ລາວສົ່ງອອກສິນຄ້າເພີ່ມຂຶ້ນ ໄຟຟ້າກໍຂະຫຍາຍຕົວແຮງ ແຕ່ເສດຖະກິດຍັງຄົງທີ່

        ຜ່ານມາເຖິງແມ່ນວ່າ ສປປ ລາວ ຈະມີການໂຈະສົ່ງອອກສິນຄ້າບາງປະ ເພດເປັນຕົ້ນໄມ້ທ່ອນ ແລະແຮ່ທາດບາງຊະນິດໄປຕະຫຼາດຕ່າງປະເທດກໍຕາມແຕ່ພາບລວມການສົ່ງອອກຂອງປະເທດຍັງຄົງມີບັນຍາກາດຄຶກຄື້ນຢ່າງຕໍ່ເນື່ອງ ລວມ 9 ເດືອນສົກແລ້ວມີຈຳນວນເພີ່ມຂຶ້ນ 23,1% ຂະນະທີ່ຕົວເລກການນໍາເຂົ້າ ຫຼຸດລົງ 12,3% ຫາກທຽບ​ໃສ່ໄລຍະດຽວຂອງສົກກ່ອນ.

     ອີງຕາມຂໍ້ມູນການລາຍງານຂອງ ລັດຖະບານຕໍ່ກອງປະຊຸມສະພາຮູ້ວ່າ: ໃນໄລຍະ 9 ເດືອນສົກປີ 2015-2016 ທົ່ວປະເທດສາມາດຈັດຕັ້ງປະຕິບັດການ ສົ່ງອອກສິນຄ້າໄດ້ 3.157 ລ້ານໂດລາ ສະຫະລັດ ເພີ່ມຂຶ້ນ 23,1% ທັງນີ້ຜະລິດຕະພັນທີ່ສົ່ງອອກຕົ້ນຕໍປະກອບມີ ໄຟຟ້າ ເພີ່ມຂຶ້ນ 65%, ອຸປະກອນເຄື່ອງ ໃຊ້ໄຟຟ້າເພີ່ມຂຶ້ນ 38,1%, ແຮ່ທາດ ເພີ່ມຂຶ້ນ 37,1% ນອກນັ້ນກໍຍັງມີຜະລິດ ຕະພັນປຸງແຕ່ງ ແລະກະສິກຳຈຳນວນ ໜຶ່ງເຊັ່ນ: ສາລີ, ຢາສູບ, ກ້ວຍ, ເຂົ້າ, ສັດ ໃຫຍ່ ແລະອື່ນໆ.

     ສ່ວນມູນຄ່າການນຳເຂົ້າເຫັນວ່າຫຼຸດ ລົງ 12,3% ໃນຈຳນວນມູນຄ່າລວມ 3.041,95 ລ້ານໂດລາສະຫະລັດ ທັງນີ້ເນື່ອງຈາກໂຄງການກໍ່ສ້າງໃຫຍ່ໆຈຳນວນໜຶ່ງໄດ້ສຳເລັດການກໍ່ສ້າງ ນອກນັ້ນອຸປະກອນການກໍ່ສ້າງບາງຊະນິດ ສາມາດຜະລິດໄດ້ຢູ່ພາຍໃນປະເທດ ຈິ່ງ ເຮັດໃຫ້ຄວາມຕ້ອງການນຳເຂົ້າສິນຄ້າຫຼຸດລົງປະກອບກັບລາຄານ້ຳມັນລົງພາໃຫ້ມູນຄ່າການນຳເຂົ້າໃນພາບລວມຫຼຸດລົງໄປຕາມໆກັນ.

      ທັງໝົດນັ້ນແມ່ນໄດ້ເຮັດໃຫ້ໃນຊ່ວງດັ່ງກ່າວລາວມີຕົວເລກເກີນດູນການຄ້າທັງໝົດ 115,05 ລ້ານໂດລາສະຫະລັດ. ແນວໃດກໍດີ ຖ້າມາສັງເກດເບີ່ງການສົ່ງອອກເຫັນວ່າໄຟຟ້າມີການຂະຫຍາຍ ຢ່າງແຮງ ເນື່ອງຈາກຫຼາຍໂຄງການ ໃຫຍ່ໄດ້ເລີ່ມເດີນເຄື່ອງຜະລິດໄຟຂາຍ ເປັນຕົ້ນແມ່ນໂຮງງານໄຟຟ້າຖ່ານຫີນ ຫົງສາ 1.878 ເມກາວັດ, ເຂື່ອນນ້ຳ ຄານ 2 ມີ 130 ເມກາວັດ, ນ້ຳງຽບ 2 ມີ 180 ເມກາວັດ, ຫ້ວຍລຳພັນໃຫຍ່ 88 ເມກາວັດ ແລະເຂື່ອນນ້ຳອູ 2, 5, 6 ມີ 540 ເມກາວັດ ເຮັດໃຫ້ດຽວນີ້ທົ່ວປະ ເທດແຫຼ່ງຜະລິດໄຟຟ້າທັງໝົດແລ້ວ 40 ແຫ່ງມີກຳລັງຕິດຕັ້ງ 6.300 ກວ່າເມ ກາວັດສາມາດຜະລິດພະລັງງານໄດ້ 33 ພັນ​ເມກາວັດໂມງຕໍ່ປີ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.