ລັດ ໃຊ້ກົນໄກອວ່າຍໜີ້ສາມແຈ ແນໃສ່ກະຕຸ້ນເສດຖະກິດ

ອີງຕາມການລາຍງານຂອງ ສໍານັກຂ່າວສານປະເທດລາວ ວ່າ : ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ,  ລັດຖະມົນຕີ​ກະຊວງ​ການ​ເງິນ ​ໃຫ້​ຮູ້​ວ່າ:  ການຈັດ​ຕັ້ງ​ປະຕິບັດກົນ​ໄກ​ອ່ວາຍໜີ້ 3 ​ແຈ  ຂອງ​ລັດຖະບານ ​ໃນ​ໄລຍະ​ຜ່ານ​ມາ  ​ແມ່ນ​ມີ​ເປົ້າໝາຍ​ເຮັດ​ໃຫ້​ບັນດາ​ທຸລະ​ກິດ  ​ແລະ ທະນາຄານ ມີ​ສະພາບ​ຄ່ອງຕົວ,  ທັງ​ເປັນ​ການ​ກະ​ຕຸ້ນ​ເສດຖະກິດ ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ.  ​ໃນ​ນີ້, ໜີ້​ທີ່​ສາມາດ​ອວ່າຍ​ໄດ້  ​ຕ້ອງ​ເປັນ​ໂຄງການ​ທີ່​ສະພາ​ແຫ່ງ​ຊາດ​ຮັບຮອງ​ແລ້ວ,  ​ເປັນ​ໂຄງການ​ລົງທຶນ​ຂອງ​ລັດທີ່​ໄດ້ ​ຮັບ​ການຈັດ​ຕັ້ງ​ປະຕິບັດ​ສຳ​ເລັດ 100%,  ​ເປັນ​ໂຄງການ​ທີ່​ຜູ້​ຮັບ​ເໝົາ​ໄດ້​ນຳ​ເອົາ​ໂຄງການ  ຫລື ​ຫລັກ​ຊັບ​ອື່ນ​ໄປ​ຄ້ຳປະກັນ,  ​ເງິນ​ກູ້​ຢືມ​ຈາກ​ບັນດາ​ທະນາຄານທີ່​ຕັ້ງ​ຢູ່​ພາຍ​ໃນ​ປະ​ເທດ  ​ເພື່ອ​ຈັດ​ຕັ້ງ​ປະຕິບັດ​ໂຄງການ​ລົງທຶນ​ຂອງ​ລັດ.

ສຳລັບ​ກົນ​ໄກ​ການ​ອວ່າຍໜີ້  ຕາມ​ຄວາມ​ຮັບຜິດຊອບ​ຂອງ​ແຕ່ລະ​ຂະ​ແໜງການ ​ປະກອບມີ ທະນາຄານ​ແຫ່ງ ສປປ ລາວ  ​ເປັນ​ຜູ້​ກວດກາ​ສັນຍາ​ກູ້​ຢືມຂອງ​ບັນດາ​ບໍລິສັດ ກັບ​ບັນດາ​ທະນາຄານ ​ແລະ ຢັ້ງ ຢືນ​ຄວາມ​ຖືກຕ້ອງ;  ກະຊວງ​ແຜນການ ​ແລະ ການ​ລົງທຶນ​ເປັນ​ຜູ້​ກຳນົດ​ເງື່ອນ​ໄຂ​ການ​ອວ່າຍໜີ້,  ສັງ​ລວມ​ໜີ້ສິນ​ໂຄງການ​ລົງທຶນ​ຂອງ​ລັດ,  ກວດກາ​ຄວາມ​ຖືກຕ້ອງ​ຂອງ​ບັນດາ​ໂຄງການ  ຕາມ​ເງື່ອນ​ໄຂ​ທີ່​ກຳນົດ​ໄວ້,  ຄົ້ນຄວ້າ​ຈັດ​ສັນ​ເປັນ​ແຕ່​ລະ​ໂຄງການ ​ແລະ ຢັ້ງຢືນ​ແຜນການ​ຈັດ​ສັນ  ​ໃຫ້​ກະຊວງ​ການ​ເງິນ ​ເພື່ອ​ຊຳລະ​ສະ​ສາງ.  ທາງ​ດ້ານ​ກະຊວງ​ການ​ເງິນ ປະຕິບັດ​ການ​ຊຳລະ​ ຕາມ​ການຈັດ​ສັນ ​ແລະ ຢັ້ງຢືນ,  ທັງ​ກຳນົດ​ການ​ປະກອບ​ເອກະສານ​ຕ່າງໆ,  ພ້ອມ​ດຳ​ເນີນ​ການ​ກວດກາ​ຄວາມ​ຄົບ​ຖ້ວນ  ​ແລະ ດຳ​ເນີນ​ຂັ້ນ​ຕອນ​ອອກ​ພັນທະບັດ​ລັດຖະບານ  ​ເພື່ອ​ໃຫ້​ບັນດາ​ທະນາຄານ​ປົດໜີ້  ​ໃຫ້​ບັນດາ​ບໍລິສັດ.

ອີງ​ຕາມ​ການ​ສັງ​ລວມສະພາບໜີ້ສິນ  ທີ່​ສອດຄ່ອງ​ກັບ​ເງື່ອນ​ໄຂ​ດັ່ງກ່າວ​ ໃນ​ທົ່ວ​ປະ​ເທດ ມີ​ຈຳນວນ​ທັງໝົດ 3.250 ຕື້​ກີບ,  ປັດຈຸບັນໄດ້​ມີ​ບັນດາ​ບໍລິສັດທີ່​ໄດ້​ປະຕິບັດ​ ການ​ມອບ​ພັນທະ​ອາກອນ ​ແລະ ປະ ກອບ​ເອກະສານ​ຄົບ​ຖ້ວນ​ຕາມ​ເງື່ອນ​ໄຂ  ​ເພື່ອ​ຊຳລະ​ລວມທັງໝົດ 3.169,48 ຕື້​ກີບ, ​ເທົ່າ​ກັບ 97,54% ຂອງ​ແຜນການ.  ​ໃນ​ນີ້ ​ໄດ້​ມອບ-​ຮັບ ​ພັນທະບັດ ສຳ​ເລັດ​ແລ້ວ​ຈຳນວນ 2.817,25 ຕື້​ກີບ,  ​ເທົ່າ​ກັບ 86,7% ຂອງ​ແຜນການ​.  ສ່ວນ​ບັນດາ​ບໍລິສັດ ທີ່​ຍັງ​ບໍ່ທັນ​ປະກອບ​ເອກະສານ​ຂໍ​ຊຳລະ ​ເປັນ​ເງິນ 79,85 ຕື້​ກີບ, ສາ​ເຫດໜຶ່ງ​ແມ່ນ​ຍັງ​ບໍ່ທັນ​ປະຕິບັດ​ພັນທະ​ອາກອນ  ​ແລະ ​ເອກະສານ​ບໍ່ຄົບ​ຖ້ວນ.  ສຳລັບ​ບໍລິສັດ​ອີກ​ຈຳນວນໜຶ່ງ ທີ່​ສະ​ເໜີຂໍ​ອ່ວາຍໜີ້ 3 ​ແຈ  ​ແຕ່​ບໍ່​ໄດ້​ຮັບ​ການ​ພິຈາລະນາ ​ແມ່ນ​ຕິດ​ພັນ​ກັບ​ຫລາຍ​ບັນຫາ ​ ເປັນ​ຕົ້ນ ​ໂຄງການ​ບໍ່ສອດຄ່ອງ​ກັບ​ເງື່ອນ​ໄຂ  ​ແລະ ການ​ປະກອບ​ເອກະສານ ບໍ່ທັນ​ກຳນົດ​ເວລາ.

cr: tonamcha