ລັດວິສາຫະກິດລາວບໍລິການຄວາມປອດໄພເປີດສາຂາ ອຸດົມໄຊ

ລັດວິສາຫະກິດລາວບໍລິການຮັກສາຄວາມປອດໄພໄດ້ເປີດສາຂາໃໝ່ຢູ່ແຂວງອຸດົມໄຊ ຊຶ່ງພິທີເປີດຢ່າງ ເປັນທາງການແມ່ນຈັດຂຶ້ນທ້າຍອາທິດ ທີ່ຜ່ານມາ ຢູ່ທີ່ບ້ານນາສ້າວ ເມືອງໄຊ ເຂົ້າຮ່ວມມີທ່ານ ຄໍາພຽງ ຢາຈົງວາ ຮອງເຈົ້າແຂວງອຸດົມໄຊ,

ທ່ານ ພັນເອກ ຄານໄຊ ໄຊຍະຫານ ຕາງໜ້າກະຊວງ ປ້ອງກັນຄວາມສະຫງົບ, ທ່ານ ພັນເອກ ຄຳດີ ອ້ວນມະນີວົງ ອຳນວຍການໃຫຍ່ ລັດວິສາຫະກິດລາວ ບໍລິການຄວາມ ປອດໄພ, ຕາງໜ້າບໍລິສັດໄຮເຫວິຍ ບໍລິການເຕັກໂນໂລຊີຄວາມປອດໄພສາກົນ ຈຳກັດ, ມີບັນດາການນໍາແຂວງ, ບໍລິສັດ ແລະນັກລົງທຶນຈີນ ແລະມວນຊົນເຂົ້າຮ່ວມ.

ການເປີດສາຂາບໍລິການຮັກສາຄວາມປອດໄພທີ່ແຂວງອຸດົມໄຊ ຄັ້ງນີ້ ກໍເພື່ອເປັນການຂະຫຍາຍທຸລະກິດການຮັກສາຄວາມປອດໄພລົງສູ່ຕ່າງແຂວງ ຕາມຄວາມຮຽກຮ້ອງຕ້ອງການຂອງລູກຄ້າ, ຂະຫຍາຍຕາ ໜ່າງການບໍລິການໃຫ້ກວ້າງຂວາງ, ເຂັ້ມແຂງ, ມີຄຸນນະພາບ, ເຊື່ອຖືໄດ້ ແລະທຽບທັນກັບສາກົນປະກອບສ່ວນຊ່ວຍວຽກງານປ້ອງກັນຊາດ, ປ້ອງກັນຄວາມສະຫງົບຕ້ານ ແລະສະກັດກັ້ນປາ ກົດການຫຍໍ້ທໍ້ຕ່າງໆທີ່ອາດຈະເກີດຂຶ້ນໃນສັງຄົມຊ່ວຍດຶງດູດນັກທ່ອງທ່ຽວ ແລະນັກລົງທຶນທັງພາຍໃນ ແລະຕ່າງປະເທດທີ່ເຂົ້າມາປະເທດເຮົາດ້ວຍການສ້າງຄວາມເຊື່ອໝັ້ນທາງດ້ານຄວາມປອດໄພ ທັງເປັນການປັບປຸງ ແລະຍົກລະດັບຄຸນນະພາບກ່ຽວກັບການຮັກສາຄວາມປອດໄພຢູ່ບ້ານເຮົາໃຫ້ເປັນທີ່ຍອມຮັບ.

ສຳລັບລັດວິສາຫະກິດລາວ ບໍລິການຄວາມປອດໄພສາຂາແຂວງອຸດົມໄຊ ແມ່ນໄດ້ຮ່ວມມືກັບ ບໍລິສັດໄຮເຫວີຍ ບໍລິການເຕັກໂນໂລຊີຄວາມປອດໄພສາກົນ ແຫ່ງ ສປ ຈີນ ຊຶ່ງໄດ້ເລີ່ມຕົ້ນກໍ່ສ້າງຕັ້ງ ແຕ່ທ້າຍເດືອນສິງຫາ 2016 ເປັນຕົ້ນ ມາໃນເນື້ອທີ່ 1,1 ຕາແມັດໂດຍໃຊ້ງົບປະມານການກໍ່ສ້າງທັງໝົດ 20 ຕື້ກີບ ເປັນອາຄານ 3 ຊັ້ນ, ມີທັງໝົດ 12 ຫ້ອງ ຄືຫ້ອງການສັງລວມ, ຫ້ອງຝຶກອົບຮົມ, ຫ້ອງພັກພະນັກງານ, ຫ້ອງຫົວໜ້າ, ຫ້ອງຮັບແຂກ, ຫ້ອງປະຊຸມ, ຫ້ອງບັນຊີການເງິນ, ສາງເຄື່ອງ, ຫ້ອງນ້ຳ ແລະຫ້ອງສຳລັບຈັດງານລ້ຽງຕ່າງໆ.

ປະຈຸບັນທາງລັດວິສາຫະກິດດັ່ງກ່າວ ມີພະນັກງານປະຈຳທັງໝົດເກືອບ 20 ຄົນ ແລະຍັງຕ້ອງການຮັບສະໝັກເພີ່ມຕື່ມ ຊຶ່ງທາງສາຂາອຸດົມໄຊ ພ້ອມແລ້ວທີ່ຈະໃຫ້ການບໍລິການຄວາມປອດໄພແກ່ສັງຄົມ.

Cr: http://www.sedthakid.la

 

ບົດຄວາມໃຫມ່ໆ