ລັດຖະບານຕ້ອງການທຶນອີກ 4 ພັນຕື້ກວ່າກີບ ເພື່ອສ້າງຕາຝັ່ງກັນເຈື່ອນຈຸດຈຳເປັນທົ່ວປະເທດ

        ເຊິ່ງຂະນະນີ້ລັດຖະບານມີຄວາມຕ້ອງການທຶນຕື່ມ 4 ພັນຕື້ກວ່າ ກີບສ້າງຕາຝັ່ງກັນເຈື່ອນຕາມຈຸດຕ່າງໆທີ່ຈຳເປັນໃນຂອບເຂດທົ່ວປະເທດ ຊຶ່ງປະຈຸບັນ ໄດ້ສ້າງສຳເລັດແລ້ວເກືອບເຄີ່ງໜຶ່ງໃນຈຳນວນທັງໝົດທີ່ມີຄວາມຈຳເປັນສ້າງ.

     ອີງຕາມຂໍ້ມູນການລາຍງານຂອງທ່ານ ບຸນຈັນ ສິນທະວົງ ຕໍ່ກອງປະຊຸມສະພາ ເມື່ອບໍ່ດົນຜ່ານມານີ້ຮູ້ວ່າ: ໃນທົ່ວປະເທດ ມີຕາຝັ່ງເຈື່ອນທີ່ຈຳເປັນຕ້ອງກໍ່ສ້າງລວມ ທັງໝົດ 289,20 ກິໂລແມັດ ໃນນັ້ນມາ ຮອດປະຈຸບັນແມ່ນໄດ້ກໍ່ສ້າງສຳເລັດແລ້ວ 120,84 ກິໂລແມັດ ຫຼື ເທົ່າກັບ 41,78% ແລະຍັງເຫຼືອ 168,36 ກິໂລແມັດທີ່ຕ້ອງການງົບປະມານໃນການກໍ່ສ້າງທັງໝົດປະມານ 4.369,44 ຕື້ກີບ.

     ແນວໃດກໍດີ ອີງຕາມຂໍ້ມູນການສັງລວມແຜນການກໍ່ສ້າງ ແລະຄວາມຕ້ອງການງົບປະມານໃນການກໍ່ສ້າງໄລຍະ 5 ປີແຕ່ປີ 2016-2020 ມີຄວາມຍາວ 65,37 ກິໂລແມັດມູນຄ່າ 1.731,62 ຕື້ກີບ ແລະໄລຍະປີ 2020-2025 ຄວາມຍາວ 102,99 ກິໂລແມັດແມ່ນມີຄວາມຕ້ອງການທຶນມູນຄ່າ 2.636,52 ຕື້ກີບ.

     ສະເພາະແຜນການໃນປີ 2017 ທ່ານ ລັດຖະມົນຕີກະຊວງໂຍທາທິການ ແລະຂົນສົ່ງກ່າວວ່າ: ແມ່ນມີບຸລິມະສິດ ທັງ ໝົດ 4 ຈຸດ ລວມຄວາມຍາວ 3.140 ແມັດ ມູນຄ່າ 63,62 ຕື້ກວ່າກີບ ໃນນັ້ນ : ບ້ານຍາງຄຳ ເມືອງຕົ້ນເຜິ້ງ ແຂວງບໍ່ແກ້ວ ຄວາມຍາວ 520 ແມັດ ມູນຄ່າ 13,83 ຕື້ກີບ, ບ້ານຈອມແກ້ວ ເມືອງແກ່ນທ້າວ ແຂວງໄຊຍະບູລີ ຄວາມຍາວ 1.100 ແມັດ ມູນຄ່າ 16,55 ຕື້ກີບ ແລະບ້ານນາຂ່າເໝືອ (ດ່ານປະເພນີ) ເມືອງທ່າພະບາດ ແຂວງບໍລິຄຳໄຊ ຄວາມຍາວ 820 ແມັດ ມູນຄ່າ 8,83 ຕື້ກີບ ສ່ວນບ້ານພະບາດໂພນສັນ ເມືອງທ່າພະບາດ ແຂວງບໍລິຄຳໄຊ ຄວາມຍາວ 24,39 ຕື້ກີບ.

     ຂະນະທີ່ການກໍ່ສ້າງຕາຝັ່ງກັນເຈື່ອນຢູ່ເບື້ອງຊາຍແດນຕິດກັບໄທ ມີຄວາມຍາວທັງໝົດປະມານ 220 ກີໂລແມັດ ໃນນັ້ນໄດ້ກໍ່ສ້າງສຳເລັດແລ້ວ 200 ກິໂລແມັດ ຫຼື ປະມານ 90,90% ທ່ານ ບຸນຈັນ ສິນທະວົງ ກ່າວຕື່ມ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.