສົມໃນການປູກ-ການລ້ຽງແລ້ວຈັດເປັນໂຄງການທົດລອງ, ສຸມພະນັກງານວິຊາການລົງຊີ້ນຳຕົວຈິງ ແລ້ວຖອດຖອນບົດຮຽນ ແລະ ຂະຫຍາຍໄປສູ່ເຂດອື່ນ ເຊິ່ງໃນເບື້ອງຕົ້ນແມ່ນການປູກມັນຕົ້ນທີ່ມີຕະຫລາດກັບທີ່, ປູກສາລີ, ປູກເຂົ້າແນວພັນໃໝ່, ປູກຫຍ້າ ເພື່ອລ້ຽງງົວ ໂດຍແມ່ນບໍລິສັດຮວ່າງແອງຢາລາຍ ຈະສະໜອງແນວພັນຫຍ້າ ແລະ ແນວພັນງົວໃຫ້. ພ້ອມທັງໃຫ້ຄົ້ນຄວ້າຫາສິນຄ້າປະເພດອື່ນໆຕື່ມ ເພື່ອສົ່ງເສີມໃຫ້ປະຊາຊົນ ສ້າງລາຍຮັບເພີ່ມ ໄປພ້ອມກັບການສົ່ງເສີມທ່າແຮງເສດຖະກິດອື່ນໆເຊັ່ນ: ຂະແໜງການບໍລິການ, ການທ່ອງທ່ຽວທຳມະຊາດ ແລະ ວັດທະນະທຳ, ການຂຸດຄົ້ນທ່າແຮງທາງທຳມະຊາດ ແລະ ອື່ນໆ.
ແນວໃດກໍດີ ແຂວງຂອງພວກເຮົາໄດ້ມີການຫັນປ່ຽນດ້ວຍໂສມໜ້າໃໝ່ ອັນພົ້ນເດັ່ນແມ່ນ ລັດຖະບານ ໄດ້ລົງທຶນຮ່ວມກັບ ສສ ຫວຽດນາມສ້າງເສັ້ນທາງ 18 ເບ ເຊື່ອມຕໍ່ອັດຕະປື ກັບ ສສ ຫວຽດນາມ ເຮັດໃຫ້ແຂວງອັດຕະປື ເປັນແຂວງເປີດ; ສົ່ງເສີມການລົງທຶນຂອງຕ່າງປະເທດເຂົ້າໃນການພັດທະນາກະສິກຳຂະໜາດໃຫຍ່ທີ່ທັນສະໄໝ ເຊັ່ນ: ການປູກຢາງພາລາຫລາຍ 10 ພັນເຮັກຕາ ດ້ວຍລະບົບນໍ້າຢອດ, ປູກປາມ ແລະ ອື່ນໆ.

ພິເສດນັ້ນ ທ່ານ ເຂລາເຈົ້າແຂວງອັດຕະປືຍັງໄດ້ແຈ້ງຂໍ້ມູນລາຍລະອຽດກັບນັກຂ່າວວ່າ: ພວກເຮົາໄດ້ຄົ້ນພົບບໍ່ແຮ່ປະເພດຫີນອອ່ນ ແລະ ອັນຍະມານີກວມເອົາເນື້ອທີ່ຫລາຍຮ້ອຍເຮັກຕາຢູ່ເຂດພູຜາປ່າດົງ ເຊິ່ງປະເມີນເບື້ອງປະມານ 7 ລ້ານໂຕນ ປັດຈຸບັນນີ້ ເຂດດັ່ງກ່າວຕ້ອງສະຫງວນໄວ້ກ່ອນ ຂະນະທີ່ ບໍລິສັດຈີນ ແລະ ຫວຽດນາມພວມຫລັງໄຫລເຂົ້າໄປທາບທາມ ແລະ ຢຶນຂໍ້ສະເໜີເພື່ອຂໍເປັນສ່ວນຮ່ວມໃນການລົງທຶນພາຍໃຕ້ເງື່ອນໄຂຕ່າງຝ່າຍຕ່າງມີຜົນ. ບໍ່ແຮ່ຖືກຄົ້ນພົບແຫ່ງນີ້ມີເນື້ອທີ່ຫລາຍຮ້ອຍເຮັກຕາ ຖ້າດໍາເນີນການຂຸດຄົ້ນຕົວຈິງຈະໃຊ້ເວລາຫລາຍກວ່າ 100 ປີ ສະນັ້ນ ຖ້າພວກເຮົາຄິດໄລ່ເບິ່ງດ້ານເສດຖະກິດແລ້ວປະເທດເຮົາຈະໄດ້ຮັບຜົນປະໂຫຍດບໍ່ຕໍ່າກວ່າ 100 ຕື້ໂດລາສະຫະລັດ. ຂະນະນີ້ພວກເຮົາວາງແຜນຈັດການບໍລິຫານ ແລະ ຄຸ້ມຄອງບໍ່ແຮ່ໃຫ້ເຂົ້າໃນລະບົບຢ່າງຖືກຕອ້ງ.

ພາບ-ຂ່າວ: ເກີດຂວັນໃຈ

Pathedlao Lao

 

ບົດຄວາມໃຫມ່ໆ