ລັດຖະມົນຕີກະຊວງການເງິນ ເຄື່ອນໄຫວເຮັດວຽກຢູ່ແຂວງບໍລິຄຳໄຊ

 ໃນ​ວັນ​ທີ 9 ກັນຍາ 2015, ​ຄະນະ​ນຳ​ ກະຊວງ​ການ​ເງິນ ນຳ​ໂດຍ ທ່ານ ດຣ ລຽນ ທີ​ແກ້ວ ເລຂາຄະນະພັກ, ລັດຖະມົນຕີ​ ວ່າການ ກະຊວງ​ ການ​ເງິນ,ພ້ອມ​ດ້ວຍ ​ຄະນະ​ ​ໄດ້​ເຄື່ອນໄຫວ ເຮັດ​ວຽກ ​ແລະ ຊຸກຍູ້​ ການ​ເກັບ ລາຍ​ຮັບ​ຢູ່​ແຂວງ​ບໍລິ​ຄຳ​ໄຊ ​​ໂດຍ​ການ​ຕ້ອນຮັບ ​ຂອງ ທ່ານ ກອງ​ແກ້ວ ​ໄຊ​ສົງຄາມ ​ເລຂາ​ພັກ​ແຂວງ, ​ເຈົ້າ​ແຂວງໆ ບໍລິ​ຄຳ​ໄຊ, ຫົວໜ້າ​ ພະ​ແນ​ກ ການ​ເງິນ​ແຂວງ ເຂົ້າ​ຮ່ວມ.

 ໃນ​ໂອກາດດັ່ງກ່າວ ທ່ານ ກອງ​ແກ້ວ ​ໄຊ​ສົງຄາມ ​ໄດ້​ຂຶ້ນ​ລາຍ​ງານ​ ສະພາບ​ການ​ ພັດທະນາ​ເສດ ຖະກິດ-ສັງຄົມ​ ໃນ​ສົກ​ປີ 2014-2015 ​ເຊິ່ງທ່ານ ​ໄດ້​ຍົກ​ໃຫ້​ເຫັນ ການ​ຂະຫຍາຍຕົວ ເສດຖະກິດ ຢູ່​ແຂວງ​ບໍລິ​ຄຳ​ໄຊ​ ມີ​ຈັງ​ຫວະ​ໝັ້ນ​ທ່ຽງ ​ສະເລ່ຍ 8,9% ຕໍ່​ປີ, ​ໃນ​ນັ້ນ ກະສິກຳ​ກວມ 42% ຂອງ​ຈີ​ດີ​ພີ, ອຸດສາຫະກຳ​ ກວມ​ເກືອບ 30% ​ແລະ ການ​ບໍລິການ ກວມ 28% ຂອງ​ຈີ​ດີ​ພີ ສະ​ເລ່ຍ ຕໍ່​ຫົວ​ຄົນ​ບັນລຸ 13 ລ້ານ​ກວ່າ​ກີບ ຫລື ​ເທົ່າ​ກັບ 1.621 ​ໂດ​ລາ ຕໍ່​ຄົນ​ຕໍ່​ປີ, ສະ​ເລ່ຍ​ເຂົ້າ​ກິນ 568 ກິ​ໂລຕໍ່​ຄົນ​ຕໍ່​ປີ. ດ້ານ​ການ ​ລົງທຶນ​ ຂອງ​ລັດ ມີ 204 ​ໂຄງການ​ ທີ່​ໄດ້​ຮັບ​ອະນຸຍາດ ລວມມູນ​ຄ່າ 113,47 ຕື້​ກີບ, ປະຕິບັດ​ໄດ້ 188 ​ໂຄງການ ຊຳລະ​ແລ້ວ 137 ​ໂຄງການ ມູນ​ຄ່າ 84,64 ຕື້​ກີບ.

 ໃນໂອກາດນີ້, ທ່ານ ຄຳ​ແຫວນ ປັນຍາ​ນຸວົງ ຫົວໜ້າ​ ພະ​ແນ​ກ ການ​ເງິນ ​ແຂວງ​ບໍລິ​ຄຳ​ໄຊ ກໍ​ໄດ້​ລາຍ​ງານ ສະພາບ​ການ​ຈັດ​ເກັບ ​ລາຍ​ຮັບ ​ແລະ ການ​ຄຸ້ມ​ຄອງ​ ບັນດາ ລາຍ​ຈ່າຍ ທີ່​ເປັນ ​ບູລິມະສິດ​ ຕາມ​ພາລະ​ບົດບາດ​ ຂອງ​ພະແນກຕົນ, ​ໃນ 11 ​ເດືອນ ສາມາດ​ ຈັດ​ເກັບ​ ລາຍ​ຮັບ​ໄດ້ 447,13 ຕື້​ກວ່າ​ກີບ ລື່ນ​ແຜນ ​ເບື້ອ​ງຕົ້ນ ​ເກືອບ 18% ​ແລະ ລື່ນ​ແຜນ​ດັດ​ແກ້ 15,25%, ​(ເຊິ່ງລວມທັງ ສອງ​ດ່ານ​ພາສີ​ ສາກົນ ສາມາດ​ ປະຕິບັດ​ໄດ້​ 101% ຂອງ​ແຜນການ) ​ໃນ​ນັ້ນ​ ພູດ​ສູນ​ກາງ 240,31 ຕື້​ກວ່າ​ກີບ ​ລື່ນ​ແຜນການ 5,35%, ພູດ​ທ້ອງ​ຖິ່ນ 206,83 ຕື້​ກີບ ລື່ນ​ແຜນການ 29,37% ລາຍ​ຮັບ​ດຸ່ນ​ດ່ຽງ​ ຈາກ​ສູນ​ກາງ 269,77 ຕື້​ກີບ ​ເທົ່າ​ກັບ 97,44%.

  ດ້ານ​ລາຍ​ຈ່າຍ ທາງ​ພະ​ແນ​ກ ການ​ເງິນ​ ສາມາດ ເບີກ​ຈ່າຍ​ ເງິນ​ເດືອນ, ​ເງິນ​ອຸດ​ໜູນ, ​ເງິນ​ນະ​ໂຍບາຍ ໃຫ້ພະນັກງານ, ທະຫານ ​ຕຳຫລວດ ​ຢ່າງ​ປົກກະຕິ ທັນ​ເວລາ, ດ້ານ​ການ​ຄຸ້ມ​ຄອງ​ ການ​ຈ່າຍ​ ຄ່າ​​ໄຟຟ້າ ນ້ຳປະປາ ຂອງ​ສຳນັກງານ​ ອົງການ​ລັດ ​ແມ່ນ​​ໄດ້​ມີ​ການ​ ລວມສູນ​ ຈັດ​ສັນຈ່າຍ ຢູ່ພະ​ແນ​ກການ​ເງິນ ​ເຊິ່ງ​ເຮັດ​ໃຫ້​ ມີ​ຄວາມ​ສະດວກ ວ່ອງ​ໄວ, ມີ​ຄວາມ​ໂປ່​ງ​ໃສ ​ຫລາຍ​ຂຶ້ນ. ບັນຫາ​ທີ່​ ຍັງ​ມີ​ຄວາມ​ຫຍຸ້ງຍາກ​ ​ແມ່ນ​ບັນຫາ​ ການ​ຄຸ້ມ​ຄອງ​ ລາຍຈ່າຍ​ ວຽກ​ງານ​ ສຶກສາ-ສາທາ ທີ່​ຕ້ອງ​ໄດ້​ມີ​ການ​ລົງ​ເລິກ ​ຄົ້ນຄວ້າ​ລະອຽດ ​ໃນ​ດ້ານ​ການ​ຂຶ້ນ​ແຜນ​ ງົບປະມານ​ ລາຍ​ຈ່າຍ.

ທີ່ມາ kpl.gov.la