ລາວ-ຣັດເຊຍ ເພີ່ມທະວີຮ່ວມມືດ້ານເສດຖະກິດ-ການຄ້າ ແລະ ວິທະຍາສາດເຕັກນິ


ຂປລ. ກອງປະຊຸມຄະນະກໍາມາທິການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກ ນິກ ລາວ-ຣັດເຊຍ ຄັ້ງທີ 12 ໄດ້ຈັດຂຶ້ນ ລະຫວ່າງວັນທີ 12-13 ກໍລະກົດ ນີ້ ທີ່ນະຄອນຫລວງວຽງຈັນ,ໂດຍການເປັນປະທານຮ່ວມຂອງທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງ ທຶນ ແລະ ທ່ານ ນິໂຄລາຍ ນິກິຟໍຣອບ( Mr Nikolay NIkIFOROV) ລັດຖະມົນຕີກະຊວງໂທລະຄົມ ມະນາຄົມ ແລະ ການສື່ສານມວນຊົນ ແຫ່ງ ສະຫະພັນຣັດເຊຍ, ມີບັນດາຄະນະກໍາມາທິການຮ່ວມມືສອງຝ່າຍ, ພ້ອມດ້ວຍຜູ້ຕາງໜ້າຈາກກະຊວງຂະແໜງການທີ່ກ່ຽວຂ້ອງ ແລະ ພາກທຸລະກິດຣັດເຊຍເຂົ້າຮ່ວມ.
ກອງປະຊຸມຄັ້ງນີ້, ເພື່ອພ້ອມກັນປຶກສາຫາລື ແລະ ຜັນຂະຫຍາຍການຮ່ວມມື ລະຫວ່າງ ສປປ ລາວ ແລະ ສະຫະພັນຣັດເຊຍ ໃຫ້ນັບມື້ແໜ້ນແຟ້ນ, ມີບັນຍາກາດໃໝ່ ເພື່ອພ້ອມກັນຊຸກຍູ້ຂະຫຍາຍການຮ່ວມມື ທັງພາກລັດ-ພາກທຸລະກິດ ໃນຫລາຍຂົງເຂດ ເຊັ່ນ: ລະບົບໜັງສືຜ່ານແດນເອເລັກໂຕຣນິກ E-Government, ຄວາມປອດໄພດ້ານໄອທີ, ຂະແໜງພະລັງງານໄຟຟ້າ, ການບິນ, ກົນຈັກໜັກ, ເຕັກໂນໂລຊີໄອທີ ແລະ ເຄື່ອນນໍາທາງໃຫ້ນັບມື້ນັບຂະຫຍາຍຕົວຢ່າງບໍ່ຢຸດຢັ້ງ.
ພ້ອມນີ້, ສອງຝ່າຍເຫັນດີເປັນເອກະພາບ ໃນການປັບປຸງມາດຕະການເສີມຂະຫຍາຍການຮ່ວມມືດ້ານເສດຖະກິດ, ການຄ້າ-ການລົງທຶນ. ພ້ອມທັງໃຫ້ເອົາໃຈໃສ່ການຮ່ວມມືດ້ານການສຶກສາ, ວັດທະນະທໍາ-ສັງຄົມ ແລະ ການທ່ອງທ່ຽວ ໃນການແລກປ່ຽນ-ຖ່າຍທອດບົດຮຽນ, ຄວາມຮູ້ທາງດ້ານວິທະຍາສາດ-ເຕັກໂນໂລຊີ ຊັບພະຍາກອນທໍາມະຊາດ-ສິ່ງແວດລ້ອມ, ກະສິກໍາ, ວິທະຍາສາດການແພດ ແລະ ການເພີ້ມທຶນການສຶກສາ ຈາກ 15 ທຶນ ເປັນ 45 ທຶນ ແລະ ອື່ນໆໃຫ້ໄດ້ຮັບໝາກຜົນສູງສຸດ.
ພ້ອມດຽວກັນນີ້, ກອງປະຊຸມໄດ້ມີພິທີເຊັນບົດບັນທຶກຢັ້ງຢືນຜົນສໍາເລັດ ຂອງກອງປະຊຸມຄະນະກໍາມາທິການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ຣັດເຊຍ ຄັ້ງທີ 12 ເພື່ອເປັນພື້ນຖານຜົນປະໂຫຍດຮ່ວມກັນ ແລະ ສະແດງເຖິງເຈດຈໍານົງຂອງສອງຝ່າຍ ໃນການຮັດແໜ້ນສາຍພົວພັນມິດຕະພາບ ແລະ ເສີມຂະຫຍາຍການຮ່ວມມືທີ່ຫລາກຫລາຍ ເພື່ອຊຸກຍູ້ການພັດທະນາເສດ ຖະກິດ-ສັງຄົມ ຂອງສອງຝ່າຍ ລາວ-ຣັດເຊຍໃຫ້ດີຂຶ້ນກວ່າເກົ່າ.

================

ພາບແລະຂ່າວ: Pathedlao Lao

ບົດຄວາມໃຫມ່ໆ