ລາວ-ຫວຽດນາມ ເພີ່ມທະວີການຮ່ວມມື ວຽກງານໂທລະຄົມມະນາຄົມ ແລະ ການສື່ສານ


 ໃນວັນທີ 19 ກັນຍານີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ ເຈື່ອງ ມິງ ຕວນ ລັດຖະມົນຕີ ກະຊວງຂໍ້ມູນຂ່າວສານ ແລະ ການສື່ສານ ແຫ່ງ ສສ ຫວຽດນາມ ພ້ອມດ້ວຍຄະນະ ທີ່ໄດ້ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງ ວັນທີ 18-21 ກັນຍາ ນີ້.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງ ຄວາມຊົມເຊີຍ ຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ເຈື່ອງ ມິງ ຕວນ ພ້ອມດ້ວຍຄະນະ ໃນຄັ້ງນີ້. ເຊິ່ງມີຄວາມໝາຍ ຄວາມສຳຄັນ ເປັນຢ່າງຍິ່ງ, ທັງເປັນການ ປະກອບສ່ວນສຳຄັນ ເຂົ້າໃນການເສີມຂະຫຍາຍ ມູນເຊື້ອຄວາມສາມັກຄີ ແບບພິເສດ ແລະ ການພົວພັນ ຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ກໍຄື ສອງກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ລາວ-ຫວຽດນາມ ໃຫ້ແຕກດອກອອກຜົນ ຈະເລີນງອກງາມ ຍິ່ງຂຶ້ນເລື້ອຍໆ.

ໃນໂອກາດດຽວກັນ, ທ່ານ ເຈື່ອງ ມິງ ຕວນ ຕາງໜ້າຄະນະ ໄດ້ສະແດງ ຄວາມຂອບໃຈຕໍ່ ທ່ານ ທອງລຸນ ສີສຸລິດ ນາຍົກລັດຖະມົນຕີ ທີ່ໄດ້ສະຫລະເວລາອັນມີຄ່າ ຕ້ອນຮັບຢ່າງ ອົບອຸ່ນໃນຄັ້ງນີ້. ພ້ອມທັງ ໄດ້ແຈ້ງສະພາບຂອງການເດີນທາງ ມາຢ້ຽມຢາມ ແລະ ເຮັດວຽກ ເພື່ອເພີ່ມທະວີ ການຮ່ວມມື ແລະ ແລກປ່ຽນບົດຮຽນ ຂອງສອງປະເທດ ທາງດ້ານວຽກງານ ໂທລະຄົມມະນາຄົມ ແລະ ICT ເປັນຕົ້ນ ພັດທະນາ ໂຄງລ່າງພື້ນຖານ ລະຫັດຄວາມປອດໄພແຫ່ງຊາດ, ການຮ່ວມມື ສ້າງລະບົບຕິດຕາມ ເຝົ້າລະວັງເຫດສຸກເສີນ ທາງດ້ານຄອມພິວເຕີ ແລະ ອື່ນໆ ໃຫ້ທ່ານ ນາຍົກລັດຖະມົນຕີ ໄດ້ຮັບຊາບ.

========================

ພາບແລະຂ່າວຈາກ: Pathedlao Lao