ລົງວິໄນພະນັກງານລັດຈຳນວນ 6 ຄົນ ຂໍ້ຫາອຳນວຍຄວາມສະດວກ ເຄື່ອນຍ້າຍໄມ້ອອກນອກປະເທດໂດຍບໍ່ຖືກຕ້ອງ

ອີງຕາມການລາຍງານຂອງ ນສພ ລາວພັດທະນາວ່າ: ຫົວໜ້າພະແນກກວດກາລັດ ແຂວງສະຫວັນນະເຂດ ໃຫ້ຮູ້ວ່າ ໄລຍະ 2 ປີມານີ້ໄດ້ພົບເຫັນການລະເມີດລະບຽບກ່ຽວກັບການຄຸ້ມຄອງ,ເຄື່ອນຍ້າຍໄມ້ ແລະ ທຸລະກິດໄມ້ຈຳນວນຫຼາຍກໍລະນີ ໄດ້ດຳເນີນຄະດີຜູ້ເຮັດຜິດດັ່ງກ່າວ ຊື່ງເປັນພະນັກງານລັດ 6 ຄົນທີ່ມີສ່ວນຮູ້ເຫັນໃນການເຄື່ອນຍ້າຍໄມ້ອອກນອກປະເທດຫຼາຍກວ່າ 16 ແມັດກ້ອນ,ໂດຍການປອມແປງເອກະສານໃຫ້ນັກທຸລະກິດນຳເອົາຜະລິດຕະພັນໄມ້ຂື້ນລົດໄປວາງສະແດງຢູ່ນະຄອນດານັງ ສສ ຫວຽດນາມ ແລະ ໄດ້ປະຕິບັດວິໄນຕາມມາດຕາ 73 ຂັ້ນ 3 ຂອງກົດໝາຍພະນັກງານລັດຖະກອນ ເຊີ່ງປະກອບມີພະນັກງານພະແນກອຸດສາຫະກຳ ແລະ ການຄ້າແຂວງ  3 ຄົນ,ພະນັກງານຊັບສິນລັດ 2 ຄົນ,ພະແນກກະສິກຳ ແລະ ປ່າໄມ້ແຂວງ 1 ຄົນ.

ພະແນກດັ່ງກ່າວ ໃຫ້ຮູ້ອີກວ່າ ໃນໄລຍະຜ່ານມາລັດຖະບານໄດ້ເຂັ້ມງວດຈັດຕັ້ງປະຕິບັດຄຳສັ່ງເລກທີ 15/ນຍ.ແຕ່ມີຜູ້ສວຍໃຊ້ໂອກາດເຄື່ອນຍ້າຍໄມ້ອອກນອກປະເທດໂດຍບໍ່ໄດ້ຮັບອະນຸຍາດ ແລະ ຜ່ານມາແຂວງໄດ້ດຳເນີນການກວດກາ ແລະ ນຳເອົາຜູ້ກະທຳຜິດ 210 ຄົນມາດຳເນີນຄະດີ ພ້ອມສາມາດຢຶດໄມ້ໄດ້ 3 ພັນກວ່າແມັດກ້ອນ ແລະ 45 ພັນກິໂລ ເປັນເງີນ 3,29 ຕື້ກີບ ແລະ ອີກຈຳນວນໜື່ງຍັງສຶບຕໍ່ດຳເນີນຄະດີຕາມລະບຽບກົດໝາຍ.

ເຈົ້າໜ້າທີ່ກອງກວດກາປ່າໄມ້ແຂວງສະຫວັນນະເຂດ ລາຍງານໃຫ້ຮູ້ວ່າ ໃນປີຜ່ານມາ ໄດ້ກວດພົບເຫັນການລະເມີດເຄື່ອນຍ້າຍໄມ້ ແລະ ລ່າສັດນ້ຳສັດປ່າ 279 ກໍລະນີ,ມີຜູ້ກະທຳຜິດ 204 ຄົນ,ໃນຂະນະດຽວກັນ ເຈົ້າໜ້າທີ່ຍັງສາມາດຍຶດໄມ້ ແລະ ຜະລິດຕະພັນໄມ້ໄດ້ຫຼາຍກວ່າ 3 ພັນແມັດກ້ອນ ພ້ອມທັງເຄື່ອງປ່າຂອງດົງປະເພດຕ່າງໆ 1 ແສນກວ່າໂຕນ.

ເຈົ້າໜ້າທີ່ດ່າສາກົນສະຫວັນ-ລາວບາວ ໃນປີຜ່ານມາ ສາມາດກວດຍຶດໄມ້ບໍ່ມີເອກະສານ 43,85 ແມັດກ້ອນແລະ ແກ້ໄຂຄະດີໄດ້ 29 ເລື່ອງ, ສ່ວນໃຫຍ່ແມ່ນການຊຸກເຊື່ອງໄມ້ໃນລົດໂດຍສານ ແລະຂົນສົ່ງຫີນກາວ.

ຂໍ້ມູນຈາກ: ລາວພັດທະນາ