ລັດຖະມົນຕີຕ່າງປະເທດ ແຫ່ງ ສປປ ລາວ ສຳເລັດການຢ້ຽມຢາມ ຮົງກາຣີ ຢ່າງເປັນທາງການ

ໂດຍ​ຕອບ​ສະໜອງ​ຕາມ​ຄໍາ​ເຊີນ ​ຂອງ​ທ່ານ ປີ​ເຕີ ຊີ​ຈາ​ໂຕ (Peter Szijjiarto) ລັດຖະມົນຕີ ກະຊວງການຕ່າງປະເທດ ແລະ ການຄ້າ ຮົງກາລີ; ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງ ການຕ່າງປະເທດ ແຫ່ງ ສປປ ລາວ ແລະ ຄະນະໄດ້ເດີນທາງໄປຢ້ຽມຢາມ ຮົງກາຣີ ຢ່າງເປັນທາງການ ໃນວັນທີ 30-31 ພຶດສະພາ 2017. ການຢ້ຽມຢາມດັ່ງກ່າວ ໄດ້ດໍາເນີນຂຶ້ນ ໃນປີແຫ່ງການສະຫລອງ ສາຍພົວພັນການທູດ ຄົບຮອບ 55 ປີ ລະຫວ່າງ ສອງປະເທດ, ຊຶ່ງເປັນນິມິດໝາຍອັນດີ ໃຫ້ແກ່ການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ຮົງກາຣີ.
ໃນຕອນເຊົ້າຂອງວັນທີ 31 ພຶດສະພາ 2017, ທ່ານ ສະເຫລີມໄຊ ກົມມະສິດ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ອິດສະວານ ຈາກັບ ຮອງປະທານສະພາແຫ່ງຊາດ ຮົງກາຣີ ທັງເປັນຜູ້ຮັກສາການ ປະທານສະພາແຫ່ງຊາດ. ໃນໂອກາດນີ້, ທັງສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສະພາແຫ່ງຊາດຂອງສອງປະເທດ ທີ່ໄດ້ຮັບການເພີ່ມ ທະວີຂຶ້ນ ໃນປີທີ່ຜ່ານມາ ຜ່ານການແລກປ່ຽນ ການຢ້ຽມຢາມຊຶ່ງກັນ ແລະ ກັນລະຫວ່າງ ຄະນະຜູ້ແທນຂັ້ນສູງສຸດ ຂອງສະພາທັງສອງ. ໃນຕອນບ່າຍຂອງວັນດຽວກັນ, ໄດ້ມີການ ດຳເນີນການພົບປະ ຢ່າງເປັນທາງການ ລະຫວ່າງ ລັດຖະມົນຕີຕ່າງ ປະເທດລາວ ແລະ ຮົງກາຣີ, ທີ່ກະຊວງການຕ່າງປະເທດຮົງກາລີ. ທັງສອງຝ່າຍໄດ້ຕີລາຄາສູງ ຕໍ່ການພົວພັນ ມິດຕະພາບ ແລະ ການຮ່ວມມືທີ່ມີມູນເຊື້ອ ອັນດີງາມມາແຕ່ດົນນານ ແລະ ສືບຕໍ່ເຕີບໃຫຍ່ ຂະຫຍາຍຕົວຢ່າງບໍ່ຢຸດຢັ້ງ, ໂດຍໄດ້ມີການໃຫ້ການ ສະໜັບສະໜູນ ແລະ ຊ່ວຍເຫລືອ ຊຶ່ງກັນ ແລະ ກັນ ທັງໃນຂອບສອງຝ່າຍ ແລະ ຫລາຍຝ່າຍ ໃນເວທີພາກພື້ນ ແລະ ສາກົນ. ພ້ອມກັນນັ້ນ, ສອງຝ່າຍໄດ້ເຫັນດີຈະສືບຕໍ່ ແລກປ່ຽນການຢ້ຽມຢາມ ຊຶ່ງກັນ ແລະ ກັນ ຂອງຄະນະຜູ້ແທນ ໃນລະດັບການນຳຂັ້ນສູງ ຕະຫລອດຮອດ ລະດັບວິຊາການ, ລວມທັງ ລະຫວ່າງ ສອງນະຄອນຫລວງບູດາແປສ ແລະ ນະຄອນຫລວງວຽງຈັນ; ຈະຊຸກຍູ້ໃຫ້ພາກ ສ່ວນກ່ຽວຂ້ອງສອງຝ່າຍ ເລັ່ງລັດການກະກຽມສັນຍາຮ່ວມມື ແລະ ສັນຍາເງິນກູ້ໄລຍະ 3 ຈໍານວນ 160 ລ້ານເອີໂຣ ໃຫ້ແກ່ ສປປ ລາວ ເພື່ອໃຫ້ໄດ້ລົງນາມໃນທ້າຍປີ 2017 ນີ້ ເພື່ອນໍາໃຊ້ເຂົ້າໃນການປະຕິບັດ ໂຄງການຂະແໜງກະສິກໍາ, ໂຄງການຄຸ້ມຄອງບໍລິຫານນໍ້າ ນະຄອນຫລວງວຽງຈັນ, ແລະ ໂຄງການຄຸ້ມຄອງພົນລະເມືອງ; ແລະ ເຫັນດີຈະຊຸກຍູ້ ການຮ່ວມມືໃນຂົງເຂດເສດ ຖະກິດ-ການຄ້າ, ການລົງທຶນ, ພະລັງງານ, ການສຶກສາ, ວິທະຍາສາດ-ເຕັກໂນໂລຊີ, ກະສິກໍາ, ອຸດສະຫະກໍາປຸງແຕ່ງ ແລະ ຂະແໜງການອື່ນໆ ທີ່ສອງ ປະເທດມີທ່າແຮງ ແລະ ຄວາມສົນໃຈຮ່ວມກັນ. ສອງຝ່າຍໄດ້ເຫັນພ້ອມກັນວ່າ ໃນອະນາຄົດສອງປະເທດ ຈະອອກແຮງເພີ່ມທະວີ ການພົວພັນຮ່ວມມື ທີ່ມີມາແລ້ວນັ້ນໃຫ້ມີ ໝາກຜົນສູງກວ່າເກົ່າ ເພື່ອຍົກລະດັບ ການພົວພັນສອງຝ່າຍ ຂຶ້ນສູ່ຈຸດສູງສຸດໃນໄລຍະໃໝ່.


ໃນໂອກາດັ່ງກ່າວ, ທ່ານ ສະເຫລີມໄຊ ກົມມະສິດ ກໍໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈຢ່າງສູງ ຕໍ່ການຊ່ວຍເຫລືອອັນໃຫຍ່ຫລວງ ຂອງລັດຖະບານ ແລະ ປະຊາຊົນຮົງກາຣີ ໃຫ້ແກ່ ສປປ ລາວ ໃນໄລຍະຜ່ານມາ  ກໍຄືປະຈຸບັນ ໃນການຊ່ວຍກໍ່ສ້າງ ຊັບພະຍາກອນມະນຸດ ແລະ ການໃຫ້ເງິນກູ້ຢືມງວດ 2 ແກ່ຝ່າຍລາວ ຈໍານວນ 30 ລ້ານໂດລາ; ພ້ອມທັງໄດ້ສະເໜີ ໃຫ້ຝ່າຍຮົງກາຣີ ສືບຕໍ່ການຮ່ວມມື ແລະ ຊ່ວຍເຫລືອ ສປປ ລາວ ດ້ານການພັດທະນາ ກະສິກໍາ-ລ້ຽງສັດ ເພື່ອຜະລິດເປັນສິນຄ້າ ແລະ ການສ້າງຊັບ ພະຍາກອນມະນຸດ ກໍຄື ໃຫ້ທຶນການສຶກສາ ແລະ ທຶນຝຶກອົບຮົມ ຫລື ທຶນໄປທັດສະນະ ສຶກສາໄລຍະສັ້ນ ທີ່ຮົງກາຣີ ໃຫ້ແກ່ພະນັກງານຂັ້ນຕ່າງໆ ຂອງ ສປປ ລາວ.
ໃນຂະນະດຽວກັນ, ຝ່າຍຮົງກາຣີ ກໍໄດ້ສະແດງຄວາມຍິນດີ ແລະ ໃຫ້ຄໍາຢືນຢັນວ່າ ລັດຖະບານຮົງກາຣີ ຈະສືບຕໍ່ໃຫ້ການຮ່ວມມື ດ້ານການສຶກສາ ໂດຍສະເພາະ ສືບຕໍ່ໃຫ້ທຶນ ການສຶກສາແກ່ ສປປ ລາວ ຈໍານວນ 50 ທຶນຕໍ່ປີ.
ໃນດ້ານການຕ່າງປະເທດ, ສອງຝ່າຍເຫັນດີ ຈະຈັດກອງປະຊຸມ ການປຶກສາຫາລືແລກປ່ຽນບົດຮຽນ ລະຫວ່າງ ສອງກະຊວງການຕ່າງປະເທດ ລາວ-ຮົງກາຣີ ໃນລະດັບວິຊາການ ໃນທຸກໆປີ, ນັບທັງການ ກະກຽມຈັດກິດຈະກໍາ ສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ-ຮົງກາຣີ ຄົບຮອບ 55 ປີ (12 ກັນຍາ 1962 - 12 ກັນຍາ 2017) ໃນປີ 2017 ເພື່ອເປັນເຫດ ການປະຫວັດສາດ ໃນການພົວພັນລະຫວ່າງສອງປະເທດ, ແລະ ຈະສືບຕໍ່ໃຫ້ການສະໜັບສະໜູນຊຶ່ງກັນ ແລະ ກັນໃນເວທີສາກົນ. ໃນຂະນະດຽວກັນ, ສອງຝ່າຍຍັງໄດ້ແຈ້ງສະພາບໂດຍຫຍໍ້ ກ່ຽວກັບການພັດທະນາ ເສດຖະກິດ-ສັງຄົມ ຂອງແຕ່ລະປະເທດໃຫ້ກັນຊາບ, ພ້ອມທັງໄດ້ມີການແລກປ່ຽນຄຳເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ ແລະ ມີຄວາມເປັນເອກະພາບກັນໃນ ດ້ານຈຸດຢືນ ແລະ ທັດສະນະດ້ວຍດີ.
ພາຍຫລັງພົບປະສອງຝ່າຍ ຢ່າງເປັນທາງການ, ສອງຝ່າຍໄດ້ພົບປະກັບນັກຂ່າວ ແລະ ຖະແຫລງຂ່າວຜົນ ການພົບປະສອງຝ່າຍ ແລະ ຜົນສຳເລັດຂອງການຢ້ຽມຢາມ ທາງການໃນຄັ້ງນີ້ ຕໍ່ສື່ມວນຊົນ.

Cr:http://kpl.gov.la