ລາວ-ຣັດເຊຍ ສືບຕໍ່ຮັດແໜ້ນ ສາຍພົວພັນ ມິດຕະພາບ ແລະ ການເປັນຄູ່ຮ່ວມມືທີ່ດີ

ໃນໂອກາດເຂົ້າຮ່ວມ ພິທີລະນືກວັນໄຊຊະນະ ຂອງປະຊາຊົນຈີນ ໃນສົງຄາມຕ້ານການຮຸກຮານ ຂອງ ຍີ່ປຸ່ນ ແລະ ວັນໄຊຊະນະສົງຄາມ ຕ້ານຟາດຊິດໂລກ ຄົບຮອບ 70 ປີ ຄັ້ງນີ້, ທ່ານ ຈູມມາລີ ໄຊຍະສອນ ເລຂາທິການ ໃຫຍ່, ປະທານປະເທດ ແຫ່ງ ສປປ ລາວ ໄດ້ພົບປະກັບ ທ່ານ ວາລາດີເມຍ ປູຕິນ ປະທານາທິບໍດີ ​ແຫ່ງ​ ສະ​ພັນ​ຣັດ​ເຊຍ ໃນຕອນແລງຂອງວັນທີ 3 ກັນຍາ 2015 ຢູ່ນະຄອນຫລວງປັກກິ່ງ ສປຈີນ.

          ທ່ານ ຈູມ​ມາລີ ​ໄຊ​ຍະ​ສອນ ​ກ່າວ​ວ່າ: ສປປ ລາວ​ ຢາມ​ໃດ​ກໍຖື​ວ່າ​ຣັດ​ເຊຍ ​ເປັນ​ປະ​ເທດ​ເພື່ອນມິດທີ່​ໃກ້ຊິດ ​ແລະ ​ໃຫ້​ຄວາມ​ສຳຄັນ​ເປັນຢ່າງ​ຍິ່ງ ຕໍ່​ການ​ເປັນຄູ່​ຮ່ວມ​ມື ຍຸດ​ທະ​ສາດ​ກັບ ຣັດເຊຍ, ລວມທັງ​ສືບ​ຕໍ່ໃຫ້ການ​ ສະໜັບສະໜູນ​ເຊິ່ງ​ ແລະ ​ກັນ ​ໃນ​ເວທີພາກພື້ນ ​ແລະ ​ສາກົນ. ການ​ຮ່ວມ​ມື​ດ້ານ​ການຄ້າ, ການລົງທຶນ ​ແລະ ຂະ​ແໜງ​ການ​ອື່ນໆ ​ເຫັນ​ວ່າສືບ​ຕໍ່​ມີ​ການ​ຂະຫຍາຍຕົວ. ປັດຈຸບັນ ຣັດ​ເຊຍ ​ລົງທຶນ​ຢູ່​ລາວ​ລວມມູນ​ຄ່າ​ທັງ​ໝົດ ປະມານ 75 ລ້ານ​ໂດ​ລາ​ສະຫະລັດ. ປີ 2014 ຜ່ານມາ ສອງຝ່າຍ​ສາມາດ​ບັນລຸ​ຕົວ​ເລກ​ ການ​ຄ້າ​ນຳ​ກັນ​ໄດ້​ທັງ​ໝົດ ປະມານ 10 ລ້ານ​ກວ່າ​ໂດ​ລາ​ສະຫະລັດ.​ ໃນ​ນີ້ ​ລາວ​ ສົ່ງ​ອອກ​ໄປ​ຍັງ​ຣັດ​ເຊຍ​ ປະມານ 2 ລ້ານ​ກວ່າ​ໂດ​ລາ​ສະຫະລັດ.  ທ່ານ ​ຈູມ​ມາລີ ​ໄດ້​ກ່າວ​ສະ​ແດງ​ຄວາມ​ຍິນດີ ​ແລະ ຊົມ​ເຊີຍຣັດ​ເຊຍ​ ທີ່​ຈະ​ເປັນ​ເຈົ້າພາບ​ຈັດ​ກອງ​ປະຊຸມ​ ສຸດຍອດອາ​ຊຽນ-ຣັດ​ເຊຍ ​ໃນ​ປີ 2016 ​ເພື່ອສະ​ເຫລີ​ມສະຫລອງ ການ​ຮ່ວມ​ມື​ອາ​ຊຽນ-ຣັດເຊຍ ​ຄົບຮອບ 20 ປີ​​ ທີ່​ຣັດ​ເຊຍ. ສປປ ລາວ​ ໃນ​ຖານະ​ເປັນ​ປະ​ເທດປະສານ​ງານ ​ການ​ຮ່ວມ​ມື​ອາຊຽນ-ຣັດ​ເຊຍ ທັງ​ເປັນປະທານ​ອາ​ຊຽນ ຈະ​ໃຫ້ການ​ຮ່ວມ​ມື ​ແລະ ສະໜັບ​ສະ​ໜູນ​ຣັດ​ເຊຍ ​ໃນ​ການ​ຈັດ​ກອງ​ປະຊຸມດັ່ງກ່າວ ​ເພື່ອຮັບປະກັນ​ ໃຫ້​ໄດ້​ສຳ​ເລັດ​ຜົນ​ ຢ່າງ​ສະຫງ່າ​ງາມ.​

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງ ຕໍ່ຜົນສຳເລັດຂອງການແລກປ່ຽນ ການຢ້ຽມຢາມ ຂອງຄະນະຜູ້ແທນຂັ້ນສູງ ຕະຫລອດຄະນະວິຊາການ ລະຫວ່າງ ສອງປະເທດ ລາວ-ຣັດເຊຍ ໃນໄລຍະຜ່ານມາ ​ເຊິ່ງການຢ້ຽມຢາມດັ່ງກ່າວ ໄດ້ປະກອບສ່ວນສຳຄັນ ເຂົ້າໃນການສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືນັບມື້ນັບ ກ້າວຂຶ້ນສູ່ອັນໃໝ່. ປີ 2015 ນີ້ ເປັນປີຄົບຮອບ 55 ປີ ແຫ່ງການສ້າງຕັ້ງສາຍພົວພັນ ການທູດລາວ-ຣັດເຊຍ. ທັງສອງຝ່າຍ ເຫັນດີໃຫ້ກະຊວງ ການຕ່າງປະເທດ ທັງສອງປະເທດຄົ້ນຄວ້າ ປືກສາຫາລື ເພື່ອຈັດກິດຈະກຳ ສະເຫລີມສະຫລອງວັນດັ່່ງກ່າວ ຢ່າງຄືກຄື້ນມ່ວນຊື່ນ.

…………………………………………………………………………………………………………………………..

ທີ່​ມາ: www.kpl.gov.la