ລືກັນຊະ!! ປືນຕົກລົງເງື່ອນໄຂສ່ວນຕົວຊາກາແລ້ວ

 

ໂກນ ສື່ດັງວົງການລູກໜັງຕີຂ່າວ ອາເຊນອນ ຕົກລົງເງື່ອນໄຂສ່ວນຕົວກັບ ກຣານິດ ຊາກາ ຫ້ອງເຄື່ອງຂອງ ໂບຣຸສເຊຍ ມິວເຊັນກັດບັກ ໄດ້ເປັນທີ່ຮຽບຮ້ອຍແລ້ວແຕ່ວ່າຍັງຕິດບັນຫາເລື່ອງທີ່ “ສິງໜຸ່ມ” ຕ້ອງການຊອກຕົວແທນໃຫ້ໄດ້ກ່ອນ ແລະ ຢາກໄດ້ເງິນສູງເຖິງ 43 ລ້ານເອີໂຣເພື່ອເປັນຄ່າຫົວຂອງ ຊາກາ.

 

ອາເຊນອນ ສະໂມສອນດັງຂອງ ພຣີເມຍລີກ ບັນລຸເງື່ອນໄຂສ່ວນຕົວກັບ ກຣານິດ ຊາກາ ກອງກາງຂອງ ໂບຣຸສເຊຍ ມິວເຊັນກັດບັກ ທີມດັງຂອງ ບຸນເດສລີກາ ໄດ້ແລ້ວຕາມການລາຍງານຂອງ ໂກນ ສື່ກິລາຊື່ດັງຂອງໂລກລູກໜັງ.

 

ອາເຊນອນ ຈີບ ຊາກາ ມາຫຼາຍເດືອນແລ້ວ ແລະ ເຖິງວ່າ ແມນເຊສເຕີ ຊີຕີ ຈະເປັນທີມທີ່ຫາກໍມີຂ່າວວ່າໃຫ້ຄວາມສົນໃຈໃນໂຕດາວເຕະສະວິດແຕ່ເຊື່ອກັນວ່າເຂົາສົນໃຈທີ່ຢາກຈະມາຮ່ວມງານກັບ ອາແຊນ ແວນເກີ ຜູ້ຈັດການທີມຂອງ “ປືນໃຫຍ່” ຫຼາຍກວ່າ.

 

ທັງນີ້ນັກເຕະຕ້ອງການໃຫ້ເຮັດການຕົກລົງມັນສຳເລັດກ່ອນຈະຮອດ ຢູໂຣ 2016 ຮອບສຸດທ້າຍໃນຊ່ວງຊຳເມີນີ້ເຊິ່ງ ດິກ ລໍ ຫົວໜ້າຝ່າຍເຈລະຈາການຊື້ຂາຍຂອງ ອາເຊນອນ ກໍຮ່າງເລື່ອງຄ່າເມື່ອຍ ແລະ ເງິນໃນສ່ວນຕ່າງໆແລ້ວ ແລະ ເບິ່ງຄືວ່າ ຊາກາ ຈະຕອບຮັບຂໍ້ສະເໜີພ້ອມ.

 

ຢ່າງໃດກໍຕາມ “ສິງໜຸ່ມ” ຍັງພະຍາຍາມດຶງການຍ້າຍທີມເອົາໄວ້ກ່ອນຈົນກວ່າພວກເຂົາຈະຊອກຕົວແທນໄດ້ ພ້ອມທັງຕັ້ງຄ່າຫົວຂັ້ນຕ່ຳຂອງ ຊາກາ ເອົາໄວ້ທີ່ 43 ລ້ານເອີໂຣເຊິ່ງ ອາເຊນອນ ບໍ່ຄ່ອຍພໍໃຈປານໃດ ແລະ ຄິດກ່ຽວກັບມັນຕະຫຼອດຊ່ວງຫຼາຍອາທິດຜ່ານມາ.

 

ບົດຄວາມໃຫມ່ໆ