ລັດເຊຍ-ອິນໂດເພີ່ມຄວາມຮ່ວມມືຕໍ່ຕ້ານການກໍ່ການຮ້າຍ

ສຳນັກຂ່າວຕ່າງປະເທດລາຍງານຈາກເມືອງນະຄອນກາຕ້າປະເທດອິນໂດເນເຊຍເມື່ອວັນທີ 10 ສິງຫາວ່າ ທ່ານ ເຊີເກ ລາຟຣອຟ ລັດຖະມົນຕີຊ່ວຍກະຊວງການຕ່າງປະເທດລັດເຊຍກ່າວຫຼັງການຫາລືກັບທ່ານນາງ ເຣັດໂນ ມາຊູດີ ລັດຖະມົນຊ່ວຍກະຊ່ວງການປະເທດອິນໂດເນເຊຍເມື່ອວັນພຸດທີ່ຜ່ານມາວ່າ ທັງສອງປະເທດເຫັນພ້ອມການຍົກລະດັບການຮ່ວມມືດ້ານການປ້ອງກັນ ແລະ ຕໍ່ຕ້ານໄພຄຸກຄາມຈາກການກໍ່ການຮ້າຍ ໂດຍມຸ່ງເນັ້ນເສີມຄວາມຮ່ວມມືດ້ານຄວາມປອດໄພທາງດ້ານໄຊເບີ ແລະ ການຈັດຫາມາດຕະການຮັບມືໄພຄຸກຄາມຈາກກຸ່ມກໍ່ການຮ້າຍໂດຍສະເພາະແມ່ນກຸ່ມໄອເອສ.

ທາງດ້ານທ່ານນາງ ມາຊູດີ ກ່າວວ່າ ການເພີ່ມຄວາມພະຍາຍາມໃນລະດັບທະວີພາຄີເພື່ອຈັດການກັບບັນຫາດັ່ງກ່າວຈະຍິ່ງເປັນການເສີມສ້າງປະສິດທິພາບຂອງປະຕິບັດການໃນອະນາຄົດ ຢູ່ໃນຄວາມວິຕົກກັງວົນຂອງທຸກຝ່າຍໃນພູມີພາກກ່ຽວກັບການສູ້ຮົບໃນເມືອງມາຣາວີເທິງເກາະມິນດານາຂອງຟິລິບປິນ ທີ່ເປັນສັນຍາລັກເຕືອນຄັ້ງສຳຄັນວ່າກຸ່ມໄອເອສຕ້ອງການຍ້າຍຖານທີ່່ໝັ້ນຈາກຕະເວັນອອກກາງມາທີ່ເອເຊຍຕະເວັນອອກສຽງໃຕ້ ນອກຈາກນີ້ ອິນໂດເນເຊຍຕ້ອງການຍົກລະດັບຄວາມຮ່ວມມືກັບລັດເຊຍໃນອີກຫຼາຍດ້ານທີ່ລວມເຖິງການຄ້າ ແລະ ການລົງທຶນ ນອກເໜືອຈາກຄວາມຮ່ວມມືດ້ານການເມືອງ ແລະ ຄວາມໝັ້ນຄົງທີ່ມີແຂງແກ່ນເປັນພື້ນຖານຢູ່ແລ້ວ.

ທັງນີ້ມີລາຍງານອີກວ່າ ລາຟຣອຟ ແລະ ມາຊູດີ ຫາລືກັນກ່ຽວກັບສະຖານະການທີ່ຄາບມະຫາສະໝຸດເກົາາຫຼີ ແລະ ຄວາມຂັດແຍ່ງເລື່ອງທະເລຈີນໃຕ້ອີກດ້ວຍ ແຕ່ບໍ່ມີການເປີດເຜີຍເຖິງລາຍລະອຽດ ຂະນະທີ່ ລາຟຣອຟ ຈະເດີນທາງໄປຢາມປະເທດໄທເປັນຈຸດໝາຍຕໍ່ໄປ ຫຼັງຈາກທີ່ເຂົ້າຮ່ວມປະຊຸມດ້າອາຊຽນວ່າດ້ວຍຄວາມຮ່ວມມືດ້ານການເມືອງ ແລະ ຄວາມໝັ້ນຄົງຢູ່ໃນພູມີພາກເອເຊຍ ແລະ ປາຊີຟິກ (ເອອາເອຟ) ທີ່ເມືອງມະນິລາເມື່ອອາທິດທີ່ຜ່ານມາແລ້ວດ້ວຍ.