ຣັອບເບັນຢັນບໍ່ເລັ່ງຂະຫຍາຍສັນຍາກັບເສືອໃຕ້

 

ອາເຢນ ຣັອບເບັນ ມິດຟິວຂອງ ບາເຢິນ ມິວນິກ ຢັນຍັງບໍ່ໄດ້ເລີ່ມຕົ້ນລົມກັບທີມເລື່ອງການຂະຫຍາຍສັນຍາສະບັບໃໝ່ ແລະ ຕົນເອງກໍບໍ່ໄດ້ເລັ່ງຮັບຂະຫຍາຍສັນຍາແຕ່ຢ່າງໃດ ເຖິງວ່າສັນຍາເກົ່າຈະໝົດອາຍຸຕອນຈົບລະດູການນີ້ໂດຍເຜີຍວ່າສິ່ງສຳຄັນທີ່ສຸດບໍ່ແມ່ນສັນຍາແຕ່ເປັນການຮັກສາຄວາມຟິດ ແລະ ເຮັດຜົນງານດີໆໃຫ້ກັບທີມ.

 

ອາເຢນ ຣັອບເບັນ ປີກໂຕເກົ໋າຂອງ ບາເຢິນ ມິວນິກ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນອອກມາເປີດເຜີຍວ່າ ຕົນເອງບໍ່ຮີບຮ້ອນທີ່ຈະຕໍ່ສັນຍາສະບັບໃໝ່ກັບຕົ້ນສັງກັດອອກໄປ ໂດຍຕັ້ງເປົ້າຮັກສາຄວາມຟິດ ແລະ ເຮັດຜົນງານດີໆໃຫ້ສະໝຳ່ສະເໝີ.

 

ປີກເລືອດກັງຫັນລົມທີ່ຍ້າຍມາຢູ່ ບາເຢິນ ເມື່ອປີ 2009 ແລະ ຫາກໍຍິງໄດ້ 1 ປະຕູໃນເກມລີກທີ່ ບາເຢິນ ຊະນະ ເອົາສ໌ບວກ 3-1 ເມື່ອວັນເສົາທີ 29 ກັນຍາທີ່ຜ່ານມາ ກ່າວວ່າ “(ຄາ-ຮາຍ ຣຸມເມນິເກ້ ປະທານບໍລິຫານ ບາເຢິນ ມິວນິກ) ມີເບີໂທລະສັບພໍ່ຂ້ອຍເພາະສະນັ້ນເຂົາສາມາດໂທຫາ ແລະ ເຊີນພໍ່ຂ້ອຍໄປດື່ມກາເຟໄດ້ທຸກເວລາ ແຕ່ມັນບໍ່ແມ່ນເລື່ອງສຳຄັນຫຼາຍທີ່ສຸດສຳລັບຂ້ອຍ”.

 

“ເປົ້າໝາຍຂອງຂ້ອຍຄືການຮັກສາໂຕ ແລະ ຫຼິ້ນໃຫ້ດີ ເຮົາຮູ້ວ່າເຮົາມີຄວາມສຳຄັນຕໍ່ກັນແບບໃດ ຂ້ອຍເປັນຄົນຕົງໆແຕ່ຂ້ອຍບໍ່ຄິດເລື່ອງນີ້ພໍປານໃດ ຂ້ອຍພຽງຢູ່ທີ່ນີ້ ແລະ ມີສະມາທິກັບການເຮັດຜົນງານໃຫ້ດີ ຈະຕໍ່ສັນຍາ ຫຼື ບໍ່ຕໍ່ສັນຍາຂ້ອຍກໍຍັງຢູ່ກັບ ບາເຢິນ ຂ້ອຍຮູ້ວ່າສັນຍາຂອງຂ້ອຍຈະໝົດລົງໃນປີ 2017 ເຊິ່ງນັ້ນເປັນເລື່ອງໜຶ່ງ ແລະ ການຮັກສາສະພາບຮ່າງກາຍກໍເລື່ອງໜຶ່ງແລ້ວຈາກນັ້ນຈັງຫວະມັນກັບມາເອງ ສ່ວນເລື່ອງທີສາມອາດຈະເປັນເລື່ອງສັນຍາສະບັບໃໝ່”.

 

ກ່ອນໜ້ານີ້ ຣຸມເມນິເກ້ ເຄີຍບອກວ່າ ວາງແຜນລົມກັບ ຣັອບເບັນ ເລື່ອງອະນາຄົດຂອງເຂົາກັບ ບາເຢິນ ແລະ ເມື່ອຖືກຖາມກ່ຽວກັບເລື່ອງນີ້ອີກເທື່ອໜຶ່ງຫຼັງເກມຫຼ້າສຸດ ຊີອີໂອ ຂອງ “ເສືອໃຕ້” ເຜີຍວ່າ “ບໍ່ຕ້ອງກັງວົນລະດູການໜ້າເຮົາຈະມີທີມທີ່ດີ”.