ຣີວິວ ເຄື່ອງສໍາອາງເຄົາເຕີ້ແບຣນລະດັບຕຳນານ

 

ສະບາຍດີ ທ່ານຜູ້ອ່ານ ກະທູ້ນີ້ຂຽນຂຶ້ນມາເພື່ອເປັນການແບ່ງປັນປະສົບການກ່ຽວກັບການໃຊ້ເຄື່ອງສຳອາງແບຣນດັງຂອງສາວໆທົ່ວອານາປະຊາໂລກ ໂດຍບໍ່ໄດ້ມີຈຸດປະສົງຢາກຈະອວດໂອ້ ຫຼືໂຄສະນາແຕ່ປະການໃດ(ບໍ່ໄດ້ຄ່າໂຄສະນາຈັກກີບ5555)...ຫວັງຢ່າງຍິ່ງວ່າກະທູ້ນີ້ຈະເກີດປະໂຫຍດແກ່ຜູ້ອ່ານທີ່ໜ້າຮັກ ກ່ອນການຕັດສິນໃຈວ່າຈະຄວັກເງິນໃນກະເປົ໋າຊື້ດີບໍ່? ແລ້ວມັນຄຸ້ມຄ່າ ແລະເໝາະສຳລັບເຮົາແລ້ວຫຼືຍັງ?

 

ເລີ່ມຕົ້ນຈາກຜະລິດຕະພັນບຳລຸງຜິວ ຂໍໃຊ້ທັບສັບວ່າ skincare ເດີ. ສ່ວນຕົວເປັນຄົນຜິວສອງສີ, ຜິວປະສົມ ແລະມີສິວແຖມຮູຂຸມຂົນກວ້າງ, Lifestyle ເປັນສາວອິນດີ້ ເຮັດວຽກຟີແລນ, ຮຽນໜັງສື ແລະນອນເດິກ ແຕ່ກ່ອນເຄີຍໃຊ້ຄີມຊຸດລາຄາພັນກວ່າບາດ ເຊິ່ງກໍເຫັນຜົນຈົນກະທັ້ງມາເຖິງຈຸດອີ່ມຕົວໜ້າກໍເລີຍເພ ແລະອ່ອນແອເພາະສານເຄມີ. ຕອນນີ້ຢຸດຄີມກ໋ອງງາມໆ ທີ່ມີພີເຊັນເຕີ້ເປັນເນັດໄອດໍ ຫັນມາສຶກສາ skincare ຍີ່ຫໍ້ທີ່ໜ້າເຊືອຖື ຫຼັງຈາກທີ່ຄຸ້ຍຂໍ້ມູນຈາກຣີວິວຂອງຜູ້ໃຊ້ທັງຝັ່ງອາຊີ ແລະພວກຝາລາງດັງໂມໆຢ່າງໜັກໜ່ວງ ຂ້ານ້ອຍກໍເລືອກຄີມມາໄດ້ 4-5ຍີ່ຫໍ້ດັ່ງນີ້

  1. SKII FACIAL TREAMENT ESSENCE      
  • ນ້າຕົບພິເທຣາທີ່ສະກັດມາຈາກການໝັກເຫຼົ້າສາເກ ບິນກົງມາຈາກຢີ່ປຸ່ນ, ເປັນ skincare ລະດັບຕຳນານທີ່ບໍ່ມີໃຜບໍ່ຮູ້ເນື່ອງຈາກລາຄາທີ່ແພງຫູດັບຕັບໄໝ້ ເຂົາວ່າກັນວ່າມັນມີເອມໄຊທີ່ຊ່ວຍໃນການປຸກລະດົມຜິວໃຫ້ສ້າງເຊວໃໝ່ຕາມທຳມະຊາດ ແລະຊ່ວຍໃຫ້ຜິວໜ້າແຂງແຮງວ່າຊັ້ນເດ່. ເຊິ່ງຂ້ານ້ອຍກໍໃຊ້ໝົດໄປຫຼາຍກ໋ອງຈຶ່ງພໍຈະກຳຈຸດພິເສດຂອງນາງນ້ຳຕົບນີ້ໄດ້ວ່າ
    • ກິ່ນເໝັນຄືນ້ຳລາຍ ເພາະນາງບໍ່ມີນ້ຳຫອມ ແລະສີເຈືອປົນ
    • ໜ້າບໍ່ຂາວ, ຮອຍດຳບໍ່ຫາຍ ແຕ່ວ່າໜ້າຕຶງໆແຂງແຮງຂຶ້ນ
    • ບໍ່ເຫັນຜົນພາຍໃນ 7ວັນຄືຄີມເຖື່ອນ ແຕ່ຢ່າງຕ່ຳສອງເດືອນຂຶ້ນໄປແລ້ວແຕ່ສະພາບຜິວຂອງທ່ານໆ
    • ນາງນີ້ຈະເສີມສົ່ງໃຫ້ skincare ໂຕອື່ນໆເຮັດວຽກຢ່າງມີປະສິດຕິພາບ ແຕ່ນາງບໍ່ສາມາດເຮັດວຽກຜູ້ດຽວໄດ້່.
    • ຢ່າເທໃສ່ສຳລີຄືດັ່ງພະນັກງານເຄົາເຕີແນະນຳເພາະມັນເປືອງ ແຕ່ໃຫ້ແຕະໃສ່ປາຍນິ້ວແລ້ວລູບໆຖູໆທົ່ວໃບໜ້າ.
    • ສ່ວນຕົວແລ້ວຈະໃຊ້ນາງຕໍ່ໄປເລື້ອຍໆ ເຖິງນາງບໍ່ໄດ້ໃຫ້ຜົນລັບມະຫັດສະຈັນ ແຕ່ສຳພັດໄດ້ວ່າຜິວດີຂຶ້ນ.

ສຸດທ້າຍ ຂ້ານ້ອຍບໍ່ຊື້ຂວດແທ້ເພາະລາຄາມັນແພງ ແຕ່ຈະຊື້ຂວດເທສເຕີ 30ມລ ມາຕຸນໄວ້ຫຼາຍຂວດ ລາຄາປະມານ 500-600ບາດ ແຕ່ຖ້າໃຜເປັນມືໃໝ່ບໍ່ຊ່ຽວຊານລະວັງຖືກຂອງປອມ ໃຫ້ໃຊ້ຂວດແທ້ຈາກເຄົາເຕີກ່ອນ ເພື່ອໃຫ້ລຶ້ງກິ່ນ ແລະລັກສະນະ ຫຼັງຈາກນັ້ນຈຶ່ງລອງລຸຍຂອງຖືກ 

2. ETEE LAUDER Advanced Night Repair Serum:

ນາງນີ້ສັນຊາດຝຣັ່ງ ຖືກໂຄສະນາວ່າ 7ນາທີໃດຈະໄດ້ຂາຍ 1ຂວດວ່າຊັ້ນ!!!!! ຂ້ານ້ອຍກໍເລີຍສອຍຂະໜາດທົດລອງ 7ມລ ມາຫຼິ້ນເປັນເວລາເກືອບ 2ເດືອນ ໂອໂຫ່!!!! ນາງເລີດເລີເຟີເຟັກແບບວ່າ...

  • ກາງຄືນເວລາໃຊ້ຄູ່ກັບນາງນ້ຳຕົບຈະເສີມສົ່ງກັນດີທີ່ສຸດ
  • ໃຊ້ໄດ້ທຸກເພດທຸກໄວ ແຕ່ຈະເປັນທີ່ນິຍົມຂອງສາວໄວໃຫຍ່ ແຕ່ຕອນຂ້ານ້ອຍໃຊ້ອາຍຸຫາກໍຂຶ້ນເລກສອງ ມັນຈະເຫັນຜົນໄວກວ່າ ເລີຍບໍ່ຈຳເປັນໃຊ້ທຸກມື້.
  • ໄລຍະໃດທີ່ດູແລຕົວເອງດີ ພັກຜ່ອນພຽງພໍ ເວລາໃຊ້ນາງຍິ່ງເຮັດໃຫ້ຜິວນິ້ມນຸ້ມນວນນຽນ ແຕ່ຖ້າຫາກໄລຍະໃດເຮັດວຽກໜັກນອນເດິກ ກິນນ້ຳໜ້ອຍ ນາງພຽງຊ່ວຍໃຫ້ໃບໜ້າບໍ່ເຮັ່ງຮ້າຍໂຊມຊີດລົງເທົ່ານັ້ນ.
  • ບາງຄົນບອກວ່າໃຊ້ແລ້ວຂາວຂຶ້ນ ແຕ່ຂ້ານ້ອຍບໍ່ຮູ້ສຶກປານໃດ
  • ຊ່ວຍເຮັດໃຫ້ເຊວຜິວເກົ່າຫຼຸດຫາຍໄປ ເຜີຍເຊວໃໝ່ດີຂຶ້ນ ນີ້ຄືຈຸດຂາຍຂອງນາງ
  • ຈະໃຊ້ນາງຕໍ່ໄປຕາບຊົ່ວຟ້າດິນສະຫຼາຍ ຂໍເລົ່າໜ້ອຍໜຶ່ງວ່າເຄົາເຕີ ETEE LAUDER ຢູ່ລາວຈະຂາຍໃນລາຄາ ໜຶ່ງລ້ານຫ້າພັນກີບ ຂະໜາດ 50ມລ ແຕ່ຂ້ານ້ອຍຊື້ມາແຕ່ຝັ່ງນັ້ນລາຄາປະມານ 2000-2300ບາດ ແຕ່ກໍສ່ຽງຕໍ່ການຖືກຂອງປອມຖ້າໃຜບໍ່ຊຽນນະ

3. CLINIQUE Dramatically Different Moisturizing Gel

ຢີ່ຫໍ້ຄີນິກມີຊື່ສຽງລຶຊາຜາກົດໃນເລື່ອງມອຍເຈີໄຣເຊີ ຂໍ້ດີຂອງນາງຄືທຸກໆຜະລິດຕະພັນຈະບໍ່ມີນ້ຳຫອມ ແຖມຍັງແບ່ງແຍກຈະແຈ້ງວ່າໂຕໃດເປັນຂອງຄົນຜິວມັນ, ຜິວແຫ້ງ ເຊິ່ງຂ້ານ້ອຍກໍເລືອກສຳລັບຄົນຜິວມັນ. ເຊິ່ງຜົນລັບກໍອອກມາໜ້າພໍໃຈຄືທາງແລ້ວໜ້ານຸ້ມບໍ່ເປັນຊຸ່ຍລອກ ແຕ່ກໍບໍ່ມັນແຕ່ປະການໃດ ຮັກນາງເລີຍລະ!. ແຕ່ຢ່າຄາດຫວັງເລື່ອງຜິວຂາວໃນຄີມໝວດໝູ່ມອຍເຈີໄຣເຊີເດີ ເພາະມັນຊ່ວຍພຽງເລື່ອງຊຸ່ມຊື່ນເທົ່ານັ້ນ.

4.  ESTEE LAUDER Advanced Night Repair Eye

ຄີມສຳລັບທາງຜິວບໍລິເວນໜັງຕາຂວດທຳອິດໃນຊິວິດຂອງຂ້ານ້ອຍ ແຕ່ຮູ້ສຶກຜິດຫວັງ ເພາະມັນບໍ່ຕື່ມຫຍັງ ແຖມຍັງແສບຕາເວລານອນ (ສົງໄສເນື້ອຄີມມັນໄຫຼເຂົ້າຕາຕິເບາະ) ຕອນນີ້ອົບພະຍົບມັນໄປໃຫ້ອີ່ແມ່ແລ້ວ ລາວກໍ No comment.

5. LANEIGE Water Sleeping Mask:

ອັນຢອງຮາເຊໂຢ ນາງນີ້ຖືກສົ່ງມາຈາກເກົາຫຼີ ໄດ້ຟຣີເປັນຂອງຂວັນ ອິອິ ນາງເປັນ Sleeping Mask ໂຕທຳອິດຂອງໂລກ ທີ່ຊ່ວຍໃນເລື່ອງຕື່ມເຕັມນ້ຳໃຫ້ກັບຜິວ ແລະເກັບກັກຄວາມຊຸ່ມຊື່ນເນື່ອງຈາກເກົາຫຼີເປັນເມືອງໜາວ ແຕ່ກໍສາມາດໃຊ້ຢູ່ບ້ານເຮົາໄດ້ເພາະນາງບໍ່ມັນ ຂ້ານ້ອຍຈະເກັບໄວ້ໃນຕູ້ເຢັນເວລາທາແລ້ວຮູ້ສຶກຜ່ອນຄາຍໃບໜ້າ ທັງກິ່ນ ແລະເນື້ອຄີມ(ແຖມໄມ້ພາຍມາໃຫ້ຕັກອີກອັນໜຶ່ງ) ທາແລ້ວນອນເລີຍ ຕື່ນມາໜ້າກໍນຸ້ມນິ້ມ ໃຊ້ພຽງອາທິດລະຄັ້ງສອງຄັ້ງເທົ່ານັ້ນ

ນາງເປັນໂຕທີ່ທຸກຄົນມີກໍໄດ້ ບໍ່ມີກໍໄດ້ ແຕ່ກໍສາມາດຊ່ວຍຜ່ອນຄາຍຄວາມເມື່ອຍລ້າໃຫ້ຜິວໄດ້ລະດັບໜຶ່ງ ອາດໃຊ້ນົມສົດເຢັນຈຸ່ມແມ່ນມາສສຳເລັດຮູບມາປົກໜ້າແທນກໍໄດ້ ຖ້າໃຜບໍ່ມີງົບຫຼາຍ ເພາະກ່ອງນີ້ຢູ່ບ້ານເຮົາລາຄາປະມານ ສອງແສນກວ່າພຸ້ນນະ.

6. ໝາກຂາມນາງງາມຂັດໜ້າ:

ຫຼັງຈາກລອງສາລະພັດສູດຂັດໜ້າຈາກທຳມະຊາດຈຶ່ງມາຢຸດຢູ່ທີ່ໝາກຂາມ ແຕ່ວ່າໝາກຂາມທີ່ເຮັດເອງນັ້ນມັນບໍ່ປອດເຊື້ອພຽງພໍ ເລີຍຊື້ກະປຸກນີ້ມາໃນລາຄາ 200ກວ່າບາດ ແຕ່ໃຊ້ກຸ້ມດົນສຸດໆເລີຍ. ກົດ AHAອ່ອນໆຂອງໝາກຂາມຈະຊ່ວຍຂັດເຊວຜິວເກົ່າ, ເຫື່ອໄຄອອກຈາກຮູຂຸມຂົນ ທັງຊ່ວຍໃຫ້ຜິວໃສຕາມທຳມະຊາດ ຫຼັງຈາກພອກແລ້ວ 15ນາທີຈະໃຊ້ສຳລີ ຫຼືຟອງນ້ຳເຊັດອອກຈຶ່ງລ້າງໜ້າ ແລ້ວຮີບທາຄີມບຳລຸງຜິວ ຂໍ້ຄວນລະວັງກໍຄືບໍ່ຄວນຖືກແດດເພາະໜ້າເຮົາຈະບາງ ແລະໄວຕໍ່ແດດງ່າຍ. ໃຊ້ທິດລະເທື່ອກໍພໍ ຜິວໃສນຽນສົມຄຳເລົ່າຂານ.

 

 

ສະຫຼຸບແລ້ວກໍຂໍໃຫ້ຜູ້ອ່ານ ອ່ານຢ່າງມີວິຈາລະນະຍານ ເຄື່ອງສຳອາງຈະຖືກ ຫຼືຈະແພງ ແມ່ນຂຶ້ນກັບຄວາມສາມາດໃນການຊື້ຂອງເຮົາເອງ ແລະກ່ອນຊື້ຢ່າລືມພິຈາລະນາສະພາບຜິວ ແລະເອົາໃຈໃສ່ເຖິງຄວາມປອດໄພເປັນສິ່ງສຳຄັນ ບໍ່ດັ່ງນັ້ນ ໜ້າຈະເສຍເງິນຈະຫາຍ ແຖມຍັງຕ້ອງເຈັບປວດໃຈອີກ.