ວ່າຈັງໃດ!!ງູໃຫຍ່ທຸ່ມ 58 ລ້ານປອນລ່າແວຣັດຕິ

 

ສື່ຕີຂ່າວ ອິນເຕີ ມິລານ ກຽມຈົກເງິນກ້ອນໃຫຍ່ປະມານ 58 ລ້ານປອນເພື່ອດຶງໂຕ ມາໂກ ແວຣັດຕິ ກອງກາງຂອງ ປາຣີ ແຊັງ-ແຊັກແມັງ ຫຼັງຈາກທີ່ນັກເຕະມີບັນຫາໂຕ້ຖຽງຢ່າງໜັກກັບ ອູໄນ ເອເມຣີ ນາຍໃຫຍ່ຂອງ ເປເອັດເຊ ເມື່ອອາທິດທີ່ຜ່ານມາ.

 

“ທັອກສະປອດ” ສື່ກິລາຂອງອັງກິດລາຍງານຂ່າວວ່າ “ງູໃຫຍ່” ອິນເຕີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ອີຕາລີພ້ອມຍື່ນຂໍ້ສະເໜີຈຳນວນມະຫາສານເຖິງ 58 ລ້ານປອນຫວັງທີ່ຈະດຶງໂຕ ມາໂກ ແວຣັດຕິ ຫ້ອງເຄື່ອງຂອງ ປາຣີ ແຊັງ-ແຊັກແມັງ ທີມອະພິມະຫາເສດຖີຂອງ ລີແອັງ ຝຣັ່ງມາເສີມທັບໃນແດນກາງໃຫ້ໄດ້.

 

ກ່ອນໜ້ານີ້ນັກເຕະຖືກຈັບພາບໄດ້ວ່າມີບັນຫາໂຕ້ຖຽງກັບ ອູໄນ ເອເມຣີ ນາຍໃຫຍ່ຂອງ ເປເອັດເຊ ຢ່າງຮຸນແຮງເນື່ອງຈາກບໍ່ພໍໃຈທີ່ຖືກປ່ຽນໂຕອອກໃນເກມລີກທີ່ສະເໝີກັບ ໂອລິມປິກ ມາກແຊ 0-0 ເມື່ອວັນອາທິດທີ່ຜ່ານມາ.

 

ຈາກເຫດການດັ່ງກ່າວເຮັດໃຫ້ມີຂ່າວໜາຫູວ່າມີຫຼາຍທີມເລັງຍື່ນຂໍ້ສະເໜີຢ່າງຈິງຈັງເພື່ອລ່າໂຕ ແວຣັດຕິ ມາຮ່ວມທີມ ຂະນະທີ່ ຢູເວັນຕຸດ, ອາເຊນອນ ແລະ ເຊວຊີ ກຳລັງຊັ່ງຊາເລື່ອງດຶງນັກເຕະຢູ່ ຫຼ້າສຸດ “ທັອກສະປອດ” ຕີຂ່າວວ່າ “ເນຣັດຊູຣີ” ເລັງຍາດໂຕນັກເຕະກັບທີມອື່ນໂດຍການທຸ່ມເງິນ 58 ລ້ານປອນເພື່ອດຶງນັກເຕະມາເສີມທັບ.

 

ທັງນີ້ ອິນເຕີ ມິລານ ຫາກໍໄດ້ເມັດເງິນຈຳນວນມະຫາສານເຂົ້າທີມຫຼັງຈາກທີ່ “ຊູໜິງ ກຣຸບ” ກຸ່ມທຶນຈາກຈີນເຂົ້າມາເທັກໂອເວີທີມເມື່ອຊ່ວງຊຳເມີທີ່ຜ່ານມາ ແລະ ພວກເຂົາອາດຈະຊື້ນັກເຕະຄົນໃໝ່ໃນຕົ້ນປີໜ້າ.