ລາວ ກຽມສະເໜີທົ່ງໃຫຫີນເຂົ້າເປັນມໍລະດົກໂລກ

ໃນວັນທີ 17 ພະຈິກ 2015 ນີ້, ທີ່ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ ). ກົມມໍລະດົກ ຮ່ວມກັບ ອົງການອຸຍແນັດສະໂກ ປະຈໍາບາງກອກ ໄດ້ຈັດກອງປະຊຸມ ປຶກສາຫາລືວິຊາການລະດັບຊາດ ເພື່ອກະກຽມນໍາສະເໜີ ມໍລະດົກໃຫຫີນເຂົ້າເປັນ ແຫລ່ງມໍລະດົກໂລກ, ໂດຍມີທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການ ກະຊວງ ຖວທ, ທ່ານ ດຣ. ບຸນທ່ຽງ ສິຮິປະພັນ ຫົວໜ້າກົມມໍລະດົກ, ຫົວໜ້າກອງເລຂາ, ຄະນະກໍາມະການລະດັບຊາດ ເພື່ອມໍລະດົກໂລກ, ທ່ານ ສຈ. ວິນລຽມ ໂລແກນ ຊ່ຽວຊານຈາກອົງການ ອຸຍແນັດສະໂກ ປະຈໍາບາງກອກປະເທດໄທ, ບັນດາຫົວໜ້າກົມ, ຮອງກົມ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.

ທ່ານ ບົວເງິນ ຊາພູວົງ ກ່າວວ່າ: ກອງປະຊຸມວິຊາການລະດັບຊາດ ເພື່ອກະກຽມສະເໜີໃຫຫີນເປັນແຫລ່ງມໍລະດົກໂລກໃນຄັ້ງນີ້ ເພື່ອສຶກສາລາຍລະອຽດດ້ານວິຊາການ ໃນການກະກຽມເອກະສານ ແລະ ຂໍ້ມູນຕ່າງໆ ເພື່ອນໍາສະເໜີຕໍ່ ອົງການອຸຍແນັດສະໂກ ເຊິ່ງຜ່ານມາ ກໍໄດ້ຈັດຕັ້ງປະຕິບັດວຽກງານຄຸ້ມຄອງມໍລະດົກຂອງແຂວງຊຽງຂວາງ ໄດ້ດີສົມຄວນ ໂດຍສະເພາະແມ່ນ ການປຶກສາຫາລືການຄຸ້ມຄອງ ວັດທະນະທໍາທົ່ງໃຫຫີນ ທີ່ເປັນຍຸດທະສາດສໍາຄັນ ເພື່ອການຄົ້ນຄວ້າຮຽນຮູ້ ແລະ ການທ່ອງທ່ຽວພາຍໃນ ແລະ ຕ່າງປະເທດ. ການປົກປັກຮັກສາທົ່ງໃຫຫີນ ໃນໄລຍະຜ່ານມາ ເຫັນວ່າມີຄວາມຄືບໜ້າ ແລະ ໄດ້ຮັບຜົນສໍາເລັດຫລາຍດ້ານ ຂອງໂຄງການວາງອອກ ແຕ່ກໍຍັງເຮັດໃຫ້ ແຜນຄຸ້ມຄອງທົ່ງໃຫຫີນ ບໍ່ມີລະອຽດຄົບຖ້ວນ ເພື່ອນໍາສະເໜີຕໍ່ລັດຖະບານ ແຫ່ງສປປ ລາວ ແລະ ອົງການອຸຍແນັດສະໂກ.

ກອງປະຊຸມ ຜູ້ເຂົ້າຮ່ວມຈະໄດ້ແລກປ່ຽນຄໍາຄິດເຫັນ ກ່ຽວກັບຂັ້ນຕອນການຂຽນ ຄໍາຮ້ອງສະເໜີເຂົ້າເປັນມໍລະດົກໂລກ, ຄຸນຄ່າຈັກກະວານ ຂອງມໍລະດົກທົ່ງໃຫຫີນ, ມາດຖານເງື່ອນໄຂ, ຍຸດທະສາດການນໍາສະເໜີເຂົ້າ ເປັນມໍລະດົກໂລກ ແລະ ຄວາມພ້ອມຂອງແຂວງຊຽງຂວາງ ໃນການກະກຽມເອກະສານຄໍາຮ້ອງ ເຂົ້າເປັນມໍລະດົກໂລກ, ພ້ອມທິດທາງແຜນການໃນຕໍ່ໜ້າ.