ລັດຖະບານລາວກຽມສະເໜີ 2 ແຫລ່ງທ່ອງທ່ຽວເປັນມໍລະດົກໂລກ

ລັດຖະບານລາວເຄັ່ງຮ້ອນກະກຽມເອກະສານສໍາຄັນເພື່ອສະເໜີເອົາທົ່ງໄຫຫີນ ເຂົ້າເປັນມໍລະດົກໂລກ ແລະ ປ່າສະຫງວນຫີນໜາມໜໍ່ ສະເໜີເຂົ້າເປັນມໍລະດົກໂລກທາງທຳມະຊາດແຫ່ງທຳອິດຂອງ ສປປ ລາວ ໄປຄ່ຽງຄູ່ ກັບການສົ່ງເສີມຜະລິດຕະພັນການທ່ອງທ່ຽວ ຂະນະທີ່ ແຫລ່ງທ່ອງທ່ຽວມໍລະດົກໂລກ 2 ແຫ່ງຢູ່ແຂວງຫລວງພະບາງ ແລະ ຈໍາປາສັກຍັງເປັນຈຸດຂາຍສໍາລັບນັກທ່ອງທ່ຽວພາຍໃນ ແລະ ຕ່າງປະເທດ. 
ໃນວັນທີ 16 ມີນາ 2017 ນີ້ ຢູ່ ນະຄອນຫລວງວຽງຈັນ , ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ(ຖວທ) ໄດ້ພົບປະ ແລະ ເຮັດວຽກກັບສະມາຊິກສະພາແຫ່ງ ຊາດຊຸດທີ VIII ເຂດເລືອກຕັ້ງ 1 ນະຄອນຫລວງວຽງຈັນ ນຳໂດຍ ທ່ານ ທອງສະລິດ ມັງໜໍ່ເມກ ສະມາຊິກສະພາແຫ່ງຊາດ ຊຸດທີ VIII ເຂດເລືອກຕັ້ງ 1 ນະຄອນຫລວງ ວຽງຈັນ ພ້ອມດ້ວຍຄະນະ ເພື່ອປະຕິບັດພາລະໜ້າທີ່ຂອງສະພາແຫ່ງຊາດ ກໍຄື ຂອງ ສະມາຊິກສະພາແຫ່ງຊາດ ໃນນີ້ສະມາຊິກສະພາແຫ່ງຊາດ ແຕ່ລະເຂດເລືອກຕັ້ງ ຕ້ອງໄດ້ລົງໄປພົບປະ ຢ້ຽມຢາມ ຫລື ເຜີຍແຜ່ເອກະສານ , ການຕົກລົງບັນຫາຕ່າງໆ ທີ່ສະພາແຫ່ງຊາດ ໄດ້ຮັບຮອງເອົາ. 
ໂອກາດນີ້ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ ຖວທ ໄດ້ລາຍງານສະພາບລວມ ແລະ ວຽກງານປິ່ນອອ້ມຂອງ ກະຊວງ ຖວທ ໂດຍສະເພາະ ໄດ້ສຸມໃສ່ບັນລຸເປົ້າໝາຍແຜນພັດທະນາວຽກງານໃນຂະແໜງຂອງຕົນ ໃຫ້ໄດ້ຮັບຜົນສຳເລັດໃນແຕ່ລະດ້ານເຊັ່ນ : ຜ່ານມາວຽກງານຖະແຫລງຂ່າວສື່ມວນຊົນ ນັບມື້ກ້າວສູ່ຄຸນນະພາບໃໝ່ - ທັນສະໄໝ, ວ່ອງໄວ ໃນການກະຈາຍຂໍ້ມູນຂ່າວສານ , ເຮັດບົດບາດເປັນກະບອກສຽງທີ່ແຫລມຄົມໃນການເຜີຍແຜ່ແນວທາງນະໂຍບາຍຂອງພັກ-ລັດ ຕໍ່ພາຍໃນ ແລະ ຕ່າງປະເທດ , ດ້ານວັດທະນະທຳ ແມ່ນໄດ້ມີຄວາມພະຍາຍາມເຮັດວຽກຮ່ວມກັບອົງການຈັດຕັ້ງສາກົນ ເປັນຕົ້ນ UNESCO ເພື່ອກະກຽມເອກະສານສະເໜີເອົາທົ່ງໄຫຫີນ ເຂົ້າເປັນມໍລະດົກໂລກ ແຫ່ງທີ 3 ສ່ວນປ່າສະຫງວນຫີນໜາມໜໍ່ ສະເໜີເຂົ້າເປັນມໍລະດົກໂລກທາງທຳມະຊາດແຫ່ງທຳອິດຂອງ ສປປ ລາວ ໄປຄ່ຽງຄູ່ ກັບການສົ່ງເສີມຜະລິດຕະພັນການທ່ອງທ່ຽວ ກໍໄດ້ສົ່ງເສີມໃຫ້ເສດຖະກິດ - ສັງຄົມຂອງປະເທດຂະຫຍາຍຕົວ ຍ້ອນວ່າຂະແໜງການນີ້ນຳລາຍໄດ້ເປັນເງິນຕາເຂົ້າປະເທດຢ່າງຫລວງຫລາຍ ສະແດງອອກ ຈຳນວນນັກທ່ອງທ່ຽວ ເຂົ້າມາໃນປະເທດ ໄດ້ເພີ່ມຂຶ້ນໃນແຕ່ລະປີ ສະເລ່ຍປະມານ 10-14% , ໃນປີ 2015 ມີຫລາຍກວ່າ 4.600.000 ກວ່າຄົນ ສະເລ່ຍເພີ່ມຂຶ້ນ ເກືອບ 15 % , ສາມາດສ້າງລາຍຮັບເຂົ້າປະເທດໄດ້ຫລາຍກວ່າ 725.000.000 ໂດລາສະຫະລັດ ເພີ່ມຂຶ້ນ15% ກວ່າ ທຽບໃສ່ 5 ປີ ຜ່ານມາ , ສຳລັບປີ 2016 ນັກທ່ອງທ່ຽວເຂົ້າມາທ່ຽວ ລາວ ມີຈຳນວນ 5 ລ້ານກວ່າຄົນ ອັນໄດ້ຊ່ວຍກະຕຸກຊຸກຊູ້ໃຫ້ຂະແໜງການອື່ນໆ ມີການຂະຫຍາຍຕົວ ແລະ ພັດທະນາໄປພ້ອມໆກັນ.

ໂດຍ: ສຸກສະຫວັນ, ພາບ:ເກດ

ທີ່ມາ: ປະເທດລາວ Pathedlao