ລະດູຝົນປີນີ້ ມີ 88 ເມືອງ ໄດ້ຮັບຜົນກະທົບຈາກໄພນໍ້າຖ້ວມຫນັກຫນ່ວງ

ນັບແຕ່ກາງເດືອນກໍລະກົດປີນີ້ເປັນຕົ້ນມາ ເນື່ອງຈາກສະພາບອາກາດປະຈຳລະດູການ ບວກກັບ ລົມພະຍຸເຂດຮ້ອນ ເປັນຕົ້ນ ເຊີນຕິນ ແລະ ເບປິນກາ ໄດ້ພັດຜ່ານປະເທດລາວເຮົາ ອັນໄດ້ເຮັດໃຫ້ຫລາຍແຂວງ ເກີດໄພນໍ້າຖ້ວມ ແລະ ດິນເຊາະເຈື່ອນ ຢ່າງຫນັກຫນ່ວງ.

ທ່ານ ນາງ ໄບຄຳ ຂັດທິຍະ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ຮອງປະທານ ຄະນະກຳມະການປ້ອງກັນແລະ ຄວບຄຸມໄພພິບັດແຫ່ງຊາດ ໄດ້ໃຫ້ຮູ້ວ່າ: ມາຮອດປະຈຸບັນ ທົ່ວປະເທດໄດ້ຮັບຜົນກະທົບຈາກໄພນໍ້າຖ້ວມ ແລະດິນເຊາະເຈື່ອນ ທັງໝົດ 15 ແຂວງ ແລະ 1 ນະຄອນ ຫຼວງ, ມີ 88 ເມືອງ, , 86.811 ຄອບຄົວແລະ1.664 ບ້ານ, ໃນນັ້ນມີຜູ້ເສຍຊີວິດທັງໝົດ 48 ຄົນ ແລະ ສູນຫາຍ ຊອກຄົ້ນບໍ່ທັນເຫັນ 97 ຄົນ.

ແຂວງທີ່ໄດ້ຮັບຜົນກະທົບຫຼາຍກວ່າໝູ່ ໂດຍເບິ່ງຕາມຕົວເລກຜູ້ເສຍຊີວິດ ແລະ ສູນຫາຍ ແມ່ນເມືອງສະໜາມໄຊ ແຂວງອັດຕະປື ມີຜູ້ເສຍຊີວິດ 39 ຄົນ, ແລະ ສູນຫາຍ 97 ຄົນ; ຮອງລົງມາແມ່ນແຂວງຫຼວງພະບາງ, ມີຜູ້ເສຍຊີວິດ 6 ຄົນ, ແຂວງຊຽງຂວາງ ມີຜູ້ເສຍຊີວິດ 2 ຄົນ, ແຂວງບໍລິຄຳໄຊ ມີຜູ້ເສຍຊີວິດ 1 ຄົນ, ແຂວງຄຳມ່ວນ ບໍ່ມີຜູ້ເສຍຊີວິດ ແຕ່ໄດ້ຍົກຍ້າຍປະຊາຊົນອອກຈາກເຂດນໍ້າຖ້ວມ 1.366 ຄອບຄົວ, ສະຫວັນນະເຂດ ຍົກຍ້າຍປະຊາຊົນ 711 ຄອບຄົວ, ແລະ ແຂວງຈຳປາສັກ ຍົກຍ້າຍປະຊາຊົນອອກຈາກເຂດນໍ້າຖ້ວມ 833 ຄົນ. ພ້ອມກັນນັ້ນ, ກໍ່ຍັງມີອີກຫລາຍແຂວງທີ່ໄດ້ຮັບຜົນກະທົບຈາກນໍ້າຖ້ວມ ແລະ ດິນເຊາະເຈື່ອນ ເຊັ່ນກັນ