ລາວຢືນຢັນໃກ້ລົງມືກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ

ຕາມຂ່າວຈາກທາງໜັງສືພິມເສດຖະກິດ-ສັງຄົມ ລາຍງານວ່າ: ເມື່ອບໍ່ດົນມານີ້, ທີ່ຫ້ອງວ່າການລັດຖະບານ ໄດ້ຈັດກອງປະຊຸມຊີ້ນຳໂຄງການກໍ່ສ້າງທາງລົດໄຟລາວ-ຈີນ, ພາຍໃຕ້ການເປັນປະທານຂອງທ່ານ ສົມສະຫວາດ ເລັ່ງສະຫວັດ ກຳມະການການເມືອງສູນກາງພັກ, ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ

ກອງປະຊຸມ, ໄດ້ລາຍງານກ່ຽວກັບການຈັດຕັ້ງປະຕິບັດໂຄງການ ໃນໄລຍະຜ່ານມາ, ຊຶ່ງນັບແຕ່ໄດ້ລາຍງານຄວາມຄືບໜ້າຂອງໂຄງການນັບແຕ່ເດືອນ ມີນາ 2015 ມານີ້, ການນຳຂັ້ນສູງສຸດ ແລະ ຄະນະຊີ້ນຳໂຄງການທັງສອງປະເທດລາວ-ຈີນກໍໄດ້ພ້ອມກັນຊຸກຍູ້ໂຄງການໃຫ້ມີການຮ່ວມມືຢ່າງສະໜິດແໜ້ນ, ຄາດວ່າໃນທ້າຍປີນີ້ທັງສອງຝ່າຍ ຈະໄດ້ວາງສີລາລືກກໍ່ສ້າງໂຄງການທາງລົດໄຟລາວ-ຈີນ ຮ່ວມກັນ ຢູ່ ນະຄອນຫລວງວຽງຈັນ ເພື່ອເປັນການສະເຫລີມສະຫລອງ ວັນຊາດທີ 2 ທັນວາ ວັນສ້າງຕັ້ງ ສປປ ລາວ ຄົບຮອບ 40.

ໃນກອງປະຊຸມຄັ້ງນີ້ ຍັງໄດ້ປຶກສາຫາລືກ່ຽວກັບການກຽມຄວາມພ້ອມ ເພື່ອອຳນວຍຄວາມສະດວກແກ່ໂຄງການ, ເປັນຕົ້ນແມ່ນດ້ານແຮງງານ, ການສະໜອງຂອງຝ່າຍລາວດ້ານວັດຖຸອຸປະກອນ, ເຕັກນິກ ແລະ ສະບຽງອາຫານໃຫ້ແກ່ໂຄງການລວມເຖີງການຄຸ້ມຄອງແລວທາງຕາມເສັ້ນທາງລົດໄຟ, ການແທນຄືນທີ່ດິນປູກຝັງແລະບ້ານເຮືອນຊອງປະຊາຊົນທີ່ຖືກຜົນກະທົບ, ການກະກຽມດ້ານນິຕິກໍາຕ່າງໆ, ວຽກງານປ້ອງກັນຄວາມສະຫງົບ ແລະ ການບໍລິການ.

ເສັ້ນທາງລົດໄຟ ລາວ-ຈີນ ມີຄວາມຍາວທັງໝົດ 417 ກິໂລແມັດ, ຄວາມກ້ວາງຂອງລາງ 1,43 ແມັດ, ເປັນລາງດ່ຽວ ຊຶ່ງສາມາດນຳໃຊ້ຄູ່ກັນລະຫວ່າງລົດໄຟຂົນສົ່ງໂດຍສານທີ່ມີຄວາມໄວ 160 ກິໂລແມັດຕໍ່ຊົ່ວໂມງ ແລະ ລົດໄຟຂົນສົ່ງສິນຄ້າຄວາມໄວ 120 ກິໂລແມັດ, ປະກອບມີ 5 ສະຖານນີ, ມູນຄ່າການກໍ່ສ້າງເບື້ອງຕົ້ນ 6,8 ຕື້ໂດລາ ໃນກຳນົດ 5 ປີສ້າງສຳເລັດ.