ວາງສີລາລຶກກໍ່ສ້າງອາຄານໃຫ້ໂຮງໝໍບໍ່ແກ້ວ

ພິທີວາງສີລາລຶກການກໍ່ສ້າງອາຄານຄົນເຈັບພາຍໃນແລະອາຄານແມ່ແລະເດັກໂຮງໝໍແຂວງບໍ່ແກ້ວ ໄດ້ຈັດຂື້ນເມື່ອວັນທີ 27 ຕຸລາ ໂດຍການເປັນປະທານກິຕິມະສັກຮ່ວມລະຫວ່າງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແລະ ທ່ານ ດອນ ປຣະມັດວິໄນ ລັດຖະມົນຕີກະຊວງການຕ່າງປະເທດ ແຫ່ງລາຊະອານາຈັກໄທ ຊື່ງມີທ່ານລັດຖະມົນຕີວ່າການກະຊວງສາທາລະນະສຸກລາວ,ທ່ານ ເຈົ້າແຂວງ ແລະ ຮອງເຈົ້າແຂວງບໍ່ແກ້ວ ພ້ອມດ້ວຍພະນັກງານທີ່ກ່ຽວຂ້ອງຂອງລາວແລະໄທເຂົ້າຮ່ວມ. 
ໂຄງການກໍ່ສ້າງດັ່ງກ່າວແມ່ນໄດ້ຮັບການຊ່ວຍເຫຼືອລ້າຈາກລັດຖະບານໄທ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງການພົວພັນການທູດລາວ-ໄທ ຄົບຮອບ 65 ປີ ຊື່ງມີມູນຄ່າທັງໝົດ 40.000.00ບາດ ຫຼືປະມານ9 ຕື້ກວ່າກີບ ລວມມີການກໍ່ສ້າງອາຄານຄົນເຈັບພາຍໃນແລະແມ່ ແລະເດັກ, ອຸປະກອນການແພດ, ຢາ ແລະ ການພັດທະນາບຸກຄະລາກອນໂຄງການດັ່ງກ່າວໄດ້ເລີ່ມລົງມືການກໍ່ສ້າງໃນວັນທີ 19 ມີຖຸນາ 2015 ແລະຄາດວ່າຈະສຳເລັດໃນເດືອນກັນຍາ 2016 ຊື່ງຈະປະກອບສ່ວນອັນສຳຄັນເຂົ້າໃນການພັດທະນາພື້ນຖານໂຄງລ່າງດ້ານສາທາລະນະສຸກ ແລະອຳນວຍຄວາມສະດວກໃຫ້ແກ່ການດຳລົງຊີວິດຂອງປະຊາຊົນແຂວງບໍ່ແກ້ວ ແລະບັນດາແຂວງໃກ້ຄຽງ.

ໃນໂອກາດນີ້ທ່ານ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດລາວແລະທ່ານລັດຖະມົນຕີວ່າການກະຊວງການຕ່າງປະເທດໄທ ໄດ້ຮ່ວມກັນປູກຕົ້ນໄມ້ໄວ້ເປັນທີ່ລະນຶກໃຫ້ແກ່ໂຮງໝໍແຂວງບໍ່ແກ້ວ ແລະ ເປັນສັນຍາລັກແຫ່ງການຮ່ວມມືລະຫວ່າງສອງປະເທດລາວແລະໄທ .