ລັດຖະບານຍີ່ປຸ່ນ ໃຫ້ທຶນຊ່ວຍເຫລືອລ້າ ເພື່ອພັດທະນາ ຊັບພະຍາກອນມະນຸດ ຫລາຍກວ່າ 2 ລ້ານໂດລາສະຫະລັດ

ພິທີ​ລົງ​ນາມ​​ເອກະສານ​ແລກປ່ຽນ​ ສຳລັບໂຄງການ​ຊ່ວຍ​​ເຫລືອ​ລ້າ​ ເພື່ອການ​ພັດທະນາຊັບພະຍາກອນ​ມະນຸດ, ​ທີ່​ມີ​ມູນ​ຄ່າ​ທັງ​ໝົດ 321 ລ້ານ​ເຢັນ ຫລື ປະມານ 2,9 ລ້ານ​ໂດ​ລາ​ສະຫະລັດ ມີ​ຂຶ້ນ​ ໃນ​ວັນ​ທີ 22 ມິຖຸນາ 2017 ທີ່​ກະຊວງ​ການ​ຕ່າງປະ​ເທດ ນະ​ຄອນ​ຫລວງ​ວຽງ​ຈັນ, ລະຫວ່າງ​ ທ່ານ ນາງ ຄຳ​ເພົາ ​ເອີນ​ທະ​ວັນ ຮອງ​ລັດຖະມົນຕີ ກະຊວງ​ການ​ຕ່າງປະ​ເທດ ​ແລະ ທ່ານ ທາ​ເຄ​ຊິ ຮິ​ຄິ​ຮາຣະ ເອກອັກຄະຣາຊະ​ທູດວິສາມັນ​ຜູ້​ມີ​ອຳນາດ​ເຕັມ​ ແຫ່ງ ຍີ່ປຸ່ນ ​ປະຈຳ ສປປ ລາວ, ພ້ອມ​ດ້ວຍ​ພາກສ່ວນ​ກ່ຽວ ຂ້ອງ​​ສອງ​ຝ່າຍ​ເຂົ້າ​ຮ່ວມ​ເປັນ​ສັກຂີ​ພິຍານ.

 ໂຄງການ​ຊ່ວຍ​ເຫລືອລ້າ ຂອງ​ລັດຖະບານ​ຍີ່ປຸ່ນ​ໃນ​ຄັ້ງ​ນີ້, ເປັນ​ການ​ປະກອບສ່ວນທີ່​ສຳຄັນ  ​ເຂົ້າ​​ໃນ​ການ​ປະຕິບັດ​ແຜນ​ພັດທະນາ​ເສດຖະກິດ-​ສັງຄົມ ຂອງ ສປປ ລາວ ​ເຊິ່ງ​ແມ່ນໜຶ່ງ​ ໃນ​ບູລິ​ມະ​ສິດທີ່​ລັດຖະບານລາວ ​ໃຫ້​ຄວາມ​ເອົາ​ໃຈ​ໃສ່ ​ແລະ ຖື​ສຳຄັນ ​ເພື່ອ​ຍົກ​ລະດັບ​ຄວາມ​ຮູ້ຄວາມ​ສາມາດ ​ຂອງ​ນັກ​ສຶກສາລາ​ວ ເພື່ອ​ຕອບ​ສະໜອງຕາມ​ມາດຕະຖານ​ພາກ​ພື້ນ ​ແລະ ສາກົນ ​ໃນ​ເງື່ອນ​ໄຂ​ທີ່ ສປປ ລາວ ພວມ​ປະຕິບັດ​ການ​ເຊື່ອມ​ໂຍງ ກັບ​ຂົງ​ເຂດ ​ແລະ ສາກົນ ​ໂດຍ​ສະ​ເພາະ ການ​ເຊື່ອມ​ໂຍງທາງ​ດ້ານ​ເສດຖະກິດ ​ແລະ ວັດ ທະນະທຳ-​ສັງຄົມ. ​ນັບ​ແຕ່​ປີ 2015 ​ເປັນ​ຕົ້ນ​ມາ ສປປ ລາວ ​ແລະ ຍີ່ປຸ່ນ ​ໄດ້​ຍົກ​ລະດັບ​ການ​ພົວພັນ​ ສອງ​ຝ່າຍ ມາ​ເປັນ​ຄູ່​ຮ່ວມ​ມື​ຍຸດ​ທະ​ສາດ ​ເຊິ່ງ​ເຮັດ​​ໃຫ້ການ​ພົວພັນ​ສອງ​ປະ​ເທດ  ​ໄດ້​ຮັບ​ການ​ເພີ່​ມທະວີ ​ເຂົ້າ​ສູ່​ລວງ​ເລີກ​ ໃນ​ທຸກ​ລະດັບ ນັບ​ແຕ່​ການ​ນຳ​ຂັ້ນ​ສູງ​ ລົງ​ຮອດ​ຂະ​ແໜງການ ​ແລະ ທ້ອງ​ຖິ່ນ, ​ໂດຍ​ຜັດປ່ຽນການ​ຢ້ຽມຢ້າມເຊິ່ງກັນ ​ແລະ ກັນ​ຢ່າງ​ເປັນ​ປະຈຳ.

​ໃນ​ໂອກາດ​ດັ່ງກ່າວ, ທ່ານ ນາງ ຄຳ​ເພົາ ​ເອີນ​ທະ​ວັນ ​ໄດ້​ຕີ​ລາຄາ​ສູງ ຕໍ່​ການ​ພົວພັນ​ຮ່ວມ​ມືອັນ​ແໜ້ນ​ແຟ້ນ ລະ​ຫວ່າງ ສອງ​ປະ​ເທດ​ລາວ-​ຍີ່ປຸ່ນ, ໄດ້​ສະ​ແດງ​ຄວາມ​ຂອບ​ໃຈ​ ຢ່າງ​ສູງຕໍ່​ລັດຖະບານ ​ແລະ ປະຊາຊົນ​ຍີ່ປຸ່ນ ທີ່​ໄດ້​ໃຫ້ການ​ສະໜັບສະໜູນ ​ແລະ ຊ່ວຍ​ເຫລືອ ສປປ ລາວ ມາ​ໂດຍ​ຕະຫລອດ, ຊຶ່ງ​ເປັນ​ການ​ປະກອບສ່ວນອັນ​ສຳຄັນ​ ເຂົ້າ​ໃນ​ການຈັດ​ຕັ້ງ​ປະຕິບັດ​ ແຜນ​ພັດທະນາ​ເສດຖະກິດ-​ສັງຄົມ ຂອງ ສປປ ລາວ  ​ໂດຍ​ສະ​ເພາະ​ ​ການ​ພັດທະນາ​ຊັບພະຍາກອນມະນຸດ ຂອງ​ລາວ ​ແລະ ລັດຖະບານ​ລາວ ຍິນ​ດີ​ໃຫ້ການ​ຮ່ວມ​ມື​ ​ເພື່ອ​ເຮັ​ດ​ໃຫ້​ໂຄງການ​ດັ່ງກ່າວ ມີປະສິດ​ທິຜົນ ​ແລະ ສຳ​ເລັດ​ຢ່າງ​ຈົບ​ງາ​ມ.

ຂ່າວ: ກິດ​ຕາ; ພາບ:​ເກດສະໜາ

ຂໍ້ມູນຈາກ: ສຳນັກຂ່າວສານປະເທດລາວ