ລາຍທີ 4!! ຣາໂອນິກເກັບຕົ໋ວລຸຍເອີທີພີໄຟນໍແລ້ວ

 

ມິລອສ ຣາໂອນິກ ແຣັກເກັດມື 6 ຂອງໂລກຊາວການາດາຄວ້າຕົ໋ວລຸຍເສິກເທັນນິດ “ເອທີພີ ເວິວ ທົວໄຟນໍ” ກາງເດືອນພະຈິກເປັນທີ່ຮຽບຮ້ອຍແລ້ວ ຫຼັງຈາກເຮັດຜົນງານທະລຸຜ່ານເຂົ້າຮອບຕັດເຊືອກເທັນນິດລາຍການ ໄຊນາ ໂອເພັນ ເມື່ອອາທິດກ່ອນ.

 

ມິລອສ ຣາໂອນິກ ນັກເທັນນິດຮ່າງສູງຄົນການາດາກາຍເປັນແຣັກເກັດລາຍທີ 4 ທີ່ຟັນທຸງວ່າຈະຜ່ານເຂົ້າຮອບໄປຫຼິ້ນໃນ “ເອທີພີ ເວິວ ທົວໄຟນໍ” ທີ່ນະຄອນລອນດອນປະເທດອັງກິດລະຫວ່າງວັນ 13-20 ພະຈິກນີ້ເປັນທີ່ຮຽບຮ້ອຍແລ້ວ.

 

ນັກຫວດຮ່າງຍັກອາຍຸ 25 ປີຫາກໍເຂົ້າຮອບຮອງຊະນະເລີດລາຍການ ໄຊນາ ໂອເພັນ ທີ່ປັກກິ່ງປະເທດຈີນເມື່ອອາທິດຜ່ານມາແຕ່ກໍຕ້ອງຖອນໂຕເນື່ອງຈາກວ່າອາການບາດເຈັບບໍລິເວນຂໍ່ຂາ ແຕ່ນັ້ນກໍພຽງພໍທີ່ເຮັດໃຫ້ເຂົາໄປແຂ່ງ ເວິວ ທົວ ໄຟນໍ ໃນເດືອນພະຈິກນີ້ຕໍ່ຈາກ ໂນວັກ ໂຢໂຄວິກ, ແອນດີ ມາຣີ້ ແລະ ສະແຕນ ວາຣິນກ້າ.

 

ຣາໂອນິກ ທີ່ໄດ້ສິດທິຫຼິ້ນລາຍການໃຫຍ່ສົ່ງທ້າຍປີເປັນຄັ້ງທີສອງຕໍ່ຈາກປີ 2014 ກ່າວວ່າ “ຂ້ອຍມີລະດູການທີ່ດີທີ່ສຸດໃນປີນີ້ ແລະ ມັນຖືເປັນລາງວັນອັນດີທີ່ໄດ້ເປັນໜຶ່ງໃນຜູ້ຫຼິ້ນບໍ່ເທົ່າໃດຄົນທີ່ໄດ້ປີ້ໄປນະຄອນລອນດອນ ຂ້ອຍມັກຫຼິ້ນໃນອິນດໍຂອດ ແລະ ຕັ້ງຕາທີ່ຈະຈົບປີ 2016 ໃຫ້ສົມບູນແບບ”.

 

ໂຄຕ້າ ເອທີພີ ເວິວ ທົວ ໄຟນໍ ຍັງເຫຼືອອີກ 4 ໃບໃຫ້ຍາດກັນທັງ ເຄອິ ນິຊິໂຄຣິ, ກາແອວ ມົງຟິນ, ໂດມິນິກ ທຽມ ແລະ ຣາຟາເອວ ນາດາວ ເມື່ອມີເສິກ ມາສເຕີ ຊີຣີ ໃຫ້ຫຼິ້ນອີກ 2 ລາຍການທີ່ ຊຽງໄຮ້ ແລະ ປາຣີ.