ລາວ-ຈີນ ຮ່ວມມືສ້າງຮູບເງົາດອກຈຳປາບານສະຫລອງ ສາຍພົວພັນການທູດ

 ຄັ້ງທຳອິດຂອງການຮ່ວມມື ລະຫວ່າງ ລາວ-ຈີນ ໃນການສ້າງຮູບເງົາເລື່ອງ “ດອກຈຳປາບານ ” ເພື່ອສະເຫລີມສະຫລອງ ສາຍພົວພັນການທູດ ລາວ-ຈີນ ຄົບຮອບ 55 ປີ ເຊິ່ງຈະໄດ້ດຳເນີນການ ຖ່າຍທຳໃຫ້ສຳເລັດ ແລະ ຈະສາຍອອກສູ່ສາຍຕາ ຂອງປະຊາຊົນສອງຊາດໃນໄວໆນີ້.

ໃຫ້ກຽດເຂົ້າຮ່ວມໂດຍທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ, ທ່ານ ວິທູນ ສູນດາລາ ຮັກວ່າການຫົວໜ້າກົມຮູບເງົາ, ທ່ານ ໂຈຢຽນ ປະທານບໍລິສັດ ຈົງສື້ຢາໄທ້ (ປັກກິ່ງ) ສື່ວັດທະນະທຳສາກົນຈຳກັດ ແລະ ມື່ມວນຊົນເຂົ້າຮ່ວມ.

ທ່ານ ວິທູນ ສູນດາລາ ກ່າວໃນງານຖະແຫລງຂ່າວ ສ້າງຮູບເງົາໃນວັນທີ 25 ຕຸລາ ນີ້ ທີ່ນະຄອນຫລວງວຽງຈັນ ວ່າ: ຮູບເງົາເລື່ອງດອກຈຳປາບານ ເປັນຮູບເງົາເລື່ອງທຳອິດ ທີ່ຈະສ້າງຂຶ້ນ ໂດຍການຮ່ວມມື ຂອງກົມຮູບເງົາ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ບໍລິສັດ ຈົງສື້ຢາໄທ້ ສື່ວັດທະນະທຳສາກົນຈຳກັດ ນະຄອນຫລວງປັກກິ່ງ ແຫ່ງ ສປ ຈີນ ເຊິ່ງເປັນຮູບເງົາ ທີ່ພັນລະນາເຖິງ ຄວາມຮັກທີ່ສວຍງາມຂອງສາວລາວ ແລະ ບ່າວຈີນ ທີ່ສະແດງໃຫ້ເຫັນເຖິງຄວາມສຳພັນ, ການຜູກມິດສຳພັນທີ່ດີ, ສ່ອງແສງໃຫ້ເຫັນການ ດຳລົງຊີວິດ, ທຳມະຊາດທີ່ສວຍສົດງົດງາມ, ວັດທະນະທຳຮີດຄອງປະເພນີອັນດີງາມ ຂອງສອງຊາດ ລາວ-ຈີນ, ພ້ອມທັງເປັນການເປີດຕະຫລາດຮູບເງົາ ຂອງສອງປະເທດໃຫ້ກວ້າງຂຶ້ນຕື່ມ.

ນອກຈາກນັ້ນ, ຍັງເປັນການປະກອບສ່ວນສຳຄັນ ໃນການສ້າງສາຍພົວພັນ ການຮ່ວມມື ໃນຂະແໜງວັດ ທະນະທຳ ຂອງສອງປະເທດ ໃຫ້ໄດ້ຮັບການພັດທະນາ ແລະ ເສີມຂະຫຍາຍໃຫ້ດີຂຶ້ນເລື້ອຍໆ.

======================

ພາບແລະຂ່າວ: Pathedlao Lao