ລາວ ແລະ ສິງກະໂປ ສືບຕໍ່ເສີມຂະຫຍາຍ ການພົວພັນຮ່ວມມືສອງຝ່າຍ ໃນຫລາຍດ້ານ

ໃນ​ໂອກາດ ​ຢ້ຽມຢາມ​ທາງ​ການ ສ.ສິງກະ​​ໂປ ຂອງ​ທ່ານ ນາຍົກລັດຖະມົນຕີ ທອງ​ລຸນ ສີ​ສຸ​ລິດ​ ພ້ອມ​ດ້ວຍ​ຄະນະ​ຜູ້​ແທນ ​ແຫ່ງ ສປປ ລາວ ​ໃນ​ວັນ​ທີ 02 ພຶດສະພາ 2017 ຜ່ານ​ມາ, ​ທ່ານ ທອງ​ລຸນ ສີ​ສຸ​ລິດ ​ແລະ ຄະນະ ​ໄດ້​ເຂົ້າ​ຢ້ຽມ​ຂ່ຳນັບ ​ທ່ານ ​ໂທ​ນີ່ ຕັນ ​ເກັງ​ຢຳ, ປະທານາທິບໍດີ ​ແລະ ພົບ​ປະ​ສອງ​ຝ່າຍກັບ ​ທ່ານ ລີ ຊຽນ ລຸງ, ນາຍົກລັດຖະມົນຕີ ​ແຫ່ງ ສ. ສິງກະ​ໂປ, ທີ່ ສຳນັກງານ​ ປະທານາ​ທິບໍດີ. ​ໃນ​ການ​ພົບ​ປະສອງ​ຝ່າຍ ​ໄດ້​ປຶກສາ​ຫາລື​ກັນ ​ເຖິງ​ການ​ພົວພັນ ​ແລະ ຮ່ວມ​ມື​ຊຶ່ງ​ກັນ ​ແລະ ກັນ ​ໃນ​ໄລຍະ​ຜ່ານມາ ​ແລະ ​ແຜນການ​ຮ່ວມ​ມື ​ໃນ​ອະນາຄົດໃນ​ດ້ານ​ຕ່າງໆ ​ເຊັ່ນ: ການ​ພັດທະນາ ​ຊັບພະຍາກອນ​ມະນຸດ, ສາທາລະນະ​ສຸກ, ການ​ພັດທະນາ​ຕົວ​ເມືອງ, ການ​ສຶກສາ, ການ​ພັດທະນາ​ດ້ານ​ການຂົນ​ສົ່ງ, ການບິນ, ການ​ຮ່ວມ​ມື​ທາງ​ດ້ານ ​ເສດຖະກິດ​ການ​ຄ້າ​ນຳ​ກັນ ​ແລະ ພິ​ເສດ​​ແມ່ນ​ ການ​ຊຸກຍູ້ ນັກ​ທຸລະ​ກິດ ​ຂອງ​ສິງກະ​ໂປ ​ເຂົ້າ​ມາ​ລົງທຶນ​ໃນ​ລາວ ​ໃຫ້​ຫລາຍ​ຂຶ້ນ​ໃນ​ຕໍ່ໜ້າ. ພ້​ອມນັ້ນ, ສອງ​ຝ່າຍຍັງ​ໄດ້​ແລກປ່ຽນ ​ຄຳ​ຄິດ​ຄຳ​ເຫັນ​ນຳ​ກັນ ຕໍ່​ບັນຫາ​ພາກ​ພື້ນ ​ແລະ ສາກົນ ທີ່ມີ​ຄວາມ​ສົນ​ໃຈ​ຮ່ວມ​ກັນ.

​ໃນ​ການ​ຢ້ຽມຢາມ​ຄັ້ງ​ນີ້, ​ທ່ານນາຍົກ ທອງ​ລຸນ ສີ​ສຸ​ລິດ ພ້ອມ​ດ້ວຍ​ຄະນະ ຍັງ​ໄດ້​ເຂົ້າ​ຮ່ວມ​ກອງ​ປະຊຸມ ນັກທຸລະກິດ​ ລາວ-ສິງກະ​ໂປ ທີ່​ມີ​ຈຸດປະສົງ​ ເພື່ອ​ຊອກ​ຫາ​ຊ່ອງ​ທາງ​ຮ່ວມ​ກັນ ໃນ​ການ​ສົ່ງ​ເສີມ​ການ​ຄ້າ​ນຳ​ກັນ ​ແລະ ລະດົມ​ການ​ລົງທຶນ ​ຂອງ​ສິງກະ​ໂປ​ຢູ່ລາວ ໃຫ້​ຫລາຍ​ຂຶ້ນ. ​ໂອກາດ​ດັ່ງກ່າວ, ​ທ່ານ ທອງ​ລຸນ​ ສີ​ສຸ​ລິດ ​ໄດ້​ຂຶ້ນ​ກ່າວຄຳ​ເຫັນ ຊັກ​ຊວນນັກທຸລະກິດ ສິງກະ​ໂປ​ມາ​ລົງທຶນ​ຢູ່​ລາວ. ກອງ​ປະຊຸມ​ຄັ້ງ​ນີ້, ຈະ​ເປັນ​ການ​ ປ​ະກອບ​ສ່ວນ​ໜຶ່ງ​ທີ່​ສຳຄັນ ​ໃນ​ການ​ເພີ່ມ​ທະວີ ​ຊຸກຍູ້​ກາ​ນຮ່ວມ​ມື ທາງ​ດ້ານ​ການ​ຄ້າ ​ແລະ ການ​ລົງທຶນ​ຮ່ວມ​ກັນ ໃຫ້​ມີ​ຜົນສຳ​ເລັດ ​ແລະ ຂະຫຍາຍ​ຕົວ​ຍິ່ງໆ​ຂຶ້ນ​ ໃນ​ອະນາ​ຄົດ, ສ່ວນຄະນະ​ນັກທຸລະກິດ​ສຳຄັນ​ ຂອງ​ສິງກະ​ໂປ ກໍ​ມີ​​ແຜນ​ຈັດ​ຕັ້ງ​ຄະນະ​​ ເດີນທາງ​ມາສຶກສາ ​ແລະ ຊອກ​ເບິ່ງ​ສະພາບ​ຕົວ​ຈິງ ​ໃຫ້​ມີ​ການ​ລົງທຶນ​ຢູ່ ສປປ ລາວ ​ໃນ​ທ້າຍ​ເດືອນ​ພຶດສະພາ​ນີ້. ​ໃນກອງ​ປະຊຸມ​ຄັ້ງ​ນີ້, ຍັງ​ໄດ້​ມີ​ການ​ເຊັນ​ບົດ​ບັນ​ທຶກ ​ຄວາມ​ເຂົ້າ​ໃຈ ລະຫວ່າງ ສະພາ​ການ​ຄ້າ ​ແລະ ອຸດສາຫະກຳ​ ຂອງ​ສອງ​ປະ​ເທດ.

​ໃນ​​ໂອກາດ​ ຢ້ຽມຢາມ​ດັ່ງກ່າວ, ​ທ່ານ ທອງ​ລຸນ ສີ​ສຸ​ລິດ ພ້ອມ​ດ້ວຍ​ຄະນະ ໄດ້​ຢ້ຽມຢາມ ສວນ​ທຳ​ມະ​ຊາດ​ແຫ່ງ​ຊາດ ສິງກະ​ໂປ, ​​ເຊິ່ງ​ໄດ້​ມີ​ການ ​ຕັ້ງ​ຊື່​​​ດອກ​ກ້ວຍ​​ໄມ້​ ເປັນ​ຊື່​ຂອງ​ນາຍົກ ​ທີ່​ມີ​ຊື່ວ່າ: “ດອກ​ກ້ວຍ​ໄມ້​ ຣານັນທະ​ລາ ທອງ​ລຸນ ສີ​ສຸ​ລິດ (RanantharaThonglounSisoulith Orchid flower)”; ​ໄດ້​ຢ້ຽມຢາມ ວິທະຍາ​ໄລ​ເຕັກນິກ​ນັນ​ຢາງ, ​ເຊິ່ງ​ເປັນ​​ໂຮງຮຽນທີ່ມີ​ ການ​ນຳ​ຂອງ​ລາວ​ຫລາຍ​ທ່ານ ​ໄປ​ຮຽນ​ບຳລຸງ​ພາສາ​ອັງກິດ ຢູ່​ບ່ອນ​ນັ້ນ, ​ໃນ​ນັ້ນ ​ລວມມີ​ທ່ານ​ນາຍົກ ທອງ​ລຸນ ສີ​ສຸ​ລິດ ກໍ​ເຄີຍ​​ໄດ້​ມາ​ຮຽນ​​ເມື່ອເວລາ 18 ປີກ່ອນ; ແລະ ​ໄດ້​ໄປ​ຢ້ຽມ​ຊົມ ບໍລິສັດ​ຂົນ​ສົ່ງ​ທ່າ​ເຮືອ ສິງ​ກະ​ໂປ, ​​ເຊິ່ງ​ເປັນ​ທ່າ​ເຮືອ​ທີ່​ໃຫຍ່ ​ມີ​ການ​ຂົນ​ສົ່ງ ​ເຂົ້າ-ອອກ ຂອງ​ຕູ້​ຄອນ​ເທ​ນ​​ເນີ ປະມານ 30 ລ້ານ​ຕູ້​ຕໍ່​ປີ ທີ່​ມີ​ລະບົບ​ຄວບ​ຄຸມ​ ແບບ​ອັດຕະ​ໂນ​ມັດ ​ທັນ​ສະ​​ໄໝຄົບ​ວົງ​ຈອນ.

ທີ່ມາ: ສຳນັກຂ່າວສານປະເທດລາວ