ຣານິເອຣີບໍ່ຫວັ່ນເຖິງທີມຟອມຕົກ

 

ຄລາວດິໂອ ຣານິເອຣີ ກຸນຊື ເລສເຕີ ຊີຕີ ປະກາດຊັດເຈນວ່າບໍ່ວິຕົກຫຍັງກັບສະຖານະການໃນລີກຂອງທີມ ແຕ່ກຳຊັບລູກທີມຕ້ອງເຮັດວຽກໃຫ້ໜັກຍິ່ງຂຶ້ນ ແລະ ພະຍາຍາມເກັບແຕ້ມໃຫ້ໄດ້ໃນເກມຕໍ່ໆໄປ.

 

ຄລາວດິໂອ ຣານິເອຣີ ຜູ້ຈັດການທີມ ເລສເຕີ ຊີຕີ ຢືນຢັນວ່າຕົນບໍ່ໄດ້ຮູ້ສຶກຫວັນວິກຕົກຫຍັງເຖິງວ່າຕອນນີ້ສະຖານະການຂອງທີມໃນຕາຕາລາງຄະແນນ ພຣີເມຍລີກ ບໍ່ຄ່ອຍດີກໍຕາມຫຼັງຈາກທີ່ບຸກໄປເສຍໃຫ້ກັບ ເບີນລີ 0-1 ໃນເກມລີກເມື່ອວັນອັງຄານທີ 31 ມັງກອນທີ່ຜ່ານມາ.

 

ການປລາໄຊໃນເກມດັ່ງກ່າວເຮັດໃຫ້ “ຈິງຈອກເງິນ” ເຊິ່ງເປັນແຊມເກົ່າຢູ່ອັນດັບ 16 ແລະ ຫາກໍມີພຽງ 21 ແຕ້ມຈາກການລົງຫຼິ້ນ 23 ນັດເຊິ່ງຢູ່ເໜືອຈາກໂຊນຕົກຊັ້ນພຽງ 2 ແຕ້ມເທົ່ານັ້ນ ແລະ ເຖິງວ່າເສຍໃນເກມລີກມາ 3 ເກມຕິດແຕ່ ຣານິເອຣີ ຍັງແຮັບປີກັບຟອມການຫຼິ້ນຂອງລູກທີມ.

 

“ວິຕົກ? ບໍ່ເລີຍ ເຮົາມີແຕ່ພະຍາຍາມຫຼິ້ນເກມໂຕ້ກັບໃຫ້ດີ ເຊິ່ງບາງເທື່ອມັນອາດຈະເປັນຍ້ອນເຮົາເຮັດພາດໃນການຈ່າຍບານຈັງຫວະສຸດທ້າຍກ່ອນເຂົ້າຍິງເທົ່ານັ້ນ ຂ້ອຍແຮັບປີກັບຟອມການຫຼິ້ນຂອງເຮົາ ແນ່ນອນວ່າຜົນການແຂ່ງຂັນມັນບໍ່ດີສຳລັບເຮົາ ເພາະສະນັ້ນເຮົາຈຳເປັນຕ້ອງເຮັດວຽກໃຫ້ໜັກຍິ່ງຂຶ້ນ ສູ້ໃຫ້ຫຼາຍກວ່າເກົ່າ ແລະ ເຊື່ອໝັ້ນເຂົາໄວ້ ເຮົາຈຳເປັນຕ້ອງເກັບແຕ້ມໃຫ້ໄດ້ໃນສອງ ຫຼື ສອງເກມຕໍ່ຈາກນີ້ ແລ້ວເຮົາກໍຈະດີຂຶ້ນເອງ” ກຸນຊືອີຕາລຽນລະບຸ.