ລາວຈະກໍ່ສ້າງເຂື່ອນໄຟຟ້າ ນໍ້າງຶ່ມ 3 ທີ່ມີກໍາລັງການຜະລິດ

ເຂື່ອນໄຟຟ້ານໍ້າງຶ່ມ 3 ແມ່ນໂຄງການໜຶ່ງທີ່ສໍາຄັນ ນອນຢູ່ໃນແຜນແມ່ບົດ ເພື່ອພັດທະນາລະບົບໄຟຟ້າຢູ່ ສປປ ລາວ ແຕ່ນີ້ຮອດປີ 2020, 
ທ່ານ ສີສະຫວາດ ທິຣະວົງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້ານໍ້າງຶ່ມ 3 ແມ່ນເຂື່ອນໄຟຟ້າຂະໜາດໃຫຍ່ ເຊິ່ງລັດຖະບານ ໄດ້ມອບໃຫ້ລັດວິສາຫະກິດໄຟຟ້າລາວ ເປັນຜູ້ພັດທະນາໂດຍກົງ, ລັກສະນະ ຂອງເຂື່ອນຈະເປັນແບບຫີນຖົມ ດ້ານໜ້າເທຄອນກຣີດ, ມີລວງສູງ 220 ແມັດ, ຄວາມຍາວຂອງສັນເຂື່ອນມີ 395 ແມັດ ເນື້ອທີ່ອ່າງໂຕ່ງນໍ້າປະມານ 3,913 ກິໂລຕາແມັດ (km2) ສະເລ່ຍປະລິມານ ນໍ້າໄຫຼເຂົ້າອ່າງ ປະມານ 110 ແມັດກ້ອນຕໍ່ວິນາທີ. ຈະມີກໍາລັງຕິດຕັ້ງ ທັງໝົດ 480 MW ແລະ ສາມາດຜະລິດ ພະລັງງານໄຟຟ້າໄດ້ 2,345 ລ້ານກິໂລວັດໂມງຕໍ່ປີ ແລະ ມີຄວາມສາມາດ ສ້າງລາຍຮັບ ໄດ້ປະມານ 152 ລ້ານໂດລາສະຫະ ລັດຕໍ່ປີ, ມູນຄ່າກໍ່ສ້າງທັງໝົດ 1,290,024,000 ໂດລາສະຫະລັດ ໂດຍແມ່ນ ທະນາຄານ ຂາເຂົ້າ-ຂາອອກ ສປ ຈີນ ເປັນຜູ້ສະໜອງເງິນກູ້ໄລຍະຍາວ, ໄລຍະເວລາກໍ່ສ້າງປະມານ 5 ປີ, ຄາດວ່າປີ 2020 ຈະສໍາເລັດ ໂດຍແມ່ນບໍລິສັດ SINOHYDRO ຂອງ ສປ ຈີນ ເປັນຜູ້ຮັບເໝົາກໍ່ສ້າງ, ໂຄງການດັ່ງກາວ ແມ່ນມີຜົນກະທົບທາງດ້ານສິ່ງແວດລ້ອມ ໜ້ອຍທີ່ສຸດ ແລະ ຈະສ້າງວຽກເຮັດງານທຳ ໃຫ້ແກ່ປະຊາຊົນຈຳນວນ 1,500 ຄົນ, ພາຍຫລັງ ການກໍ່ສ້າງສໍາເລັດ ກະແສໄຟຟ້າຈະສົ່ງເຂົ້າລະບົບໄຟຟ້າ ຂອງລັດວິສາຫະກິດໄຟຟ້າລາວ.


ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນໍາວຽກງານເສດຖະກິດ ການຜະລິດ ແລະ ການຈໍລະຈອນ ໄດ້ເຂົ້າຮ່ວມເປັນສັກຂີພິຍານໃນພິທີວາງສີລາເລີກໂຄງການກໍ່ສ້າງເຂື່ອນໄຟຟ້າ ດັ່ງກ່າວ ໃນວັນທີ 11 ພະຈິກ 2015 ຢູ່ສຳນັກງານໃຫຍ່ ລັດວິສາຫະກິດໄຟຟ້າລາວ ທີນະຄອນຫລວງວຽງຈັນ, ໂດຍມີ, ທ່ານ ດຣ. ຄໍາມະນີ ອິນທິລາດ ລັດຖະມົນຕີວ່າການ ກະຊວງພະລັງງານ ແລະ ບໍ່ແຮ່, ທ່ານ ສົມບັດ ເຢຽລີເຮີ ເລຂາຄະນະພັກແຂວງ ເຈົ້າແຂວງໆ ໄຊສົມບູນ, ທ່ານ ກວນ ຮວາ ປິ່ງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາ ສປປ ລາວ ແລະ ພາກສ່ວນທີ່ກຽ່ວຂ້ອງເຂົ້າຮ່ວມ.