ລັດຖະບານ ຈະສູ້ຊົນໃຫ້ປະຊາຊົນ ໄດ້ຊົມໃຊ້ໄຟຟ້າລາຄາຖືກ

​ຕະຫລອດ​ໄລ​ຍະ​ ຫລາຍ​ປີ​ທີ່​ຜ່ານ​ມາ ລັດຖະບານ​ ໄດ້ສຸມ​ໃສ່​ການ​ພັດທະນາ​​ ໂຄງການໄຟຟ້າ ທັງພະລັງງານ​ນ້ຳ ​ແລະ ພະລັງງານ​ຈາກ​ຖ່ານ​ຫີນ ​ເຊິ່ງປັດຈຸບັນ​ ສຳ​ເລັດ​ແລ້ວ​ກວ່າ 40 ​ແຫ່ງ ​ແລະ ມີ​ກຳລັງ​ຕິດ​ຕັ້ງ​ກວ່າ 6.000 ​ເມ​ກາ​ວັດ, ພ້ອມ​ນັ້ນ ໄດ້​ສະໜອງ​ໃຫ້​ປະຊາຊົນ ​​ໃນ​ທົ່ວ​ປະ​ເທດ​ ໄດ້​ຊົມ​ໃຊ້​ກວ່າ 90% ຂອງ​ຄອບຄົວ​ທັງໝົດ. ​​ຢ່າງ​ໃດ​ກໍ​ຕາມ ຍັງ​ເຫັນ​ວ່າປະຊາຊົນ​ລາວ ໄດ້ຊົມ​ໃຊ້​ກະ​ແສ​ໄຟ​ຟ້າ ທີ່​ມີ​ລາຄາຂ້ອນ​ຂ້າງ​ສູງ ​ເພາະ​ທຸກ​ໂຄງການ ​ລ້ວນ​ແຕ່​ເປັນ​ການ​ລົງທຶນ ​ຂອງ​ຕ່າງປະ​ເທດ ​ແລະ ມີ​ໄລຍະ​ສຳ​ປະທານ​ ໄລຍະ​ຍາວ, ​ແຕ່​ລັດຖະບານ​ ກໍ​ໄດ້​ມີ​ຄວາມ​ພະຍາຍາມສູ້​ຊົນ ​ໃຫ້​ປະຊາຊົນ ໄດ້​ຊົ​ມ​ໃຊ້​ໄຟຟ້າ​ໃນ​ລາຄາ​ທີ່​ຖືກ​ລົງ​ ໃນ​ອະນາຄົດ.

ທ່ານ ຄຳ​ມະນີ ອິນ​ທິລາດ ລັດຖະມົນຕີ​ ກະຊວງ​ພະລັງງານ ​ແລະ ບໍ່​ແຮ່ ​ໄດ້​ໃຫ້​ຄວາມ​ກະຈ່າງແຈ້ງ​ ກ່ຽວກັບ​ເລື່ອງ​ນີ້​ ຕໍ່ນັກ​ຂ່າວ​ເມື່ອ​ບໍ່ດົນ​ມາ​ນີ້ວ່າ: ​ເນື່ອງ​ຈາກ ​ພັກ-ລັດຖະບານ ​ໄດ້​ມີ​ນະ​ໂຍບາຍ​ພັດທະ ນາ​ ຂະ​ແໜງ​ໄຟຟ້າ ​ເພື່ອ​ປະກອບສ່ວນ​ເຂົ້າ​ໃນ ​ການ​ພັດທະນາ​ ເສດຖະກິດ-ສັງຄົມ ​ໃຫ້​ຈະ​ເລີ​ນກ້າວໜ້າ ​ຈຶ່ງ​ໄດ້​ອະນຸຍາດ​ ໃຫ້​ຕ່າງປະ​ເທດ​ ເຂົ້າ​ມາ​ລົງທຶນກໍ່ສ້າງ ​ແລະ ສຳ​ປະທານ ​ເປັນ​ເວລາ​ຫລາຍ​ປີ​ ພໍ​ສົມຄວນ. ສະ​ນັ້ນ ຫາກ​ເມື່ອ​ໂຄງການ​ໄຟຟ້າ​ແຫ່ງ​ຕ່າງໆ ສິ້ນ​ສຸດ​​ໄລຍະ ການ​ສຳ​ປະທານ ​ແລະ ຢູ່​ໃນ​ການ​ຄຸ້ມ​ຄອງ​ບໍລິການ​ໂດຍ​ກົງ ​ຂອງ​ລັດຖະບານ, ລວມທັງ​ການ​ກຳ​ເນີ​ດ​ເກີດ​ຂຶ້ນ​ ຂອງ​ພາກ​ອຸດສາຫະກຳ ທີ່​ນຳ​ໃຊ້​ໄຟຟ້າ​ ແບບ​ຖາວອນ ​ແລະ ໝັ້ນຄົງ ຈຳນວນ​ຫລາຍ​ ໃນ​ທົ່ວ​ປະ​ເທດ, ​ເວລາ​ນັ້ນ ການ​ຊົມ​ໃຊ້​ໄຟຟ້າ​ຂອງ​ປະຊາຊົນ ​ກໍ​ຈະ​ມີ​ລາຄາທີ່​ຖືກ​ລົງ.

ທ່ານ ລັດຖະມົນຕີ ​ກະຊວງ​ພະລັງງານ ​ແລະ ບໍ່​ແຮ່ ກ່າວ​ຕື່ມວ່າ: ​ການ​ທີ່ລັດຖະບານ​ ໄດ້​​ເລັ່ງພັດທະນາ ​ໂຄງ​ງການ​ໄຟຟ້າ​ຫລາຍ​ແຫ່ງ ​ນອກຈາກ​ຈະ​ປະກອບສ່ວນ​ສຳຄັນ​ ເຂົ້າ​ໃນ​ການ​ພັດທະນາ ​ເສດຖະກິດ-ສັງຄົມ​ແລ້ວ ຍັງ​ຈະ​ກ້າວ​ເປັນ ​ປະ​ເທດໝໍ້​ໄຟ​ອາ​ຊຽນ ​ແລະ ຕອບ​ສະໜອງ​ໃຫ້​ ປະຊາຊົນ​ໄດ້​ບໍລິ​ໂພ​ກ ນັບ​ມື້​ຫລາຍ​ຂຶ້ນ ​ເຊິ່ງ​ໃນ​ໄລຍະ​ຜ່ານ​ມາ​ ລັດຖະບານ ກໍ​ໄດ້ມີ​ການກຳນົດ ​ລາຄາ​ໄຟຟ້າ ທີ່ມີ​ຄວາມ​ເໝາະສົມ ຖ້າ​ປຽບທຽບກັບ​ ບັນດາ​ປະ​ເທດ​ເພື່ອ​ນມິດ​ອາ​ຊຽນດ້ວຍ​ກັນ. ສະ​ເພາະ​ປີ 2016 ລັດຖະບານ ໄດ້ມີ​ນະ​ໂຍບາຍປັບປຸງ ​ແກ້​ໄຂ​ລາຄາ​ໄຟຟ້າ​ຕື່ມ​ອີກ​ ໃຫ້​ມີ​ຄວາມ​ເໝາະສົມ​ກວ່າ​ເກົ່າ ​ເຊິ່ງມີ​​ເຖິງ 6 ຂັ້ນ​ຕອນ​ ຂອງ​ການ​ຄິດ​ໄລ່ ​ແລະ ມີ​ທັງ​ລາຄາ​ນະ​ໂຍບາຍ, ລາຄາ​ປະຢັດ, ລາຄາ​ຊົມ​ໃຊ້​ຫລາຍ ​ແລະ ອື່ນໆ ອັນ​ໄດ້​ສ້າງ​ຄວາມ​ເພິ່ງ​ພໍ​ໃຈ ກັບ​ພໍ່​ແມ່​ປະຊາຊົນ, ຕະຫລອດ​ເຖິງ ພະນັກງານ ​ແລະ ທະຫານ-ຕຳຫລວດ ​ເປັນ​ຢ່າງ​ດີ. ແນວ​ໃດ​ກໍ​ດີ ຮອດ​ປີ 2020 ​ສປປ ລາວ ກໍ​ຈະ​ສໍາ​ເລັດ​ໂຄງການ​ໄຟຟ້າ​ ລວມທັງໝົດກວ່າ 90 ​ແຫ່ງ ​ເຊິ່ງຈະ​​ໄດ້​ຕອບ​ສະໜອງ ການ​ຊົມ​ໃຊ້ຂອງ​ປະຊາຊົນ ພາຍ​ໃນ ​ແລະ ສົ່ງ​ຂາຍ​ຕ່າງປະ​ເທດ ສ້າງ​ລາຍ​ຮັບ​ ອັນ​ມະຫາສານ​ ເຂົ້າ​ງົບປະມານ​ແຫ່ງ​ຊາດ ​ແລະ ປະກອບສ່ວນ​ສຳຄັນ​ ເຂົ້າ​ໃນ​ການ​ແກ້​ໄຂ​ຄວາມທຸກ​ຍາກ​ ຂອງ​ປະຊາຊົນ ​ໃຫ້​ສຳ​ເລັດ​ຢ່າງ​ສົມບູນ.

 

ຂໍ້ມູນຈາກ: http://kpl.gov.la/detail.aspx?id=20601/Pathedlao Lao