ວິທີລ້າງປາມຶກໃຫ້ສະອາດ ແລະ ບໍ່ມີກິ່ນຄາວ

   ສັດທະເລສ່ວນໃຫຍ່ທີ່ຄົນເຮົາມັກນຳໄປປະກອບອາຫານ ຄົງຈະຂາດບໍ່ໄດ້ແມ່ນ ກຸ້ງ ປູ ປາມຶກ ສຳລັບປາມຶກນັ້ນໃຊ້ເຮັດອາຫນໄດ້ຫຼາກຫຼາຍເມນູ ບໍ່ວ່າຈະເັປນແກງຈືດ ປາມຶກຊຸບແປ້ງ ຕົ້ມຍຳປາມຶກ ແລະ ອື່ນໆອີກຫຼາຍຢ່າງ ປາມຶກຍັງມີຄຸນປະໂຫຍດຕໍ່ຮ່າງກາຍ ແລະ ໃຫ້ຄຸນຄ່າທາງອາຫານສູງ.

   ກະແສສັງຄົມສ່ວນຫຼາຍເຊື່ອວ່າປາມຶກມີຄໍເລັສເຕີຣີສູງເລີຍບໍ່ກ້າກິນ (ເຊິ່ງກໍ່ສູງແທ້ໆ) ແຕ່ປາມຶກນັ້ນມີສານໂອເມກ້າ 3 ຈຳນວນຫຼວງຫຼາຍເຊິ່ງສາມາດຊ່ວຍຫຼຸດຄໍເລັສເຕີຣໍໄດ້ເຊັ່ນດຽວກັນ ມີໂປຣຕີນ ແລະ ສານໄອໂອດີນປ້ອງກັນໂລກຄໍເອີມ ອີກທັງປາມຶກຍັງຊ່ວຍບຳລຸງຜິວໜັງເຮັດໃຫ້ເຄັ່ງຕຶງບໍ່ແຫ່ວຍານ ປາມຶກທີ່ນຳມາເຮັດອາຫານເປັນປາມຶກທີ່ສົດໃໝ່ ຖ້າປາມຶກບໍ່ສົດເຮັດໃຫ້ອາຫານບໍ່ແຊບ ແລະ ມີກິ່ນຄາວ ມື້ນີ້ເຮົາມີວິທິລ້າງປາມຶກໃຫ້ສະອາດກ່ອນນຳມາປະກອບເປັນອາຫານ.

ວິທີທຳຄວາມສະອາດປາມຶກ

   ກ່ອນນຳມາປະກອບເປັນອາຫານສິ່ງທຳອິດຄືການລ້າງໃຫ້ສະອາດ ວິທີເຮັດຄວາມສະອາດປາມຶກເລີ່ມຈາກການດຶງໄສ້ຂອງປາມຶກອອກມາ ຜ່າກາງລຳໂຕ ຈັບທາງຂ້າງປາມຶກເບິ່ງດ້ານທີ່ແຂງໆບ່ອນນັ້ນຈະແມ່ນກະດູກສັນຫຼັງ ນຳກະດູກສັນຫຼັງອອກມາ ລອກໜັງອອກເພື່ອໃຫ້ໂຕປາມຶກຂາວ ໃຊ້ມີດປາຍແຫຼມໆຕັດສ່ວນຂອງຕາ (ລະວັງ!!ປາມຶກເປື້ອນສົກກະປົກ) ຖ້າບໍ່ຢາກໃຫ້ປາມຶກເປື້ອນຫຼີກລ່ຽງໂດຍການນຳໄປແຊ່ແຂງ 15-20 ນາທີ ຈາກນັ້ນລ້າງດ້ວຍນ້ຳສະອາດ (ລ້າງຫຼາຍໆຈະໄດ້ບໍ່ມີກິ່ນຄາວ) ເສຍເວລາໜ້ອຍໜຶ່ງໃນການເຮັດຄວາມສະອາດເພື່ອແລກກັບຄວາມສົດ ແລະ ລົດຊາດທີ່ແຊບ ແລະ ບໍ່ຄາວ ອາດຈະລ້າງດ້ວຍນ້ຳເກືອເພື່ອກຳຈັດກິ່ນຄາວໃຫ້ໝົດໄດ້ໄວຂຶ້ນ.

   ແນ່ນອນວ່າສິ່ງໃດໃຫ້ຄຸນປະໂຫຍດກໍໃຫ້ໂທດເຊັ່ນດຽວກັນ ຄວນບໍລິໂພກປາມຶກໃນປະລິມານບໍ່ຫຼາຍຈົນເກີນໄປ ເພາະສ່ຽງຕໍ່ສານ ແຄັດມ້ຽມ ໂລຫະໜັກ ແລະ ສານຟໍມາລີນທີ່ຕົກຄ້າງ ການບໍລິໂພກຫຼາຍຈົນເກີນໄປເຮັດໃຫ້ມີອັນຕະລາຍຕໍ່ຮ່າງກາຍໄດ້ ຖ້າເຮົານຳມາເຮັດຄວາມສະອາດ ບໍລິໂພກນປະລິມານທີ່ພໍດີ ເມນູປາມຶກກໍຈະເປັນອາຫານທະເລຊັ້ນດີໂດຍທີ່ບໍ່ຕ້ອງກັງວົນເລື່ອງສານພິດ ແລະ ຄໍເລັສເຕີຣໍສູງ ລອງນຳວິທີເຮັດຄວາມສະອາດແບບນີ້ໄປໃຊ້ກັນເບິ່ງເດີ້^^.