ລາວ-ຫວຽດນາມ ແລກປ່ຽນບົດຮຽນການຄຸ້ມຄອງ ງົບປະມານ-ໜີ້ສິນ

 ​ລະ​ຫວ່າງ ວັນ​ທີ 26-30 ມິຖຸນາ 2017 ທີ່​ຜ່ານ​ມາ, ທ່ານ ວິ​ໄລ​ວົງ ບຸດ​ດາ​ຄຳ ປະທານ​ກຳມາ​ທິການ​ແຜນການການ​ເງິນ ​ແລະ ​ການກວດ​ສອບ ສະພາ​ແຫ່​ງຊາດ ທັງ​ເປັນ​ປະທານສະມາຄົມ​ມິດຕະພາບ ລາວ-ຫວຽດນາມ ໄດ້​ນຳພາ​ຄະນະ​ຜູ້​ແທນ​ສະພາ​ແຫ່ງ​ຊາດ, ສະພາ​ປະຊາຊົນ​ຂັ້ນ​ແຂວງ, ອົງການ​ກວດ​ສອບ​ແຫ່ງ​ລັດ ​ແລະ ກະຊວງ​ການ​ເງິນ ​ເດີນທາງ​ເຂົ້າຮ່ວມ​ກອງ​ປະຊຸມ ​ສຳ​ມະ​ນາສາ​ກົນ ​ໃນຫົວ​ຂໍ້: ປະສົບການ​ໃນ​ການຈັດຕັ້ງປະຕິບັດ​ການ​ແບ່ງ​ ຂັ້ນຄຸ້ມ​ຄອງງົບປະມານ​​ແຫ່ງ​ລັດ ​ແລະ ກາ​ນຄຸ້ມ​ຄອງ​ໜີ້​ສິນພາກ​ລັດ” ທີ່ແຂວງກວາງ​ນາມ ສສ ຫວຽດນາມ ​ໂດຍ​ການ​ເປັນ​ເຈົ້າພາບ​ຂອງ​ກຳມາ​ທິການ​ການ​ເງິນ-ງົບປະມານ ສະພາ​ແຫ່ງ​ຊາດ  ສສ ຫວຽດນາມ. 
ຈຸດປະສົງ​ ຂອງ​ກອງ​ປະຊຸມ​ໃນ​ຄັ້ງນີ້​ ເພື່ອ​​ສືບ​ຕໍ່​ຮ່ວມ​ມື​ລະຫວ່າງ​ສອງ​ສະພາ ​​ໂດຍສະ​ເພາະສ​ອງກຳມາ​ທິການ ​ແລະ ເປັນ​ການ​​ແລກປ່ຽນ​ບົດ​ຮຽນ​​ ໃນ​ການ​ຄຸ້ມຄອງງົບປະ​ມານ​ ​ແລະ​ ໜີ້​ສິນ​ພາກ​ລັດ ​ເພຶ່ອ​ເປັນ​ຂໍ້​ມູນ ​ໃນການ​ກະກຽມ​ໃຫ້​ແກ່ການ​ສ້າງ ​ແລະ ​ປັບປຸງ​ນິຕິ​ກຳ​ກ່ຽວຂ້ອງ​​ໂດຍສະເພາະ ຮ່າງ ກົດໝາຍ​ວ່າ​ດ້ວຍ​ການຄຸ້ມ​ຄອງ​ໜີ້​ສິນ​ ​ເຊິ່ງຄາດວ່າຈະ​​ສະ​ເໜີ​ຕໍ່​ກອງ​ປະຊຸມ​ ສະພາ​ແຫ່ງ​ຊາດ ​ເພຶ່ອປຶກສາ​ຫາລື ​ແລະ ພິຈາລະນາ​ຮັບຮອງ ​ໃນ​ທ້າຍ​ປີ 2017 ນີ້. ​ 
ກອງ​ປະຊຸມ​ດັ່ງກ່າ​ວ ​ໄດ້​ດຳ​ເນີນ​ດ້ວຍ​ບັນຍາກາດ​ຟົດ​ຟື້ນ​ໄມຕີ​ຈິດ​ມິດຕະພາບ ຖານ​ອ້າຍ​ນ້ອງ ໂດຍ​​ໄດ້​ແລກປ່ຽນ​ ​ແລະ ​ນໍາ​ສະ​ເໜີບົດຮຽນ​ຊຶ່ງ​ກັນ ​ແລະ ​ກັນ 3 ບົດຮຽນ​ຄື: ​ການຈັດຕັ້ງປະຕິບັດ​ການ​ແບ່ງ​ຂັ້ນຄຸ້ມ​ຄອງ​ງົບປະມານ​ແຫ່ງ​ລັດ, ການ​ຄຸ້ມ​ຄອງ​ໜີ້​ສິນ​ພາກ​ລັດ ​ແລະ ທັດສະນະ​ຂອງ​ອົງການ​ກວດ​ສອບ​ແຫ່ງ​ລັດ ຕໍ່​ກັບ​ໜີ້​ສິນ​ພາກ​ລັດ. ​ 
ການ​​ເຂົ້າຮ່ວມ​ກອງ​ປະຊຸມຄັ້ງນີ້ ໂດຍ​ຕອບ​ສະໜອງຕາມ​ຄຳ​ເຊືອ​ເຊີນ​ຂອງ ທ່າ​ນ ຫວຽນ ດຶກ ຫາຍ ປະທານ​ກຳມາ​ທິການ​ ການ​ເງິນ-ງົບປະມານ ສສ ຫວຽດນາມ ​ທ່າ​ມກາງ​ບັນຍາກາດ ທີ່​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-ຫວຽດນາມ ພວມສະ​ເຫລີ​ມສະຫລອງ ປີ​ມະຫາ​ສາມັກຄີຂອງ​ສອງ​ຊາດ ກໍ​ຄື​ສອງ​ວັນ​ປະຫວັດສາດ​ຄື: ວັນ​ເຊັນ​ສົນທິສັນຍາ​ມິດຕະພາບ ​ແລະ ​ການ​ຮ່ວມ​ມື ລາວ-ຫວຽດນາມ ຄົບຮອບ 40 ປີ ​ແລະ ​ວັນ​ສ້າງຕັ້ງສາຍ​ພົວພັນ​ການ​ທູດ ລາວ​-ຫວຽດນາມ ຄົບຮອບ 55 ປີ. 
ພາຍຫລັງ​ສຳ​ເລັດ​ກອງ​ປະຊຸມ​ສຳ​ມະ​ນາ​ແລ້ວ ທ່ານ​ ວິ​ໄລ​ວົງ ບຸດ​ດາ​ຄຳ ​ໄດ້ຖື​ໂອກາດ​ນີ້​ສືບ​ຕໍ່​ເຄື່ອນ​ໄຫວ ​ຢ້ຽມຢາມ​​​ແຂວງ​ກວາງ​ນາມ ​ແລະ ​ໄດ້ເຂົ້າພົບ​ປະ​ທ່ານ​ເລຂາ​ພັກ​ແຂວງ​ກວາງ​ນາມ, ໃຫ້​ກຽດພົບ​ປະ ​ແລະ ​ໂອ້​ລົມ​ພະນັກງານ​ສະຖານກົງສູນ​ໃຫຍ່  ສປປ ລາວ ປະຈຳ ​ນະຄອນ​ດາ​ນັງ ​ແລະ ໂອ້​ລົມ​​ນັກ​ສຶກສາລາ​ວ ທີ່​ມະ​ຫາ​ວິທະຍາ​ໄລ​ກວາງ​ນາມ, ທັງ​ຮ່ວມປູກ​ຕົ້ນ​ໄມ້​ທີ່​ອານຸສາ​ວະລີ​ແມ່​ຫວຽດນາມ​ວິລະ​ຊົນ ​ແລະ ຢ້ຽມຢາມ​​ເຂດ​ອະ​ນຸສອນ​ສະຖານ​ ເຂດ​ຕໍ່ຕ້ານ​ພາກ​ໃຕ້ ຢູ່​ຕາ​ແສງຕາ​ມວິ​ງ ​ແລະ​ ອື່ນ​ໆ.

ຂໍ້ມູນຈາກ: ສຳນັກຂ່າວສານປະເທດລາວ