ລາວ ສະຫຼອງເຂົ້າເປັນສະມາຊິກ ອົງການສະຫະປະຊາຊາດຄົບຮອບ 60 ປີ

ຕອນຄໍ່າຂອງວັນທີ 23 ຕຸລາ 2015 ນີ້, ທີ່ປະຕູໄຊ ນະຄອນຫຼວງວຽງຈັນ ສປປ ລາວ ແລະ ອົງການ ສປຊ ປະຈໍາລາວ ໄດ້ຈັດພິທີໄຂການເຍືອງແສງໄຟສີຟ້າໃສ່ປະຕູໄຊ ແລະ ງານສະແດງຮູບພາບ ເພື່ອສະຫຼອງວັນສ້າງຕັ້ງອົງການ ສປຊ ຄົບຮອບ 70 ປີ ແລະ ຄົບຮອບ 60 ຂອງການຮ່ວມມືລະຫວ່າງ ສປປ ລາວ ແລະ ສປຊ. ພາຍໃຕ້ຄໍາຂວັນວ່າ: “ ກ້າວໄປສູ່ການພັດທະນາແບບຍືນຍົງ ”. ມີທ່ານ ສະເຫຼີມໄຊ ກົມມະສິດ, ລັດຖະມົນຕີຊ່ວຍວ່າການກະຊວງການຕ່າງປະເທດລາວ ແລະ ທ່ານ ນາງ ຄາຣິນາ ອິມໂມເນັນ, ຜູ້ປະສານງານອົງການ ສປຊ ປະຈໍາລາວ, ບັນດາອົງການຈັດຕັ້ງສາກົນປະຈໍາລາວ, ແຂກທີ່ເຊີນ, ພາກສ່ວນກ່ຽວຂ້ອງທັງສອງຝ່າຍ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມ.
ທ່ານ ສະເຫຼີມໄຊ ກົມມະສິດ ກ່າວວ່າ: ສາຍພົວພັນຮ່ວມມືລະຫວ່າງລາວ ແລະ ອົງການ ສປຊ ທີ່ມີທ່າຂະຫຍາຍຕົວຂື້ນຢ່າງໜັກແໜ້ນ ແລະ ມີບັນຍາກາດອັນໃໝ່, ເປັນຕົ້ນ, ການມາຢ້ຽມຢາມ ສປປ ລາວ ຂອງເລຂາທິການໃຫຍ່ ອົງການ ສປຊ ແລະ ການນໍາບັນດາອົງການເຄືອຂ່າຍ ສປຊ ກໍ່ຄືການເຂົ້າຮ່ວມກອງປະຊຸມສະມັດຊາໃຫຍ່ ແລະ ກອງປະຊຸມສຸດຍອດອົງການ ສປຊ ຂອງການນໍາຂັ້ນສູງສຸດຂອງລາວ. ໃນໄລຍະຜ່ານມາ ການຊ່ວຍເຫຼືອ ແລະ ກະໜັບສະໜູນດ້ານທຶນຮອນ ແລະ ເຕັກນິກຈາກອົງການເຄືອຂ່າຍ ສປຊ ໄດ້ດໍາເນີນມາຢ່າງສະເໝີຕົ້ນສະເໝີປາຍ, ເຊິ່ງໃນປັດຈຸບັນ, ມີທັງໝົດ 16 ອົງການເຄືອຂ່າຍ ສປຊ ປະຈໍາຢູ່ລາວ ແລະ ມີຫ້ອງການຜູ້ຕາງໜ້າອົງການອີກຈໍານວນໜື່ງ ທີ່ມີສໍານັກງານປະຈໍາຢູ່ພາກພື້ນ ກໍ່ໄດ້ໃຫ້ການສະໜັບສະໜູນຊ່ວຍເຫຼືອພວກເຮົາ ໂດຍສະເພາະໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ແລະ ການປະຕິບັດເປົ້າໝາຍສະຫັດສະວັດດ້ານການພັດທະນາ ເພື່ອສ້າງເງື່ອນໄຂໃຫ້ ສປປ ລາວ ໃນປີ 2020. ບັນດາຜູ້ນໍາຂອງໂລກໄດ້ຮັບຮອງເອົາການພັດທະນາ ຫຼຸດພົ້ນອອກຈາກສະຖານະພາບດ້ານການພັດທະນາ. ຫຼັງປີ 2015 ການພັດທະນາແບບຍືນຍົງ ຄາດໝາຍສູ້ຊົນກວມເອົາ 3 ດ້ານຄື: ດ້ານເສດຖະກິດ, ສັງຄົມ ແລະ ສິ່ງແວດລ້ອມ. ແນໃສ່ລຶບລ້າງຄວາມທຸກຍາກ, ຫຼຸດຜ່ອນຄວາມບໍ່ສະເໝີພາບ, ສ້າງຄວາມຈະເລີນຮຸ່ງເຮືອງ ແລະ ປົກປັກຮັກສາສິ່ງແວດລ້ອມຢູ່ໃນໂລກ.


ຫຼັງຈາກນັ້ນ, ທ່ານ ນາງ ຄາຣິນນາ ອິນໂມເນັນ, ຜູ້ປະສານງານອົງການ ສປຊ ທັງເປັນຜູ້ຕາງໜ້າອົງການ ສປຊ ເພື່ອການພັດທະນາ ປະຈໍາລາວ ກ່າວວ່າ: “ ສີຟ້າ ຊື່ງເປັນສີຂອງອົງການ ສປຊ ຍັງສະແດງເຖິງສະຖຽນລະພາບ ແລະ ຄວາມໄວ້ເນື້ອເຊື່ອໃຈ. ນີ້ເປັນຄຸນລັກສະນະສໍາຄັນໃນການຮ່ວມມືລະຫວ່າງ ອົງການ ສປຊ ແລະ ສປປ ລາວ. ປະຕູໄຊສີຟ້າເປັນສັນຍາລັກການເປັນຄູ່ຮ່ວມມືພັດທະນາຂອງພວກເຮົາ ແຕ່ສິ່ງທີ່ສໍາຄັນກວ່ານັ້ນ ແມ່ນການເຕືອນເຖິງຄໍາໝັ້ນສັນຍາໃນການພັດທະນາແບບຍືນຍົງຂອງລັດຖະບານ ແລະ ບັນດາຄູ່ຮ່ວມມືພັດທະນາ ”.
ງານສະຫຼອງວັນສ້າງຕັ້ງ ອົງການ ສປຊ ຄົບຮອບ 70 ປີ ແລະ ສປປ ລາວ ເຂົ້າເປັນສະມາຊິກອົງການ ສປຊ ຄັ້ງນີ້, ເລີ່ມແຕ່ວັນທີ 23 ຕຸລາ 2015 ແລະ ຈະດໍາເນີນໄປເຖິງວັນທີ 28 ພະຈິກ 2015.