ລາວໂທລະຄົມ ໄດ້ຮັບໃບຢັ້ງຢືນ ISO ຄຸ້ມຄອງ ຄວາມປອດໄພດ້ານຂໍ້ມູນຂ່າວສານ

ບໍລິສັດລັດ​ວິ​ສາ​ຫະກິດລາວ​ໂທລະ​ຄົມ (ລລທ) ​ໄດ້​ຮັບ​ໃບ​ຢັ້ງຢືນມາດຕະຖານ​ສາກົນ ISO/IEC 27001:2013 ດ້ານ​ລະບົບ​ບໍລິຫານ​ຄຸ້ມ​ຄອງ​ຄວາມ​ປອດ​ໄພ​ດ້ານ​ຂໍ້​ມູນ​ຂ່າວສານ ຈາກ​ອົງການ​ມາດຕະຖານ​ສາກົນ ຫລື International Organization For Standardization (ISO) ຢ່າງ​ເປັນ​ທາງ​ການ ​ເຊິ່ງພິທີ​ມອບ-ຮັບ​ໄດ້​ຈັດ​ຂຶ້ນ​ ໃນ​ວັນ​ທີ 15 ກັນຍາ 2015, ​ໂດຍ​ທ່ານ ມົນຕຣີ ຕັ້ງ​ເຕີມ ສີຣິກູນ ຜູ້​ຈັດການ​ທົ່ວ​ໄປ ບໍລິສັດ SGS ປະ​ເທດ​ໄທ ​ໃຫ້​ເປັນກຽດມອບ​ໃບ​ຢັ້ງຢືນ​ດັ່ງກ່າວ ​ໃຫ້​ທ່ານ ທອງ​ໃສ ຊານ​ໄຊ​ຍະ ຜູ້ອຳນວຍການ​ໃຫຍ່ ບໍລິສັດລັດ​ວິ​ສາ​ຫະກິດລາວ​ໂທລະ​ຄົມ, ມີ​ທ່ານ ດຣ. ທັນ​ສະ​ໄໝ ກົມມະ​ສິດ ລັດຖະມົນຕີ​ຊ່ວຍວ່າການ​ກະຊວງ ​ໄປສະນີ ​ໂທລະ​ຄົມ ມະນາຄົມ ​ແລະ ການ​ສື່ສານ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

ບໍລິສັດລັດ​ວິ​ສາ​ຫະກິດລາວ​ໂທລະ​ຄົມ ​ເປັນ​ບໍລິສັດ​ທຳ​ອິດ​ທີ່​ໄດ້​ຮັບໃບ​ຢັ້ງຢືນມາດຕະຖານ​ສາກົນ ISO/IEC 27001:2013 ​ເນື່ອງ​ຈາກໄດ້​ຄຳນຶງ​ເຖິງ​ຄວາມ​ສຳຄັນ​ຂອງ​ ຂໍ້​ມູນ​ຂ່າວສານ ​ແລະ ຖື​ເປັນ​ສິນ​ທີ່​ມີ​ຄຸນຄ່າ​ສູງ​ສຸດ​ຂອງ​ອົງ​ກອນ. ​ເພາະ​ໂລກ​ປັດຈຸບັນ​ໄດ້​ຖື​ຂໍ້​ມູນ​ຂ່າວສານ ​ເປັນ​ປັດ​ໄຈ​ສຳຄັນ​ໃນ​ການ​ດຳ​ເນີນ​ຊີວິດ ​ແລະ ການ​ເຄື່ອນ​ໄຫວ​ທາງ​ທຸລະ​ກິດ, ​ແຕ່​ໄພ​ຂົ່ມຂູ່​ທີ່​ເກີດ​ຂຶ້ນ​ຈາກ​ໂລກ​ອິນ​ເຕີ​ເນັດ ​ແລະ ​ໂລກ​ອອນ​ລາຍ ຕ່າງ​ກໍ​ນັບ​ມື້​ມີ​ຄວາມ​ທ້າ​ທາຍ, ​ເຖິງ​ຢ່າງ​ໃດ​ກໍ​ຕາມລລທ ກໍ​ໄດ້​ມີ​ຄວາມ​ກຽມພ້ອມ ​ໃນ​ການ​ກ້າວ​ສູ່​ປະຊາ​ຄົມ​ເສດຖະກິດອາຊຽນ​ໃນ​ທ້າຍ​ປີ​ນີ້. ດັ່ງ​ນັ້ນ ລລທ ຈຶ່ງ​ຈຳ​ເປັນ​ຕ້ອງໄດ້​ນຳລະບົບ​ບໍລິຫານ​ຄຸ້ມ​ຄອງ​ ທີ່​ໄດ້​ມາດຕະຖານ​ສາກົນ ​ເຂົ້າ​ມາ​ນຳ​ໃຊ້​ເພື່ອ​ສ້າງ​ຄວາ​ມໝັ້ນ​ໃຈວ່າ ​ຂໍ້​ມູນ​ຂ່າວສານ ລວມ​ເຖິງ​ລະບົບ​ເຕັກ​ໂນ​ໂລ​ຊີ​ດ້ານ​ຂໍ້​ມູນ​ຂ່າວສານ ຂອງ​ບໍລິສັດ ​ແລະ ຂອງ​ບຸກຄົນ ​ໂດຍ​ສະ​ເພາະ ​ແມ່ນ​ຂອງ​ລູກ​ຄ້າໄດ້​ຮັບ​ການ​ເບິ່ງ​ແຍງ​ຮັກສາ, ນຳ​ໃຊ້​ຢ່າງ​ຖືກຕ້ອງ ​ແລະ ມີຄວາມ​ປອດ​ໄພ.

ຜົນສຳ​ເລັດ​ດັ່ງກ່າວ ​ເປັນ​ການ​ຢັ້ງຢືນ​ເຖິງ​ຄວາມ​ເອົາ​ໃຈ​ໃສ່​ຂອງ​ບໍລິສັດ ​ໃນ​ການ​ປົກ​ປ້ອງ​ຂໍ້​ມູນ​ຂ່າວສານ ​ໃຫ້​ມີ​ຄວາມ​ປອດ​ໄພ, ​ໃຫ້​ເປັນຄວາມ​ລັບ, ທັງ​ມີ​ຄວາມ​ຖືກຕ້ອງ ​ແລະ ພ້ອມ​ໃຊ້​ງານ​ຕະຫລອດ​ເວລາ. ສິ່ງ​ສຳຄັນ​ແມ່ນ​ສ້າງ​ຄວາມໝັ້ນ​ໃຈ​ໃຫ້​ແກ່​ຜູ້​ໃຊ້​ບໍລິການຂອງ ລລທ ວ່າ​ໂອກາດ​ຫລົ້ມ​ເຫ​ລວ ຫລື ຂໍ້​ມູນ​ເສຍ​ຫາຍ ​ແມ່ນ​ມີໜ້ອຍທີ່​ສຸດ, ຫາກ​ຂໍ້​ມູນ​ຂ່າວສານ​ເກີດ​ຂັດຂ້ອງ ກໍ​ສາມາດ​ຮັບ​ມື ​ແລະ ​ເກັບ​ກູ້​ຄືນ​ໄດ້. ລລທ ​ໄດ້​ເປົ້າໝາຍ​ໃນ​ການ​ພັດທະນາ​ລະບົບ​ດັ່ງກ່າວ​ເປັນ 3 ​ໄລຍະ ​ຄື: ​ໄລຍະ​ທຳ​ອິດ​ເລີ່​ມກາງ​ ປີ 2015 ​ໂດຍ​​ເລີ່​ມຈາກ​ລະບົບການ​ເຝົ້າ​ລະວັງຕິດຕາມ​ເຄືອ​ຂ່າຍ​ໂທລະ​ຄົມ; ​ໄລຍະ​ທີ 2 ​ແມ່ນ​ຈະ​ສູ້​ຊົນ​ໃຫ້​ຄວບ​ຄຸມ​ໄປ​ທັງໝົດ ​ໃນ​ຂະ​ແໜງການ​ເຕັກນິກ ​ໃນ​ປີ 2016 ​ແລະ ​ໄລຍະ​ທີ 3 ​ແມ່ນ​ຈະ​ສືບຕໍ່ພັດທະນາ​ລະບົບ ISO/IEC 27001:2013 ​ໃຫ້​ຄວບ​ຄຸມ​ທຸກຂະ​ແໜງການ​ຂອງ ລລທ ​ໃນ​ປີ 2017 ທີ່ມາ kpl.gov.la