ວ່າຈັ່ງໃດເລດສ໌ເຕີ້..ຮິດດິ້ງສົນຄຸມທັບຊົ່ວຄາວ

 

ສື່ຜູ້ດີເຜີຍ ກຸດສ໌ ຮິດດິ້ງ ອະດີດຜູ້ຈັດການທີມ ເຊວຊີ ສົນໃຈຮັບງານຄຸມບັງຫຽນ ເລດສ໌ເຕີ້ ຊີຕີ້ ແທນ ຄລາວດິໂອ ຣານິເອຣີ້ ນາຍໃຫຍ່ຄົນອີຕາລີທີ່ປົດອອກຈາກຕຳແໜ່ງ ແຕ່ຕ້ອງການເຊັນສັນຍາຊົ່ວຄາວຈົນຈົບລະດູການນີ້ເທົ່ານັ້ນ.

 

ກຸດສ໌ ຮິດດິ້ງ ກຸນຊືຄົນໂຮນລັງພ້ອມພິຈາລະນາຂໍ້ສະເໜີຮັບງານຄຸມ ເລດສ໌ເຕີ້ ຊີຕີ້ ສະໂມສອນດັງຂອງ ພຣີເມຍລີກ ແທນທີ່ ຄລາວດິໂອ ຣານິເອຣີ້ ທີ່ຖືກປົດ ແຕ່ຕ້ອງການຄຸມທັບຊົ່ວຄາວຈົບລະດູການນີ້ເທົ່ານັ້ນ ຈາກການລາຍງານຂອງ ເດິ ທາມ ສື່ຂອງເມືອງຜູ້ດີເມື່ອວັນຈັນທີ່ຜ່ານມາ.

 

“ຈິ້ງຈອກເງິນ” ກຳລັງຊອກຫາຜູ້ຈັດການທີມຄົນໃໝ່ເຂົ້າມາເຮັດໜ້າທີ່ແທນ ຣານິເອຣີ້ ທີ່ຖືກເດັ້ງເມື່ອອາທິດກ່ອນ ຫຼັງຈາກທີ່ມີຜົນງານບໍ່ດີຈົນທີມຕົກໄປຢູ່ໃນໂຊນແດງ ຂະນະທີ່ປັດຈຸບັນຜູ້ຊ່ວຍກຸນຊືຂອງເຂົາຖືກດັນຂຶ້ນມາຄຸມທັບຊົ່ວຄາວໃນເກມທີ່ພົບກັບ ລີເວີພູ ເມື່ອຄືນທີ່ຜ່ານມາ.

 

ລາຍງານລະບຸວ່າ ຮິດດິ້ງ ບໍ່ຕ້ອງການຫວນກັບມາຮັບງານຄຸມທັບແບບຈິງຈັງເຕັມເວລາ ແຕ່ພ້ອມເຂົ້າມາກູ້ສະຖານະການຊົ່ວຄາວ ຫຼື ຈົນຈົບລະດູການນີ້ເທົ່ານັ້ນຄືກັນກັບຕອນທີ່ເຂົ້າມາເຮັດໜ້າທີ່ກຸນຊືຮັກສາການໃຫ້ ເຊວຊີ 2 ເທື່ອຕອນປົດ ຫຼຸຍ ເຟລິເປ້ ສະໂຄລາຣີ້ ເມື່ອປີ 2009 ແລະ ໂຊເຊ ມູຣິນໂຢ ໃນປີ 2016.

 

ຢ່າງໃດກໍຕາມ ເດິ ທາມ ຕີຂ່າວເພີ່ມຕື່ມອີກວ່າບັນດານັກເຕະຂອງທີມຢາກໄດ້ ໄນເຈວ ເພຍສັນ ຜູ້ຈັດການທີມທີ່ເຄີຍພາສະໂມສອນເລື່ອນຊັ້ນຂຶ້ນສູ່ ພຣີເມຍລີກ ກັບມາຮ່ວມງານກັນອີກເທື່ອຫຼາຍກວ່າ ແຕ່ແຫຼ່ງຂ່າວໃກ້ຊິດເຜີຍວ່າ ເພຍສັນ ທີ່ວ່າງງານນັບຕັ້ງແຕ່ແຍກທາງກັບ ດາບີ້ ເຄົາຕີ້ ເມື່ອເດືອນຕຸລາທີ່ຜ່ານມາຍັງບໍ່ໄດ້ຮັບຂໍ້ສະເໜີຈາກບອດບໍລິຫານຂອງ “ເດິ ຟັອກສ໌” ແຕ່ຢ່າງໃດ.