ຣານິເອລີຍົກສະປີລິດເລສເຕີນັດສອຍສາລິກາດົງ

 

ເຄລາດິໂອ ຣານິເອລີ ນາຍໃຫຍ່ ເລສເຕີ ຊີຕີ ພູມໃຈທີ່ລູກທີມຫຼິ້ນດ້ວຍສະປິລິດທີ່ແຂງແກ່ນໃນເກມເສືອນຊະນະ ນິວຄາສເຊິນ 1-0 ເກມລີກເມື່ອວັນຈັນທີ່ຜ່ານມາ ຮັບທີມບໍ່ໄດ້ຫຼິ້ນດ້ວຍຟອມທີ່ດີທີ່ສຸດແຕ່ສາມາດເອົາໂຕລອດໄດ້ທີ່ສຳຄັນເກມຮັບແຂງແທ້ໆ.

 

ເຄລາດິໂອ ຣານິເອລີ ຜູ້ຈັດການທີມຂອງ ເລສເຕີ ຊີຕີ ສະໂມສອນຈ່າຝູງຈາກ ພຣີເມຍລີກ ຍົກຍ້ອງລູກທີມທີ່ຫຼິ້ນດ້ວຍສະປິລິດທີ່ແຂງແກ່ນໃນເກມຊະນະ ນິວຄາສເຊິນ 1-0 ທີ່ສະໜາມ ຄິງ ພາວເວີ ສະເຕດຽມ ເກມລີກເມື່ອວັນຈັນທີ່ຜ່ານມາ.

ປະຕູໄຊຈາກການຍິງສຸດງາມຂອງ ຊິນຈິ ໂອກາຊາກິ ຕັ້ງແຕ່ເຄິ່ງທຳອິດສົ່ງຜົນໃຫ້ ເລສເຕີ ເກັບ 3 ຄະແນນສຳຄັນເຮັດໃຫ້ພວກເຂົາຍັງເປັນຈ່າຝູງຢ່າງໜຽວແໜ້ນໂດຍຕອນນີ້ມີ 63 ແຕ້ມຖິ້ມຫ່າງ “ໄກ່ເດືອຍທອງ” ທັອດແນມ ຮັອດສະເປີ ອັນດັບ 2 ເຖິງ 5 ແຕ້ມ.

 

ຣານິເອລີ ສະແດງຄວາມເຫັນຫຼັງຈົບເກມວ່າ “ມັນບໍ່ແມ່ນຟອມການຫຼິ້ນທີ່ດີທີ່ສຸດຂອງເຮົາ ແຕ່ເຮົາສະແດງໃຫ້ເຫັນເຖິງສະປິລິດທີ່ສຸດຍອດ ເຮົາຫຼິ້ນເກມຮັບໄດ້ຢ່າງໜຽວແໜ້ນ ເຮົາພະຍາຍາມສູ້ຢ່າງເຕັມທີ່ ບໍ່ມີຄວາມຮູ້ສຶກປະໝາດເລີຍໃນເຄິ່ງຫຼັງ ທີມເຮົາຫຼິ້ນໄດ້ຢ່າງໜຽວແໜ້ນ ແລະ ສູ້ຮ່ວມກັນຢ່າງເຕັມທີ່”.