ລື!! ເປເອັດເຊ ພ້ອມຮ່ວມວົງລ່າ ເປບ ຄຸມທັບ

ປາຣີ ແຊັງ-ແຊັກແມັງ ຕົກເປັນຂ່າວວ່າ ພ້ອມທີ່ຈະຮ່ວມວົງລ່າຕົວ ໂຈເຊບ ກວາດິໂອລາ ນາຍໃຫຍ່ຊາດ ສະເປນ ມາຄຸມທີມລະດູການໜ້າ ຫຼັງຈາກທີ່ນາຍໃຫຍ່ ບາເຢິນ ມິວນິກ ຈະອຳລາຕຳແໜ່ງໃນຊ່ວງພັກລະດູການນີ້ ແລະ ມີຫຼາຍສະໂມສອນໃນອັງກິດຢາກໄດ້ໄປຄຸມທັບ.

 

ປາຣີ ແຊັງ-ແຊັກແມັງ ສະໂມສອນມະຫາເສດຖີຈາກ ລີກແອັງ ຕົກເປັນຂ່າວວ່າກາຍເປັນທີມລ່າສຸດທີ່ພ້ອມທີ່ຈະຮ່ວມວົງສົນທະນາດຶງໂຕ ໂຈເຊບ ກວາດິໂອລາ ຜູ້ຈັດການທີມຄົນ ສະເປນ ເຂົ້າມາຮັບໜ້າທີ່ຄຸມທີມໃນຊ່ວງພັກລະດູການນີ້ ຈາກການລາຍງານເມື່ອວັນຈັນທີ 28 ທີ່ຜ່ານມາ.

ກວາດິໂອລາ ຈະລາອອກຈາກ ບາເຢິນ ມິວນິກ ສະໂມສອນຍັກໃຫຍ່ຈາກ ບຸນເດສລີກາ ໃນຊ່ວງຈົບລະດູການນີ້ ແລະ ມີຫຼາຍສະໂມສອນໃນ ພຣີເມຍລີກ ທັງ ແມນ ຊີຕີ, ແມນຢູ ແລະ ເຊວຊີ ທີ່ຫວັງຈະດຶງໂຕອະດີດນາຍໃຫຍ່ ບາເຊໂລນາ ເຂົ້າມາຄຸມບັງຫຽນໃນລະດູການໜ້າ.

 

ຢ່າງໃດກໍຕາມ ລ່າສຸດມີລາຍງານວ່າ ບັນດາສະໂມສອນໃນອັງກິດຈະຕ້ອງພົບກັບຄູ່ແຂ່ງຈາກຝຣັ່ງເມື່ອ ເປເອັດເຊ ກໍພ້ອມທີ່ຈະລຸ້ນດຶງໂຕນາຍໃຫຍ່ 44 ປີມາຮັບໜ້າທີ່ຄຸມທີມເຊັ່ນກັນເນື່ອງຈາກວ່າ ກວາດິໂອລາ ຍັງບໍ່ຕັດສິນໃຈວ່າຈະເລືອກສະໂມສອນໃດໃນລະດູການໜ້າ.