ຣາມອສກະຕຸ້ນກະທິງຮຽນຮູ້ຄວາມຜິດພາດເພື່ອໄປຕໍ່

 

ເຊຄິໂອ ຣາມອສ ເຊັນເຕີແບັກຂອງ ເຣອັນ ມາດຣິດ ກະຕຸ້ນທີມຊາດສະເປນຕ້ອງພະຍາຍາມຮຽນຮູ້ຈາກຄວາມຜິດພາດຫຼັງຈາກທີ່ພິກລັອກເສຍໃຫ້ກັບໂຄເອເຊຍໃນ ຢູໂຣ 2016 ເມື່ອວັນອັງຄານທີ່ຜ່ານມາ ແລະ ຢ່າໃຫ້ເກີດເຫດການຊ້ຳຮອຍອີກໃນຮອບຕັດເຊືອກກັບອີຕາລີ.

 

ເຊຄິໂອ ຣາມອສ ກອງຫຼັງກັບຕັນທີມຊາດສະເປນອອກມາກ່າວວ່າທີມຂອງເຂົາຕ້ອງຮຽນຮູ້ຄວາມຜິດພາດຈາກນັດທີ່ພິກລັອກເສຍໂຄເອເຊຍ 1-2 ໃນເສິກບານເຕະຊິງແຊມເອີຣົບ ຢູໂຣ 2016 ຮອບແບ່ງກຸ່ມຂອງກຸ່ມດີນັດສຸດທ້າຍທີ່ສະໜາມ ນູໂວ ສະຕາດ ເດີ ບັອກ ເມືອງບັອກໂດເມື່ອວັນອັງຄານທີ່ຜ່ານມາ.

 

ໃນເກມດັ່ງກ່າວນັ້ນສະເປນອອກນຳກ່ອນ 1-0 ຕັ້ງແຕ່ນາທີທີ່ 7 ຈາກການຍິງຂອງ ອັນບາໂຣ ໂມຣາຕາ ແຕ່ນາທີທີ່ 45 “ກາໝາກລຸກ” ກໍໄລ່ຕີສະເໝີເປັນ 1-1 ຈາກການຍິງຂອງ ນິໂກລາ ຄາລິນິດ ຈາກນັ້ນນາທີທີ່ 72 ສະເປນມີໂອກາດທີ່ຈະຂຶ້ນນຳເປັນ 2-1 ເມື່ອມາໄດ້ລູກຈຸດໂທດແຕ່ວ່າ ຣາມອສ ຍິງບໍ່ເຂົ້າເຮັດໃຫ້ “ກະທິງໂຫດ” ເສຍແບບເຫຼືອເຊື່ອ ແລະ ຕ້ອງໄປດວນກັບອີຕາລີໃນຮອບ 16 ທີມສຸດທ້າຍຕໍ່ໄປເຊິ່ງເປັນການຣີແມັດນັດຊິງຊະນະເລີດໃນ ຢູໂຣ 2016 ອີກທັງທີມຂອງ ບີເຊັນເຕ ເດລ ບອສເກ ຍັງມີໂອກາດເຈີ ເຢຍລະມັນ ໃນຮອບກ່ອນຮອງຊະນະເລີດ ແລະ ຝຣັ່ງ ຫຼື ອັງກິດໃນຮອບຕັດເຊືອກອີກດ້ວຍ.

 

ຫຼ້າສຸດກອງຫຼັງໂຕເກົ໋າຂອງ ເຣອັນ ມາດຣິດ ກ່າວວ່າ “ຕອນນີ້ເຮົາຕ້ອງເຈິກັບພວກທີມເຕັງແຕ່ການຈະເປັນແຊມນັ້ນເຈົ້າຕ້ອງຊະນະທຸກທີມໃຫ້ໄດ້ ເຮົາຈະມີສະມາທິກັບຕົວເອງ ແລະ ຄິດກ່ຽວກັບຮອບ 16 ທີມສຸດທ້າຍ ເຮົາຕ້ອງກ້າວຕໍ່ໄປ, ຮຽນຮູ້ຈາກຄວາມຜິດພາດເຫຼົ່ານີ້ ແລະ ບໍ່ໃຫ້ເກີດຂຶ້ນກັບເຮົາອີກໃນຮອບ 16 ທີມສຸດທ້າຍ”.