ສຄອ ຈັດງານແລກປ່ຽນຂໍ້ມູນງານຊິງລາງວັນທຸລະກິດດີເດັ່ນອາຊຽນ ແຫ່ງ ສປປ ລາວ

ວັນທີ 8 ພຶດສະພາ 2018, ສະພາການຄ້າ ແລະ ອຸດສາຫະກໍາ(ສຄອ) ແຫ່ງຊາດລາວ ຮ່ວມກັບ ສຄອ ແຂວງຈໍາປາສັກ ໄດ້ຈັດງານພົບປະ ແລະ ແລກປ່ຽນຂໍ້ມູນກ່ຽວກັບງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ປີ 2018 ໂດຍການສະໜັບສະໜຸນຂອງອົງການຮ່ວມມື ລາວ-ເຢຍລະມັນ ຫຼື ຈີໄອແຊັດ ປະຈໍາ ສປປ ລາວ.

ງານດັ່ງກ່າວຈັດຂຶ້ນຢູ່ໂຮງແຮມຈໍາປາສັກແກຣນ ເມືອງປາກເຊ ໂດຍການເຂົ້າຮ່ວມຂອງທ່ານ ທະນົງສິນ ກັນລະຍາ ຮອງປະທານ ສຄອ ແຫ່ງຊາດລາວ, ທ່ານ ນາງ ແກ່ນຈັນ ບຸດດາວົງ ຮອງປະທານ ສຄອ ແຂວງຈໍາປາສັກ, ທ່ານ ເບັນຈາມິນ ບາຣຸດກີ ຕາງໜ້າອົງການ ຈີໄອແຊັດ ປະຈໍາ ສປປ ລາວ. ມີຄະນະນໍາຂອງ ສຄອ ແຂວງ, ນັກທຸລະກິດ, ຜູ້ປະກອບການ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ພາຍໃນງານ ໄດ້ນໍາສະເໜີກ່ຽວກັບງານຊິງລາງວັນທຸລະກິດດີເດັ່ນ ແຫ່ງ ສປປ ລາວ ປີ 2018 ເຊິ່ງມີ 3 ລາງວັນ ຄື: ລາງວັນຂະແໜງການບູລິມະສິດດີເດັ່ນ, ລາງວັນທຸລະກິດຂະໜາດກາງ-ຂະໜາດນ້ອຍ ຫຼື ເອສເອັມອີ ດີເດັ່ນ ແລະ ລາງວັນພິເສດ ປະກອບມີ ຜູ້ປະກອບການໜຸ່ມດີເດັ່ນ, ຜູ້ປະກອບການຍິງດີເດັ່ນ, ເພື່ອນມິດຂອງ ສປປ ລາວ ແລະ ທຸລະກິດລິເລີ່ມດີເດັ່ນ. ພ້ອມນີ້ ກໍ່ສະເໜີລາຍລະອຽດໃນການສະໝັກ ນັບແຕ່ເງື່ອນໄຂ ແລະ ຂັ້ນຕອນການສະໝັກ, ການຄັດເລືອກນັກທຸລະກິດອາຊຽນດີເດັ່ນແຫ່ງ ສປປ ລາວ ແລະ ກໍານົດເວລາໃນການເປີດ-ປິດ ການຮັບສະໝັກນໍາອີກ.

ຈາກນັ້ນ ກໍ່ມີການສົນທະນາແລກປ່ຽນບົດຮຽນຈາກຜູ້ທີ່ໄດ້ຮັບລາງວັນຊະນະເລີດ ໃນການຄັດເລືອກນັກທຸລະກິດອາຊຽນດີເດັ່ນ ແຫ່ງ ສປປ ລາວ ໃນປີ 2017 ທີ່ຜ່ານມາ ເພື່ອເປັນບົດຮຽນໃຫ້ແກ່ນັກທຸລະກິດທີ່ສະໝັກເຂົ້າຄັດເລືອກໃນປີ 2018.

 

ຂ່າວ-ພາບ: ທູນທອງໃຈ (ໜັງສືພິມຈຳປາໃໝ່)