ລາວ-ສະວິດ ປຶກສາຫາລືດ້ານ ການເມືອງສອງຝ່າຍ

ໃນ​ວັນ​ທີ 3-4 ກັນຍາ 2015 ນີ້, ຄະນະ​ຜູ້​ແທນ​ລາວ ນຳ​ໂດນ ທ່ານ ສະ​ເຫລີ​ມ​ໄຊ ກົມມະ​ສິດ ລັດຖະມົນຕີ​ຊ່ວຍ​ວ່າການ​ ກະຊວງ​ການ​ຕ່າງປະ​ເທດ ​ແຫ່ງ ສປປ ລາວ ​ໄດ້​ເຂົ້າ​ຮ່ວມ​ກອງ​ປະຊຸມ​ ປຶກສາ​ຫາລື​ດ້ານ​ການ​ເມືອງ ຄັ້ງ​ປະຖົມ​ມະລຶກ ລະຫວ່າງ ສອງກະຊວງ​ການ​ຕ່າງປະ​ເທດ ລາວ-ສະ​ວິດ ທີ່​ນະຄອນຫລວງ​ເບີ​ນ ປະ​ເທດ​ສະ​ວິດ ​ເຊິ່ງຝ່າຍ​ສະ​ວິດ ​ນຳ​ໂດຍ ທ່ານ ໂຈຮານແນດສ ມັດຢາຊີ (Johannes Matyassy) ຜູ້ຊ່ວຍລັດຖະມົນຕີ ຕ່າງປະເທດ ແຫ່ງ ສະມາພັນທະລັດ ສະວິດ.

ການ​ປຶກສາ​ຫາລື​ຄັ້ງ​ນີ້, ສອງ​ຝ່າຍ​ໄດ້​ທົບ​ທວນຄືນ​ ການ​ພົວພັນ​ຮ່ວມ​ມື​ ໃນ​ໄລຍະ​ຜ່ານ​ມາ ​ແລະ ປຶກສາ​ຫາລື​ທິດ​ທາງ​ ແຜນການ​ຮ່ວມ​ມື​ໃນ​ຕໍ່ໜ້າ ​ເຊິ່ງລັດຖະບານ​ສະ​ວິດ ຢືນ​ຢັນ​ຈະ​ສືບ​ຕໍ່​ໃຫ້ການ​ ສະໜັບສະໜູນ​ຊ່ວຍ​ເຫລືອ​ແກ່ ສປປ ລາວ ​ໃນ​ໂຄງການ​ຮ່ວມ​ມື​ ທີ່​ເປັນ​ບູລິ​ມະ​ສິດ​ ເປັນ​ຕົ້ນ ​ແມ່ນ​ໂຄງການ​ຮ່ວມ​ມື​ ໃນ​ຂົງ​ເຂດ​ກະສິກຳ ​ແລະ ຄ້ຳປະກັນ​ສະບຽງ​ອາຫານ; ຂົງ​ເຂດ​ການ​ປົກຄອງ ​ແລະ ການ​ມີ​ສ່ວນ​ຮ່ວມ​ຂອງ​ປະຊາຊົນ; ໂຄງການຮ່ວມ​ມື​ໃນ​ຂົງ​ເຂດ​ອະ​ຊີ​ວິ​ສຶກສາ ​ແລະ ການ​ຝຶກ​ອົບຮົມ​ວິຊາ​ຊີ​ບ​ໃນ​ລາວ. ນັບ​ແຕ່​ປີ 2014-2017 ລວມມູນ​ຄ່າ​ການ​ຊ່ວຍ​ເຫລືອ​​ ເຂົ້າ​ໃນ​ຂົງ​ເຂດ​ດັ່ງກ່າວ ປະມານ 69 ລ້ານ​ຟຣັງສະ​ວິດ. ສ່ວນ​ດ້ານ​ການ​ຄ້າ ​ແລະ ການ​ລົງທຶນ ສອງ​ຝ່າຍ​ເຫັນ​ວ່າ​ຄວນ​ມີ​ການ​ຊຸກຍູ້ ​ແລະ ສົ່ງ​ເສີມ ນັກທຸລະກິດ ຂອງ​ສອງ​ປະ​ເທດ ​ໃຫ້​ມີ​ການ​ຮ່ວມ​ມື​ກັນ​ຫລາຍ​ຂຶ້ນ. ນອກຈາກ​ນີ້, ຝ່າຍສະວິດ ຍັງໄດ້ໃຫ້ຄວາມສຳຄັນການຮ່ວມມື ໃນໂຄງການເກັບກູ້ ລະເບີດບໍ່ທັນແຕກຢູ່ ສປປ ລາວ ແລະ ເຫັນດີຈະສືບຕໍ່ໃຫ້ການຊ່ວຍເຫລືອຕໍ່ໄປ ​ເຊິ່ງການຊ່ວຍເຫລືອ ເກັບກູ້ລະເບີດຂອງສະວິດ ນັບ​ແຕ່​ປີ 2006 ມາ​ເຖິງ​ປັດຈຸບັນ ​ມີ​ມູນ​ຄ່າ​ປະມານ 10,3 ລ້ານ​ໂດ​ລາ​ສະຫະລັດ ​ໂດຍ​ສຸມ​ໃສ່​ວຽກ​ງານ​ສົ່ງ​ເສີມ​ ຄວາມ​ອາດ​ສາມາດ​ການຈັດ​ຕັ້ງ​ຂອງ ​ຄະນະ​ກຳມະການຄຸ້ມ​ຄອງ​ແຫ່ງ​ຊາດ ​ເພື່ອ​ແກ້​ໄຂ​ບັນຫາ​ລະ​ເບີດ​ ຍັງ​ບໍ່​ທັນ​ແຕກ​ທີ່​ຕົກ​ຄ້າງ ​ແລະ ອົງການ​ເກັບ​ກູ້​ລະ​ເບີດ​ລາວ; ວຽກ​ງານ​ສຳ​ຫລວດ ​ແລະ ​ເກ​ັບກູ້​; ວຽກ​ງານ​ໂຄສະນາ ​ແລະ ສຶກສາ​ຄວາມ​ສ່ຽງ​ ຈາກ​ບັນຫາ​ດັ່ງກ່າວ ​ແລະ ວຽກ​ງານ​ຊ່ວຍ​ເຫລືອ​ຜູ້​ເຄາະ​ຮ້າຍ​ ຈາກ​ລະ​ເບີດ​ບໍ່​ທັນ​ແຕກ. ​ໃນ​ຂອບ​ການ​ຮ່ວມ​ມື​ຫລາຍ​ຝ່າຍ ສະ​ວິດ ​​ໄດ້​ໃຫ້​ຄວາມ​ສົນ​ໃຈ​ການ​ຮ່ວມ​ມື ໃນ​ຂອບ​ອາ​ຊຽນ, ອາ​ເຊັມ ​ແລະ ການ​ຮ່ວມ​ມື​ ກັບ​ອົງການ​ແມ່​ນ້ຳຂອງ.

ທ່ານ ສະເຫລີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມ ຂອບອົກຂອບໃຈຢ່າງຈິງໃຈ ຕໍ່ການຊ່ວຍ ເຫລືອອັນລໍ້າຄ່າ ຂອງລັດຖະບານ ແລະ ປະຊາຊົນສະວິດ ທີ່ມີຕໍ່ ສປປ ລາວ ​ເຊິ່ງໄດ້ປະກອບສ່ວນອັນສໍາຄັນ ເຂົ້າໃນການ ສ້າງສາພັດທະນາ ຊີວິດການເປັນຢູ່ຂອງ ປະຊາຊົນລາວ ບັນດາເຜົ່າ ໃຫ້ນັບມື້ດີຂຶ້ນ.

ກອງ​ປະຊຸມ​ປຶກສາ​ຫາລື​ ດ້ານ​ການ​ເມືອງ ລາວ-ສະ​ວິດ ​ໃນ​ຄັ້ງ​ນີ້, ​ເປັນ​ເຫດການ​ສຳຄັນ ​ໃນ​ການ​ປະກອບ ສ່ວນຢ່າງ​ຕັ້ງໜ້າ ​ເຂົ້າ​ໃນ​ການ​ສົ່ງ​ເສີມ​ ການ​ພົວພັນ​ຮ່ວມ​ມື​ ຂອງ​ສອງ​ປະ​ເທດ ທັງ​​ເຮັດ​ໃຫ້​ສອງ​ຝ່າຍ​ ມີ​ຄວາມ​ເຂົ້າ​ອົກ​ເຂົ້າ​ໃຈ​ ເຊິ່ງກັນ ​ແລະ ກັນ ຫລາຍ​ຂຶ້ນ.

………………………………………………………………………………………………………………………………………………………………………………………………

ທີ່​ມາ: www.kpl.gov.la