ລັດຖະມົນຕີ ຖວທ ຕ້ອນຮັບທູດ ຫວຽດນາມຄົນໃໝ່

ລັດຖະມົນຕີ ຖວທ ຕ້ອນຮັບທູດ ຫວຽດນາມຄົນໃໝ່

ວັນທີ 10 ພຶດສະພານີ້, ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ຫງວຽນບາຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໃນໂອກາດທີ່ມາຮັບໜ້າທີ່ໃໝ່ຢູ່ ສປປ ລາວ. ໂອກາດນີ້, ທ່ານລັດຖະມົນຕີ ບໍ່ແສງຄຳ ວົງດາລາ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບທ່ານທູດ ຫງວຽນ ບາຮຸ່ງ ທີ່ມາຮັບໜ້າທີ່ເປັນເອກອັກຄະລັດຖະທູດ ສສ ຫວຽດ ນາມ ຄົນໃໝ່ປະຈຳລາວ ໃນເທື່ອນີ້ ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ ຄວາມສາມັກຄີ ແບບພິເສດການຮ່ວມມືຮອບດ້ານລະຫວ່າງ ລາວ - ຫວຽດນາມ ນັບມື້ນັບຂະຫຍາຍຕົວ ຍິ່ງໆຂຶ້ນ. ທ່ານທູດ ຫງວຽນບາຮຸ່ງ ໄດ້ສະ ແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ທ່ານລັດຖະມົນຕີໃນເທື່ອນີ້ ແລະ ພ້ອມທັງຢືນຢັນຈະເຮັດ ໜ້າທີ່ເສີມຂະຫຍາຍສາຍພົວ ພັນມິດຕະພາບ ລາວ - ຫວຽດ ນາມ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ໂອກາດດັ່ງກ່າວ ທ່ານ ລັດຖະມົນຕີ ແລະ ທ່ານທູດ ຍັງໄດ້ປຶກສາຫາລືກັນຫຼາຍບັນຫາກ່ຽວກັບສາຍພົວພັນການ ຮ່ວມມືຄວາມສາມັກຄີລະຫວ່າງ ສອງປະເທດລາວ - ຫວຽດ ນາມ ໂດຍສະເພາະໃນ ປີ 2017 ນີ້, ສອງປະ ເທດຈະໄດ້ປະສານສົມທົບກັນຈັດຕັ້ງບັນດາກິດຈະກຳການເຄື່ອນໄຫວສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ - ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ, ການຮ່ວມມືລາວ - ຫວຽດນາມ ຄົບຮອບ 40 ປີ ໃຫ້ມີບັນຍາກາດຄຶກຄື້ນປະກອບສ່ວນເຂົ້າໃນການເສີມ ຂະຫຍາຍສາຍພົວພັນອັນ ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ - ລັດ ແລະ ປະຊາຊົນສອງຊາດ ລາວ - ຫວຽດນາມ ນັບມື້ນັບກ້າວ ເຂົ້າສູ່ລວງເລິກ ແລະ ມີປະສິດ ທິຜົນສູງຍິ່ງໆຂຶ້ນ. (ຂ່າວ: ກາວັນທີ)

Cr: http://www.pasaxon.org.la