ລືສະໜັ່ນທົ່ວໂລກ! 2ນາທີມົງກຸດຫຼຸດຫົວ ມິສໂຄລົມເບຍເກືອບລົ້ມທັງຢືນ

ຜ່ານພົ້ນກັນໄປຮຽບຮ້ອຍສຳລັບເວທີນາງງາມລະດັບໂລກກັບ ງານປະກວດ Miss Universe 2015 ທີ່ຈັດຂຶ້ນທີ  Planet Hollywood Resort & Casino ລັດລາສເວກັສ ສະຫະລັດອາເມຣິກາ ໂດຍມີສາວງາມເຂົ້າຮ່ວມທັງໝົດ 80ປະເທດ ໃນຄ່ຳຄືນຂອງວັນທີ 20ທັນວາທີ່ຜ່ານມາ

ແຕ່ກະແສຄວາມຮືຮາຍັງບໍ່ຈົບສິ້ນລົງງ່າຍໆ ເມື່ອເທິງເວທີເຫຼືອພຽງສອງສາວງາມຈາກປະເທດຟິລິປິນ ແລະປະເທດໂຄລົມເບຍທີ່ຢືນຈັບມືກັນລຸ້ນມຸງກຸດອັນຊົງກຽດ ພາຍຫຼັງພິທິກອນອອກມາປະກາດວ່າຜູ້ຜູ້ທີ່ໄດ້ລາງວັນຊະນະເລີດໃນງານປະກວດມິສຢູນິເວີສ ປະຈຳປີ 2015 ໄດ້ແກ່ສາວ Ariadna Gutierrez ຈາກປະເທດໂຄລົມເບຍ ເຊິ່ງຖືກສວມມົງກຸດເປັນຄົນທີສອງຕິດຕໍ່ກັນຈາກປີທີ່ຜ່ານມາ ແຕ່ຄວາມປາບປຶ້ມປິຕິໃຈທີ່ສຸດໃນຊີວິດກໍຈົບລົງພຽງ 2ນາທີ ເນື່ອງຈາກພິທີກອນໄດ້ຂຶ້ນມາຊີ້ແຈງອີກຄັ້ງວ່າຕົນປະກາດລາຍຊື່ຜິດພາດ ຄວາມຈິງແລ້ວຜູ້ທີ່ໄດ້ຕຳແໜ່ງຊະນະເລີດອັນດັບໜຶ່ງຄືສາວ Pia Alonza Wurtzbach ນາງງາມຈາກປະເທດຟິລີປິນນັ້ນເອງ ເຮັດໃຫ້ຜູ້ຊົມນັບລ້ານແປກໃຈກັນເປັນແຖວໆ.

ນັ້ນແຫຼະເພິ່ນວ່າ ສັດສີຕີນຍັງຮູ້ພະລາດ ນັກປາດຍັງຮູ້ຫຼົງ ທາງພິທີກອນເອງກໍອອກມາກ່າວຂໍໂທດ ແລະຂໍຮັບຜິດຊອບຄວາມຜິດພາດທຸກຢ່າງທີ່ເກີດຂຶ້ນພຽງຄົນດຽວ.

ເຖິງຢ່າງໃດກໍຂໍເປັນກຳລັງໃຈໃຫ້ກັບສາວງາມຈາກປະເທດໂຄລົມເບຍ ແລະກໍສະແດງຄວາມດີໃຈນຳສາວຟີລິປິນທີ່ເປັນໄດ້ຄວ້າຕຳແໜງນາງງາມລະດັບໂລກໄດ້ສຳເລັດ. ນັບວ່າເປັນສາວອາຊີຄົນທຳອິດໃນຮອບສິບກວ່າປິທີ່ຜ່ານມາ.