ລອງຂອງ!!ທີມໃນຢູເອອີດຶງເສືອເຕ້ຍຄຸມທັບ

 

ເອົາ-ຟູຈາຣາ ປະກາດແຕ່ງຕັ້ງ ດີເອໂກ ມາຣາໂດນາ ອະດີດແຄ່ງດັງເປັນກຸນຊືຄົນໃໝ່ຂອງທີມ ໂດຍມັນເປັນການຄຸມທີມຄັ້ງທຳອິດໃນຮອບເກືອບ 5 ປີຂອງເຂົາ.

 

ດີເອໂກ ມາຣາໂດນາ ຕຳນານນັກເຕະຄົນອາເຈັນຕິນາໄດ້ຮັບການແຕ່ງຕັ້ງໃຫ້ເປັນເທຣນເນີຂອງ ເອົາ-ຟູຈາຣາ ສະໂມສອນໃນປະເທດສະຫະລັດອາລັບເອມິເຫຼດເປັນທີ່ຮຽບຮ້ອຍແລ້ວເມື່ອວັນອາທິດທີ່ຜ່ານມາ.

 

“ເປັນທາງການແລ້ວ ນີ້ແມ່ນຜູ້ຈັດການຊື່ດັງ ເອົາ ຟູຈາຣາ” ສະໂມສອນດັ່ງກ່າວຖະແຫຼງການພ້ອມກັບໂພສຮູບທີ່ “ເສືອເຕ້ຍ” ຖືເສື້ອສີແດງ-ຂາວຂອງສະໂມສອນ ໂດຍເທິງເສື້ອມີການຂຽນຊື່ຂອງ ມາຣາໂດນາ ກັບເບີ 10 ເອົາໄວ້ທາງຫຼັງພ້ອມ.

 

ທັງນີ້ນັບວ່າເປັນການໄດ້ຄຸມທີມຫົນທຳອິດໃນຮອບເກືອບ 5 ປີຂອງ ມາຣາໂດນາ ນັບຕັ້ງແຕ່ທີ່ຖືກ ເອົາ ວາເຊວ ທີມໃນສະຫະລັດອາຫຼັບເອມິເຫຼດປົດອອກຈາກຕຳແໜ່ງເມື່ອວັນທີ 10 ກໍລະກົດປີ 2012 ຂະນະດຽວກັນກໍນັບເປັນທີມທີ່ 5 ທີ່ດຶງເຂົາໄປເປັນກຸນຊື.