ລາອອກສະພໍ່ຕູ້!! ດາວລຸ້ງຜີຢາກໃຫ້ຟານກາວລາອອກ

 

“ເດລີ ເມວ” ສື່ດັງຂອງເມືອງຜູ້ດີຕີຂ່າວ ດາວລຸ້ງຫຼາຍຄົນຂອງ ແມນຢູ ຕ້ອງການໃຫ້ ຫຼຸຍ ຟານກາວ ນາຍໃຫຍ່ອອກຈາກທີມໄປ ເພາະເບິ່ງວ່າວິທີການຄຸມທັບຂອງ ຟານກາວ ມັນລ້າສະໄໝໄປແລ້ວ ແລະ ຢາກໃຫ້ ໄຣອັນ ກິກ ມາຄຸມທີມແທນ ໂດຍພວກເຂົາຍັງຄ້ານແນວຄິດທີ່ ຜີສາດແດງ ຄິດເອົາ ໂຊເຊ ມູຣິນໂຢ ມາຄຸມບັງຫຽນ.

 

ນັກເຕະດາວລຸ້ງຫຼາຍຄົນຂອງ ແມນເຊສເຕີ ຢູໄນເຕັດ ສະໂມສອນຊັ້ນນຳຈາກ ພຣີເມຍລີກ ຢາກໃຫ້ ຫຼຸຍ ຟານກາວ ຜູ້ຈັດການທີມຄົນປັດຈຸບັນອອກຈາກຕຳແໜ່ງ ແລະ ໃຫ້ ໄຣອັນ ກິກ ມີຂວາຂອງເຂົາມາຄຸມທີມແທນ ຕາມລາຍງານຂອງ ເດລີ ເມວ ສື່ດັງຂອງອັງກິດ.

 

ຊ່ວງຫຼາຍອາທິດທີ່ຜ່ານມາເຂົາໃຫ້ໂອກາດນັກເຕະເຍົາວະຊົນຫຼາຍຄົນໄດ້ລົງຫຼິ້ນກັບທີມຊຸດໃຫຍ່ເຊັ່ນ ມາຄັສ ຣັສຝອດ ແລະ ທິເມທີ ໂຟຊູ-ເມນຊາ ເປັນຕົ້ນ ແຕ່ນັ້ນເບິ່ງວ່າຈະຍັງບໍ່ສາມາດຊື້ໃຈບັນດານັກເຕະດາວລຸ້ງຂອງ “ຜີສາດແດງ” ໄດ້ໂດຍພວກເຂົາເບິ່ງວ່າ ຟານກາວ ມີວິທີການຄຸມທີມທີ່ລ້າສະໄໝເກີນໄປ.

 

“ຫຼາຍຄົນໃນກຸ່ມພວກເຂົາຄິດວ່າເຂົາເປັນພໍ່ຕູ້ ແລະ ມີວິທີການຄຸມທີ່ລ້າສະໄໝ ນັກເຕະຫຼາຍຄົນຫງຸດຫງິດດ້ວຍເພາະບໍ່ໄດ້ຮັບໂອກາດລົງຫຼິ້ນຫຼາຍພໍໃນຍຸກຂອງ ຟານກາວ ຫຼາຍຄົນຈະມີຄວາມສຸກຖ້າວ່າ ກິກ ມາຄຸມທີມເພາະບັນດານັກເຕະສາມາດສ້າງສາຍສຳພັນກັບເຂົາໄດ້ ພວກເຂົາເຮັດແບບນັ້ນກັບ ຟານກາວ ບໍ່ໄດ້ ເຂົາແກ່ເກີນໄປ” ວົງໃນແສໃຫ້ກັບ ເດລີ ເມວ.

 

ແຫຼ່ງຂ່າວເກົ່າຍັງເສີມວ່າບັນດາດາວລຸ້ງຂອງ ແມນຢູ ກໍບໍ່ຢາກໄດ້ ມູຣິນໂຢ ມາເປັນຜູ້ຈັດການທີມເຊັ່ນກັນ “ນັກເຕະບໍ່ຄ່ອຍໝັ້ນໃຈກັບ ມູຣິນໂຢ ຂ້ອຍຄິດວ່າພວກເຂົາບໍ່ເຊື່ອວ່າຈະໄດ້ໂອກາດລົງຫຼິ້ນຖ້າ ມູຣິນໂຢ ເຂົ້າມາຄຸມທັບ ພວກເຂົາລົມກັບດາວເຕະລຸ້ນດຽວກັນຂອງ ເຊວຊີ ແລະ ຮູ້ວ່າພວກເຂົາ (ເຍົາວະຊົນຂອງ ເຊວຊີ) ບໍ່ເຄີຍໃກ້ຄຽງທີ່ຈະໄດ້ຮັບໂອກາດລົງຫຼິ້ນ ແລ້ວກັບ ແມນຢູ ມັນຈະຕ່າງກັນຈັ່ງໃດ? ເຂົາເປັນກຸນຊືແບບນັກທຸລະກິດຂອງແທ້”.