ລະດັບຕໍ່າຂອງວິຕາມິນ D ມີຜົນກະທົບຕໍ່ການຈື່ຈຳ

 ການສຶກສາ​ໃໝ່​ອັນຫ​ນຶ່ງລົງ​ຄວາມ​ເຫັນ​ວ່າ ພວກ​ຄົນສູງ​ອາຍຸທີ່ຂາດ​ວິ​ຕາ​ມິນ ​ດີ ມີ​ທ່າທາງ​ຫລາຍ​ກ່ວາ​ພວກ​ທີ່​ບໍ່​ຂາດ​ວິ​ຕາ​ມິນ​ດັ່ງກ່າວ ວ່າຈະ​ປະ​ເຊີນ​ກັບ​ການ​ລຸດນ້ອຍ​ຖອຍ​ລົງ​ຢ່າງ​ໜັກໃນ​ຄວາມ​ສາມາດ​ດ້ານ​ການ​ຄິດ​,ການວາງ​ແຜນ ແລະ ການ​ຈື່​ຈຳ.ເປັນ​ທີ່​ຮູ້​ກັນ​ຢູ່​ແລ້ວ​ວ່າ ລະດັບ​ຕໍ່າ​ຂອງ​ວິ​ຕາມິນ ​ດີ ​ໄດ້ມີ​ສ່ວນ​ພົວພັນ​ກັບ​ການ​ແຕກ​ຫັກ​ຂອງ​ກະດູກຫລື​ໂລກກະດູກພຸ​ພ່ອຍ, ຄວາມ​ເຈັບ​ປວດ, ​ແລະ​ ໂລກ​ຊຳ​ເຮື້ອ​ຕ່າງໆ ​ເຊັ່ນ​ ໂລກມະ​ເຮັງ, ​ໂລກຫົວ​ໃຈ, ​​ໂລກ​ເບົາຫວານ ​ແລະ ​ໂລກ​ເສັ້ນປະສາດ​ແຂງ​ໂຕ ຫລື Multiple Sclerosis.

     ປັດຈຸບັນ​ນີ້ ບັນດາ​ນັກຄົ້ນຄວ້າ​ໄດ້​ພົບ​ເຫັນ​ວ່າ​ມີ​ສ່ວນ​ພົວພັນ​ກັນລະຫວ່າງ​ການ​ຂາດ​ເຂີນ​ໃນ​ສິ່ງ​ທີ່​ເອີ້ນ​ວ່າ ​“sunshine” ວິ​ຕາ​ມິນ ຫລື ວິ​ຕາ​ມິນ​ແສງ​ຕະ​ເວັນກໍ​ຄື​ວິ​ຕາ​ມິນ​ D ​ນັ້ນ ກັບ​ຄວາມ​ເຊ່ືອມ​ຂອງ​ປະສາດຮັບ​ຮູ້​ຂອງ​ພວກ​ຄົນ​ສູງ​ອາຍຸ. ສາ​ເຫດ​ທ່ີ​​ແຜ່​ຫຼາຍ​ທ່ີ​ສຸດ​ອັນ​ຫນ່ຶງຂອງ​ການຂາດ​ວິຕາ​ມິນ ​ດີ ກໍ​ຄືການ​ຂາດ​ແສງຕາ​ເວັນ ​ຊຶ່ງ​ແມ່ນ​ຄວາມ​ເປັນ​ຫ່ວງໂດຍ​ສະ​ເພາະຂອງ​ພວກ​ຜູ້​ເຖົ້າ ​ທ່ີ​ມີ​ກິ​ດຈະ​ກໍາ​ທາງ​ຮ່າງກາຍໜ້ອຍ​ລົງ ​ເພາະ​ວ່າ​ເຂົາ​ເຈົ້າມັກ​ໃຊ້​ເວລາ​ຢູ່​ຂ້າງ​ນອກຫລື​ກາງ​ແຈ້ງ​ໜ້ອຍ​ກວ່າແຕ່ ກ່ອນ.

      ໃນ​ການ​ທົດ​ລອງ​ກັບ​ພວກ​ຜູ້​ເຖົ້າຊາວ​ອິຕາ​ລີ​ຫຼາຍ​ກວ່າ 850 ຄົນ ​ທີ່​ມີອາຍຸ​ແຕ່ 65 ປີ​ຂຶ້ນ​ໄປນັ້ນ ພວກນັກວິທະຍາສາດ​ທ່ີ ວິທະຍາ​ໄລ​ການ​ແພດ Peninsula Medical School ໃນປະ​ເທດ​ອັງກິດ​ພົບ​ເຫັນ​ວ່າ ພວກ​ທ່ີ​ມີ​ໄວ​ຕາ​ມິນ​ດີ​ໃນ​ລະດັບຕໍ່າທ່ີ​ສຸດ​ແມ່ນ​ມີ​ທາງ​ທ່ີ​ຈະປະສົບ​ກັບ​ການເຊ່ືອມລົງ​ຂອງປະສາດຮັບ​ຮູ້​ເຖິງ 60%. ນັກ​ຄົ້ນ​ຄວ້າ ​David Llewellyn ຊ່ຶງ​​ເປັນນັກຊ່ຽວຊານ​ດ້ານ​ໂລກຄວາມ​ຈຳ​ເຊ່ືອມ ​ແລະ ​ເປັນ​ຜູ້ນຳ​ພາ​ການ​ສຶກສາ​ນີ້ກ່າວ​ວ່າ: “ຜູ້​ຄົນ​ປະມານຫ​ນ່ຶງ​ພັນ​ລ້ານ​ຄົນ​ໃນ​ທົ່ວ​ໂລກບໍ່​ໄດ້​ຮັບ​​ວິ​ຕາ​ມິນ​ດີ​​ໃນ​ລະດັບສູງ​ພໍ ​ແລະ ​ກໍ​ເປັນ​ທ່ີ​ແຈ້ງ​ຂາວ​ວ່າໂລກຄວາມ​ຈຳ​ເຊ່ືອ​ມນັ້ນມີ​ແຜ່ຫຼາຍ​ທ່ີ​ສຸດຄື​ກັນ ​ເພາະສະ​ນັ້ນ ​ຖ້າ​ຫາກ​ວ່າມີ​ການ​ກ່ຽວ​ພັນ​ກັນ​ລະຫວ່າງ​ລະດັບຂອງວິ​ຕາ​ມິນ​ດີ​ ກັບ​ໂລກຄວາມ​ຈຳ​ເຊ່ືອມ​ແທ້​ແລ້ວ ມັນ​ກໍ​ເປັນ​ເລື່ອງ​ທີ່ພວກ​ເຮົາ​ຄວນ​ມີ​ຄວາມກັງວົນ​ເປັນ​ຫ່ວງ.” ທ່ານ Llewellyn ກັບ​ເພ່ືອນ​ຮ່ວມງານຂອງ​ທ່ານ​ໄດ້​ທຳ​ການ​ສຶກສາ​ພວກ​ຜູ້​ເຖົ້າຊາວ​ອີ​ຕາ​ລີ​ເຫລົ່ານັ້ນ ​ເປັນ​ເວລາ 6 ປີ ຕັ້ງ​ແຕ່​ປີ 1998 ມາ ​ໂດຍ​ໄດ້​ທຳການທົດ​ລອງຂັ້ນ​ຕົ້ນ ​ດ້ວຍ​ການວັດ​ແທກ​ເບ່ິງ​ໄລຍະ​ເວລາ​ຂອງ​ຄວາມ​ຊົງ​ຈຳຂອງ​ເຂົາ​ເຈົ້າ, ຄວາມ​ສາມາດ​ໃນ​ການ​ຮຽນ​ຮູ້​ ​ໃນ​ການ​ຈື່​ຈຳ, ​ແລະ ການວາງ​ແຜນ​ຕະຫຼອດ​ທັງ​ການ​ຈັດ​ວາງ​ວຽກງານ​ຕ່າງໆ​ນຳ.


ຜະລິດຕະພັນນົມກໍເປັນແຫລ່ງຫນຶ່ງຂອງວິຕາມິນ ດີ.

 ພວກ​ນັກ​ຄົ້ນ​ຄວ້າ​​ໄດ້ສັງ​ເກດ​​ເຫັນ​ວ່າມີການ​ເຊ່ືອມ​ໂຊມ​ລົງ​ໃນ​ສ່ວນໃຫຍ່ຂອງ​ຄວາມ​ສາມ​າດ​ຕ່າງໆ​ທີ່​ກ່າວ​ມານັ້ນໃນ​ໝູ່ ພວກຜູ້​ເຖົ້າ​ທ່ີ​ມີລະດັບ​ວິ​ຕາ​ມິນ ​ດີ​ ຕໍ່າ​ທ່ີ​ສຸດ​ ​ຍົກ​ເວັ້ນຄວາມ​ສາມາດ​ດ້ານຫ​ນຶ່ງ ນັ້ນ​ກໍ​ຄືໄລຍະ​ເວລາ​ຂອງ​ຄວາມ​​ເອົາ​ໃຈ​ໃສ່​ຂອງ​ເຂົາ​ເຈົ້າ ​ຊຶ່ງ​ຜົນ​ຂອງ​ການ​ທົດ​ລອງ​ສະ​ແດງວ່າ ​ການ​ທ່ີ​ມີ​ວິ​ຕາ​ມິນ​ດີ​ໃນ​ລະດັບ​ຕໍ່າບໍ່​ໄດ້​ມີ​ຜົນ​ກະທົບ​ທີ່​ສຳຄັນ​ໃດໆ ຕໍ່​ໄລຍະ​ເວລາ​ແຫ່ງຄວາມ​ເອົາ​ໃຈ​ໃສ່​ຫລື​ຄວາມ​ສົນ​ໃຈ​ຂອງ​ເຂົາ​ເຈົ້າ​ໃນ​ ເລື້ອງ​ຕ່າງໆ.

     ທ່ານ Llewellyn ກ່າວ​ວ່າ ​ເວົ້າ​ແທ້​ແລ້ວ ການ​ພົບ​ເຫັນວ່າມີ​ຄວາມ​ກ່ຽວ​ພັນ​ກັນຢ່າງ​ແຂງ​ແຮງລະຫວ່າງ​ໂລກຄວາມ​ຈຳ​​ເຊ່ື​ອມກັບ​ການ​ມີ​ໄວ​ຕາ​ມິນ​ດີ​ໃນລະດັບ​ຕໍ່າ​​ນັ້ນ ແມ່ນ​ເປັນ​ຂ່າວ​ດີ ຊ່ຶງ​ທ່ານ​ກ່າວ​ວ່າ:“ຍ້ອນ​ວ່າ​ພວກ​ເຮົາ​ສາມາດ​ແກ້​ໄຂ​ບັນຫາ​ການ​ຂາດ​ວິຕາ​ມິນ ​ດີ​ ດ້ວຍ​ວິທີ​ງ່າຍໆ ​ໂດຍ​ການ​ກິນ​ຢາ​​ວິ​ຕາ​ມິນເພ່ີມຊ່ຶງ​ກໍ​ໄດ້​ສະ​ແດງ​ໃຫ້​ເຫັນ​​ແລ້ວວ່າ​ທັງ​ລາຄາຖືກ​​ແຕ່​ໄດ້​ຮັບ​ຜົນ​ດີ ແລະ ປອດ​ໄພ​ນຳ. ​ແລະ ​ພວກ​ເຮົາ​ກໍ​ຮູ້​ວ່າມັນ​ຊ່ວຍ​ຫຼຸດຜ່ອນ​ການ​ສ່ຽງຕໍ່ການ​​ລົ້ມ ແລະ​ ກະດູກ​ຫັກ ​ແລະ​ ແມ່ນ​ແຕ່ການ​ລົ້ມ​ຕາຍ ​ກ່ອນ​ເວລາ​ອັນ​ຄວນ​ນຳ. ​ເພາະສະ​ນັ້ນ​ພວກ​ເຮົາ​ຈ່ຶງ​ຕ່ືນ​ເຕັ້ນ​ຫຼາຍ​ກັບຜົນ​ຂອງ​ການ​ທົດ​ລອງນີ້ ​ເພາະວ່າ​ມັນ​​ເປີດ​ຊ່ອງ​ທາງ​ຖ້າ​ພວກ​ເຮົາ​ຫາກ​ທຳ​ການທົດ​ລອງ​ທາງ​ການ​ປ່ິນປົວ​ແກ້​ໄຂ​ ການ​ຂາດ​ເຂີນ​ວິ​ຕາ​ມິນ ​ດີ ​ນີ້ພວກ​ເຮົາ​ກໍ​ຈະ​ສາມາດ​ຫຼຸດຜ່ອນ​ກໍລະນີຄົນ​ໄຂ້ໂລກຄວາມ​ຈຳ​ເຊື່ອມ​ໃໝ່​ລົງໄດ້.” ພວກ​ນັກ​ຄົ້ນ​ຄວ້າ​ພາກັນ​ຄິດ​ວ່າ ​ວິຕາ​ມິນ​ດີ​ອາດ​ຫຼຸດຜ່ອນ​ການ​ເຊ່ືອມ​ໂຊມ​ຂອງ​ສະໝອງ​ລົງ​ໂດຍ​ສົ່ງ​ເສີມ​ການ​ກໍ່​ໂຕ​ຂອງ​ເນື້ອ​ເຍື່ອຂອງ​ເສັ້ນປະສາດ ທີ່​ຈຳ​ເປັນ​ສຳລັບ​ການ​ທຳ​ໜ້າ​ທ່ີ​ຕ່າງໆ​ຂອງ​ມັນສະໝອງ ອັນລວມທັງປັບປຸງ​ຄວາມ​ສາມາດ​ໃນ​ດ້ານ​ການ​ຮັບ​ຮູ້​​ແລະ​ຈື່​ຈໍານໍາ.

     ທ່ານ Bill Thies ເປັນຫົວໜ້າ​ຝ່າຍການ​ແພດ ​ແລະ ​ວິທະຍາສາດ​ຂອງສະມາ ຄົມ​ໂຣກຫຼົງ​ລືມ ຫລື Alzheimer’s Association ທ່ີ​ນະຄອນ Chicago ລັດ Illinois. ອົງການ​ດັ່ງກ່າວ​ສົ່ງ​ເສີມ​ການ​ຄົ້ນຄວ້າ​ໄປ​ສູ່​ການ​ປ່ິນປົວ​ ແລະ ​ຮັກສາ​ໃຫ້ຫາ​ຍ ໂລກ​​ເສັ້ນ​ປະສາດ​ເຊື່ອມທີ່​ສົ່ງ​ຜົນ​ກະທົບ​ຕໍ່ສະໝອງຊ່ຶງພາ​ໃຫ້​ສູນ​ເສຍຄວາມ​ຊົງ​ຈຳ​ຢ່າງ​ໃຫຍ່ ​ແລະ​ ໃນ​ທ່ີ​ສຸດ​ກໍ​ຕາຍ​ໄປ​ນັ້ນ.

     ເຖິງ​ແມ່ນການ​ສຶກສາ​ຫລາຍໆ​ຄັ້ງ ຊີ້​ບອກ​ວ່າ​ພວກ​ທ່ີ​ເປັນ​ໂລກຫຼົງລືມ​ແລ້ວນັ້ນ ບໍ່​ມີປະຕິກິລິຍາ​​ສະໜອງ​ຕອບຕໍ່​ຢາ​ວິ​ຕາ​ມິນ ​ດີ ກໍ່ຕາມແຕ່ ທ່ານ Thies ກໍ່​ກ່າວ​ວ່າ ມັນ​ອາດຈະ​ເປັນ​ໄປ​ໄດ້​ທ່ີ​ວ່າ ການ​ກິນ​ຢາ​​ວິ​ຕາ​ມິນ​ດີເພ່ີມ​ແຕ່​ຫົວ​ທີ​ໃນເວລາ​ທີ່​ເລີ່​ມ​ເປັນໂລກດ່ັງກ່າວ​​ນັ້ນ ມັນ​ກໍອາດຈະ​ປ້ອງ​ກັນ​ ຫຼື ​ບໍ່​ກໍ​ຖ່ວງ​ດຶງ​ໃຫ້​ໂລກດ່ັງກ່າວຊັກຊ້າລົງ.

...............................................................................................................................................................