ລັດຖະບານ ຮັບໃຊ້ປະເທດຊາດ 6 ເດືອນ ແກ້ໄຂ ບັນຫາຮີບດ່ວນ ແລະ ມີຜົນງານພົ້ນເດັ່ນ


 6 ເດືອນ ແຫ່ງການບໍລິຫານຮັບໃຊ້ປະເທດຊາດ ນອກຈາກການດຳເນີນວຽກງານແລ້ວ ລັດຖະບານຊຸດດັ່ງກ່າວ, ຍັງໄດ້ແກ້ໄຂບັນຫາຮີບດ່ວນຈຳນວນໜຶ່ງ ທີ່ມີລັກສະນະສະເພາະ ເປັນຕົ້ນແມ່ນ ການແກ້ໄຂບັນການການບໍລິຫານງານທີ່ຜິດພາດ ຢູ່ບໍລິສັດໄຟຟ້າລາວ, ການອອກຄຳສັ່ງເລກທີ 15/ນຍ ກ່ຽວກັບການຫ້າມສົ່ງໄມ້ທ່ອນ ແລະ ໄມ້ເຄິ່ງສຳເລັດຮູບ ອອກຕ່າງປະເທດ ແລະ ອອກແຈ້ງການ ຢຸດຕິການຍົກເວັ້ນພາສີນຳເຂົ້ານ້ຳມັນເຊື້ອໄຟ, ພ້ອມກັນນີ້ ຍັງມີຜົນສຳເລັດ ຂອງການເປັນປະທານອາຊຽນ ປີ 2016 ທີ່ໄດ້ວາງຄຳຂວັນ ຂອງການເປັນປະທານອາຊຽນ ຂອງລາວວ່າ: “ຫັນວິໄສທັດໃຫ້ເປັນຮູບປະທຳ ເພື່ອສ້າງຄວາມເຂັ້ມແຂງຂອງອາຊຽນ” ແລະ ສາມາດອອກຖະແຫລງ ການໄດ້ທັງໝົດ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານ ຕໍ່ກອງປະຊຸມສະໄໝສາມັນເທ່ືອທີ 2 ຂອງສະພາແຫ່ງຊາດຊຸດທີ VIII ກ່ຽວກັບການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ ສົກປີ 2015-2016 ວ່າ: ການລາຍງານຄັ້ງນີ້ ເປັນຄັ້ງທຳອິດ ພາຍຫລັງລັດຖະບານຊຸດທີ່ 8 ນີ້ ໄດ້ເຂົ້າມາບໍລິຫານປະເທດ ໄດ້ພຽງ 6 ເດືອນເທົ່ານັ້ນ ແລະ ຈະຕ້ອງໄດ້ສືບຕໍ່ແກ້ໄຂ ແລະ ລົງເລິກແກ້ໄຂຢ່າງຮີບດ່ວນ ເພື່ອກອບກູ້ເອົາສະຖຽນລະພາບ ຂອງເສດຖະກິດ ໃນປະເທດເຮົາ ໃຫ້ຄ່ອຍໆກ້າວເຂົ້າສູ່ ຄວາມມີສະຖຽນລະພາບ ເປັນຕົ້ນແມ່ນ ການແກ້ໄຂບັນຫາທີ່ເກີດຂຶ້ນ ໃນການບໍລິຫານງານ ທີ່ຜິດພາດຢູ່ບໍລິສັດໄຟຟ້າລາວ ໃຫ້ກັບຄືນເຂົ້າສູ່ປົກກະຕິ, ພ້ອມທັງປັບປຸງຄືນການກຳນົດຂັ້ນລາຄາໄຟຟ້າ ຈາກ 3 ຂັ້ນ ມາເປັນ 6 ຂັ້ນ ເພື່ອຊຸກຍູ້ການຜະລິດ ແລະ ຫລຸດຜ່ອນຄ່າໃຊ້ຈ່າຍ ໃຫ້ປະຊາຊົນ ລົງໃນລະດັບໜຶ່ງ; ອອກຄຳສັ່ງເລກທີ 15/ນຍ, ລົງວັນທີ 13 ພຶດສະພາ 2016 ກ່ຽວກັບການຫ້າມສົ່ງໄມ້ທ່ອນ ແລະ ໄມ້ເຄິ່ງສຳເລັດຮູບ ອອກຕ່າງປະເທດ, ຕົກລົງການຢຸດຕິການ ໃຫ້ໂກຕ້າໄມ້ປະຈຳປີຢູ່ທົ່ວປະເທດ, ກວດການການກະທຳຜິດ ໃນການລັກລອບຕັດໄມ້, ຂຸດຄົ້ນໄມ້ໃນທົ່ວປະເທດ ແນ່ໃສ່ປົກປັກຮັກສາ ຊັບພະຍາກອນປ່າໄມ້ຂອງຊາດ ແລະ ສົ່ງເສີມໃຫ້ມີການ ພັດທະນາຜະລິດຕະພັນ ໄມ້ສຳເລັດຮູບ ເພື່ອເປັນສິນຄ້າຂາອອກ ດ້ວຍມູນຄ່າສູງຂຶ້ນເລື້ອຍໆ, ພັດທະນາສີໄມ້ລາຍມື ແລະ ສ້າງວຽກເຮັດງານທຳໃຫ້ຄົນລາວເຮົາ ໃຫ້ນັບມື້ນັບຫລາຍ ແລະ ໝັ້ນທ່ຽງ, ເຊິ່ງມາຮອດປະຈຸບັນ ສັງເກດເຫັນວ່າ ຄຳສ່ັງເລກທີ 15/ນຍ ແລະ ການຈັດຕັ້ງປະຕິບັດ ຄຳສັ່ງສະບັບນີ້ ຢ່າງເຂັ້ມງວດ ແລະ ມີປະສິດທິຜົນ ເຊິ່ງໄດ້ຮັບການ ສະໜັບສະໜູນ ຈາກທຸກໆຝ່າຍຂອງສັງຄົມ ແລະ ໄດ້ຮັບການຍອມຮັບ ຈາກຕ່າງປະເທດອີກດ້ວຍ; ພ້ອມກັນນີ້ ລັດຖະບານໄດ້ອອກແຈ້ງການ ໃນການຢຸດຕິການ ຍົກເວັ້ນພາສີນຳເຂົ້າ ນ້ຳມັນເຊື້ອໄຟ ໃນທົ່ວປະເທດ ແລະ ທຸກໆກໍລະນີ, ເວັ້ນເສຍແຕ່ໄດ້ກຳນົດໄວ້ ໃນກົດໝາຍ, ສ່ວນກໍລະນີມີການ ຕົກລົງຍົກເວັ້ນໄປແລ້ວ ສະພາແຫ່ງຊາດ ກໍຮັບຮອງເອົາແລ້ວນັ້ນ ລັດຖະບານຈະເຈລະຈາ ເປັນແຕ່ກໍລະນີໄປ. ທັງນີ້ ກໍເພື່ອໃຫ້ມີຄວາມເຂັ້ມງວດ ຕໍ່ລະບຽບກົດໝາຍ ແລະ ນຳເອົາລາຍໄດ້ຈາກການເສຍໄປ ຂອງງົບປະມານ ຂອງລັດຢ່າງມະຫາສານນັ້ນ ກັບຄືນມາໃຫ້ລັດ ທັງເປັນການສະກັດກັ້ນ, ການລັກລອບ, ປອມແປງ ເຊິ່ງຜ່ານມາບໍ່ສາມາດ ຄອບຄຸມກວດກາ ແລະ ສະກັດກັ້ນໄດ້ນັ້ນ ໃຫ້ເຂົ້າສູ່ການກວດກາ ແລະ ປ້ອງກັນບໍ່ໃຫ້ມີການ ກະທຳຜິດຕໍ່ໄປອີກ. ນອກຈາກທີ່ໄດ້ກ່າວມານັ້ນ, ລັດຖະບານກໍໄດ້ຈັດຕັ້ງປະຕິບັດ ພາລະໜ້າທີ່ຂອງຕົນ ຢ່າງມີຄວາມເອົາໃຈໃສ່ ຫລາຍບັນຫາກໍໄດ້ຮັບການແກ້ໄຂ ມາເປັນລຳດັບ ແລະ ຫລາຍບັນຫາກໍຈະສືບຕໍ່ແກ້ໄຂ ດ້ວຍຄວາມຮັບຜິດຊອບສູງ.

ພ້ອມກັນນີ້, ທ່ານ ທອງລຸນ ສີສຸລິດ ຍັງໄດ້ກ່າວເຖິງຜົນສຳເລັດ ໃນການເປັນປະທານອາຊຽນ ຕະຫລອດປີ 2016 ຂອງລາວເຮົາ, ໂດຍສະເພາະການເປັນເຈົ້າພາບ ແລະ ປະທານບັນດາ ກອງປະຊຸມສຸດຍອດອາຊຽນ ແລະ ອາຊຽນ ກັບຄູ່ຮ່ວມພັດທະນາຕ່າງໆ, ສາມາດອອກ 8 ບູລິມະສິດຂອງອາຊຽນ ເພື່ອຈັດຕັ້ງຜັນຂະຫຍາຍ ວິໄສທັດຮອດປີ 2025 ຂອງອາຊຽນ, ສາມາດຮ່າງ ແລະ ເຈລະຈາ 8 ຖະແຫລງການ 30 ຂໍ້ຕົກລົງ ໄດ້ຖືກຮັບຮອງເອົາ ໃນກອງປະຊຸມດັ່ງກ່າວ ແລະ ໄດ້ຮັບຜົນສຳເລັດຢ່າງຈົບງາມ ໃນທຸກກອງປະຊຸມ.

======================

ພາບແລະຂ່າວ: Pathedlao Lao